Allahri nimi waro opsineba saekpare aneko mog so'oag ikil pionga
16
1 Nari ka'elamnoag agha, yubu nubu uro Allahri Mem Ae lomag agha Allah arukna malaikat saekbare abenekoag yubu lelamori, “Pimundi Allahri nimi waro loba nembahineba anggur wana lolterop mag saog uropne kau saekbareag liroba wamlange taneko, mog so'oag ikil pululom,” alamoa ka'ebano. 2 Allah arukna malaikat selekne neneko piori, Allahri nimi mog so'oag waro loba nembahinepne kau lomag liro pairopne neneko mog so'oag ikil pio. Ikil pioba, mog so'oag nimi Allah san tiliptop lebe aroba yame sunumna omektop nimiri el kekneba aneko sin nimi kon nongag torop nimi enekoag sorog nubunge og seklenne maubu yabihio.3 Neneko uro yabio tanena, Allah arukna malaikat phendepne nenekori Allahri nimi waro loba nembahinepne neneko mag nubu uro longorop mag lautag ikil pio. Longorop maghag ikil pioba, mag longorop mag eneko nimi teptop nimi eneng saog taori, lebe aroba mag lomag uropne ni tepto yambaong.
4 Neneko uro yabioba, Allah arukna malaikat wilindipne nenekori Allahri nimi waro loba nemabahinepne kau lomag liro pairopne neneko mag yabirop maghag, mag luag ikil pioba, mag ni aneko eneng aghabog tao. 5-6 Unuaoba ka'elamnoag agha, Allah arukna malaikat mag sembe yae uropne wamori, saelbamo malaikat enekori yubu lelamori,
“Tam malinge nene uro yabalamlange sembe
Andi tam karepto pelengelamlamne porogne agha karepto pelengelamlam.
Sin mog so'oag yo nimiri Allah Eldamneri weptop mabo eneng pelengelamsiangdi,
Allah yubu silimu tiptop nimi eneng babe pelengelamsiangne neneko sembe,
eneng pelengelamsiangne sunsunum uro
Andi wene eneng taneko Andi sin mo'olamsilam.
Yo, ot An mo Allah wamlamne samenag babe wamluma wene babe wamlamne,
An walinge nhonogne wamlamba, nhon babe An saog uropne orog.
Sunsunum uropne porog uro pelengelamsilam,”
aro wene alamoa ka'ebano.
7 Wene seoba, nari ka'elamnoag agha Allah sembe auk mhong towalengero tamnebag aneko yubu lelamori,
“Sikne agha lepla. Nuni Allah Mikip Phelektopne wamlam.
An agha nia mangkina ngai wamlamdi,
tam malinge palilamangdi ulamangne sembe
Andi sikne porogne agha tam karepto pelengelamlam,”
alamoa ka'ebano.
8 Neneko uro yabioba, Allah arukna malaikat tomne nenekori, “Nimi heng bobo seklebaukang,” aro kau lomag liro pairopne neneko heng anekoag ikoba, heng anekori nimi aukti telamsiloa saog uro telamsio. 9 Heng bobo mikipne anekori aukti telamsiloa saog uro telamsioba, mog so'oag nimiri Allah sembe san tiliplamong. Allah ponekona, sin mog so'oag nimi sembe el arukna imagnang malaikat tanekoag, “Nimi opsineba nene sinag pelengel phi,” aro ambarelamsioba, mog so'oag nimiri El Ya'ag Wamlange poneko san tilipto lelamong. Seklelamongdi, “El neneko paliag nenero kiplamukap kom,” aro san tiliplamongdi, sindi malia ulamongne limna koma tipto malia ulamong.
10 Undo unuaoba, Allah arukna malaikat lamne nenekori kau lomag wangaroba lebe aroba yongeri mog so'o saelba uhinne puka urobag aneko iko. Allah san tiliptop lebe arobari mog so'o saelba uhin puka urobag aneko ikoba, lebe arobari mog so'o saelba uhiro ua urobag aneko inibin sogmondo tao. Inibin taoba, sin og seklenne agha mog so'oag nimiri silimu si sabaltalamong. 11 Sinag sorog maulamsioba, og lelem seklelamong pog, sindi malia ulamongne limna koma Allah Imagne poneko sembe “Seklenne nene Elba, nunag pipsio,” aro san tilipto warop yubu lelamong.
