Allah arukna malaikat saekpareri nimi opsinepne saekpare salelamonga
15
1 Nari imag tiwalengelamnori imnongena, kekneba “Yaghe,” senenne nimiri babe ngalaganepne imag tiwalengkimno. Allah arukna malaikat saekbareri nimi loba nembahineba saekbare komoptopne sale-sale yabiamongba ipsino. Nimi loba nembahineba saekbare abeneri nimi loba nembahile taneogna, “Wene komopto uro yabil,” aro Allahri nimi ohinne sae topleri, komobitlul. 2 Neneko uro yabioba, kemelamnoag agha mag nubunge longorop mag ko whiri yame-yame uroba sa'a-sa'a babe imnep wamoba, auk poghap ma'aro longoroba imno. Mag abolag aneko nimi sekamong nimi anekona, lebe aroba yonge nenekoag pharop koma khaptop nimi sekamong. Sinnena, samenag mog so'oag wamonga, lebe aroba yonge neneko si lunuro a'ilinne kekneba sin nongag torop kom. Sin nongag torop koma el yame sunumna babe kiptop komdi, khapto wamongne pere agha lebe aroba yonge neneko luknubaongdi, wene imag mag longorop mag neneko abolag sekamonga imno. Sindi saeag saelbamongnena, pingpong yubu lilim neneroba kecapi Allahri tatsiongba, salelamonga imno. 3 Sindi sepna seplamongne, Allah arukna Musa ponekori sepna seplamogneap Pham Domba Meri sepna seplamlangeap sepna seplamong. Sepna seplamongne lilimna ane:“Nuni Allah, mikip phelektopne wamlamne, andi nu Saelbamsilam.
Andi ulamlamne sembe nimiri ‘Yaghe' senenne agha ngalagtopne ulamlam.
Yubu Sia Lenne Ya'ag uropne wamlamne,
Sik uropne aghabog ulamlamdi, porog uro ul palamlam.
4 Ot An walinge nhonogne wamlamba, Nuni Allah saogne orog.
Nu Saelba Uhiropne wamlamne, nimi niri An kipkukang.
An sembe kiptop kom nimi nhon babe wamnep kom.
Nu Saelba Uhiropne wamlamne, nimi niri An omeklangkukang.
An paliag nenerop kom nimi nhon babe wamnep kom.
Andi porog sirikneog ulamlamne ni lag tal ane sembe,
tala-tala urop nimi ni An whingag yingkina omeklangkukang,”
aro sepna seplamong.
5 Neneko uro yabioba, imag tiwalengelamnoag agha Kalun Ae Allahri nimiag salag piptangtop yubu paia urop ae taneko ina kuptop wamoba, Allah omektobag Mem urobag imno. 6 Wamoba kemelamnoag agha Allah arukna malaikat saekbare tanekori nimi loba nembahineba saekbare abeneko saelbanep malaikat abeneko Allahri Mem Ae lomag taoa lanalamongba ipsino. Sindi ag enekamongnena, ag wet purum winne agha wetnerop ag sembenga orog ag, haing omom-omom urop ag agha enekamongba ipsino. Sindi saramag enekamongana, leng-lenga aroba emas agha sunuroba saramag ek wa'aneropne wanwan aro enekamongba ipsino. 7 Allah arukna malaikat saekpare abeneko Allahri Mem Aeag agha lambaongba, lebe aroba tombare Allah whingag omekto wamongne anabiag agha nhondi Allah arukna malaikat saekbare abenekoag tarel phio. Tarel phiongena, kau leng-leng aroba emas agha sunurop kau saogne saekpare tarel phio. Kau lomag taneko Allah ya'ag kamag wamlange ponekori mog so'oag nimi waro nimi loba nenero opsineba to'opto wamoba, tatsioba imno. 8 Tarelamsioba kemelamnoag agha, Allahri Mem Ae enekoag Allahringe imang wareropneap Eldi mikipneap agha, auk tobongkiploba, mhong pole saog seloa saog ulamoba imno. Nimi loba nembahineba Allah arukna malaikat abenekori payaongne abeneko anam komopto yabin komagna, nimi nhon babe Allahri Mem Ae enekoagna wa'inep kom.