12 Neneko uro yabioba, Allah arukna malaikat no'opne nenekori kau lomag wangaroba nubu mag Efrat inag ikoba, mag Efrat lo'oe tao. Lo'oe tao andarina, yubu sia lerop nang heng walelingkirobag siba mag Efrat ina lo'oe taonge aneko kaubom agha “Mal tabukap,” aro yingkinepne sembe lo'oe nembao.
13 Neneko uro yabioba, kemelamnoag agha phia yonge wilindi sinna ya'i saog wamonga ipsino. Sin ya'i saog uropne lanaptangka yalamongba ipsinongena, paghae sel-sel nubunge neneko pamag agha, lebe aroba yonge mag longorop mag agha lanaropne neneko pamag agha, apna lebe arobari silimu yubu tipto orolena ambatsiropne pamag agha lanaptangka lanalamonga ipsino. 14 Sinna, phia yongeri nimiri uanep komne nimiri kembi agha, “Yaghe mema mikipne agha ulamang,” senen kekneba ulamong. Sin phia yonge wilindi abenekona, mog so'o tala-tala pina, yubu sia leropnang tala-tala urop nubunang poloro wimbi agha, “Amik sum Allahap mal tabukap,” aro winil palamsiong. Sindi Allah Mikip Phelektopne ponekoap mal nubunge tarop sum nubu sum eneko sembe wero ul palamsiong.
15-16 Phia yonge abenekori yubu sia lerop nang, “Mal tabukap” aro poloro winihirobag anekona, Ibrani yubuag Harmagedona arobag poloro wimbahionga ipsino.
Imagne Ponekori lelamlari,
“Ka'eamlulom!
Na yanunnena, a'undi ekon urop sum yanun.
Haogha torop nimiri ambatsin koma yingkina tohirop saog uro,
Na babe, a'undi ekon urop sum yanun!
Nimi yae uptangka seneraglamleri,
‘Nari nongag enekanepne orogti, kabeog wamnenge kembaneikpa,
ali sembaneag,’ aro nongag enektop ag wero
elem uro wangaro anebag piple tanena, wana yeng uro wamlul,”
alamla.
17 Poloro winilamonga ipsinori, kemelamnoag agha Allah arukna malaikat saekne imag wamonge nenekori kau lomag liroba imag yamyamoro iko. Ikoba Allahri Mem Ae lomag anekoag Nia Mangkina saelba uhiropne puka urobag agha yubu lelamori, “Wene loba nenehiroba komoptopne ikitla,” seoba, ka'ebano.
18 Wene seoba lepna tingo-tingo alamoba, limang altara alamori, taltalagto pungolamoba sa'uma nubunge lologlamo. Samenag nimi sunulogsioghag agha sa'uma ik nhon babe mog so'o lologna lologhaog komne ot sumene agha nubu sirikne uao. 19 As nubu uro soro kalurop as Babel eneko pogto wilindi neneptaoba, as mog so'o ni tala-tala ubu pia urop soro kalurop as loba tahio. Undo uro yabiongena, soro kalurop as Babel nimiri samenag malia ulamekti, ulamongne sembe Allahri ekon tahio komdi, lunuro opsio. “Lunuro opsinun,” aro seneraghori, soro kalurop as nubunge Babel nimi taneko sembe Allahri nimi waro loba nembahinepne kau lomag liroba sinag pelengero ikitsio. 20 Mag longo kanektop mog so'o ni magti niknibahioba orog taoba, yim babe ni kom tao. 21 Luli wana imag agha kirik saogne telamori, nimi so'oag nimi olamsio. Luli wana imag agha telamonge neneko luli wana nubu sirikne ikin sirik uropne telamsio. Luli wana nhon-nhon ikinna, 50 kilogram saog urop luli wana imag agha mag saog uro telamori, nimi olamsio. Luli wanari nimi olamsionge nene sembe mog so'oag nimi maikno sirik seklelamongdi, Allah Imagne poneko sembe san tiliplamonga ka'ebahinori, imno.