Pham Domba Meap Allah Elmaboap sembe lebogha
14
1 Nimiri undo lebe arobari kekneba nongag palilamsionga ipsinori, nari kemelamnoag agha Pham Domba Me aneko lag neneptangka lebori, Sion kongtenag sekamoa imno. Elap nhon sekamong nimi ipsinongena, sindi haioghag mome El Pham Domba Meri siap, Iliri siap haioghag mome toptangtop nimi teng-tengne (144.000) sekamonga ipsino. 2 Undo sekamongba, ka'elamnoag agha imag agha lilim lelamonge ka'ebanonge mag mhun nubungeri yangkalamloba, yubu lilim leroba ane saog uro limangdi tal-talagto yubu lilim leroba ane saog uro lelamoa ka'ebano. Yubu lilim lelamoa ka'ebanonge nenekona, pingpong yubu nenerobari yubu lilim lelamoa ka'ebano. 3 Nia mangkina Saelba Uhiropne puka uroba whingag aneko, Allah arukna lebe aroba tombare wamonga whingag aneko, nubunang yubu epto wenehiropnang whingag anekoa, nimi teng-tengne 144.000 nang enekori sepna wendogne seplamong. Sindi sepna seplamong sepna enena nimi nhondi babe, “Sepna si undo lelbalamang,” aro tibin nembanep komdi, ora nimiri nelepto sepnep kom. Sinba Allahri mog so'oag nimi agha sae lopsiogti, taulbahiog nimi teng-tengne eneri agha el wamongdi, sepnep. 4 Sin nimi tanekona, kelaboag babe salehirop komdina, sin nongagna, “Nuni Allah whingag wali wamukap,” aro mali nenehiroba piptangtop kom.a Sin undo uroptina Pham Domba Me aneko tala palamnaag babe sin nelepto pirop. Nimi mog so'oag nimi ni anabiag agha sindi malia ulamangne sembe Allahri tam kom nenero kamna tobogti, sae kiliro taulbahiog. Eldi sin taulbahiogne neneag agha, sin Allahap Pham Domba Me ponekoap sembe piptangtop nimi o'omne wamong. 5 Sindi pamag orolenange lenne babe orog. Undo wamong ane sembe, nimi nhondi sinag tam pimnep kom.Allah arukna malaikat wilindi sembe lebogha
6 Nimi taneko ipsinori, nari Allah arukna malaikat nhon imnongena, im toman winang pirop saog uro palamoa imno. Allah arukna malaikat anekori yubu pabalamongena, Allah Yubu Walinge ya'ag uropne neneko, “Nimi mog so'oag urop nimiag ambatsinun,” aro pabalamo. “Ambatsinun,” aro pabalamongena, nimi winiptangto mo sektoba negara ni nimiap, nimi sisa ni nimiap, yubu a'ero-a'ero lerop nimiap, mog so'o tala-tala urop nimiap, “Sinag yubu walinge ambatsinun,” aro palamo. 7 Allah arukna malaikat anekori yubu nubu uro lelamori, “Allahag log uro wamlulom. El nubunge wamlange sembe paliag nenero kiplamlulom! Nimiri mog so'oag sa'a-sa'a uropne sembe wene Allahri tam karepto pimnual. El imap so'oap sumbaogti, mag nubu uro longorop mag sumbaogti, mag lu ni wamlange sumbaogne poneko yabu sanukto pulingkina uamupto omeklamlulom!” aro wene alamo.
8 Allah arukna malaikat samenne neneko wamoag phendepne amik yaori, yubu lelamori,
“Wene loba tal! As kaluro sorop as nubunge Babel as eneko tapto loba tal!
As Babel nimiri samen malia ulamongnena,
ina yabirop kelabori nimi sae kiliro mag yonge tebatsiro
nenek nenelamsiloa saog ulamongdi,
wana tohiro kamna sembe nengaboap ma'aptangka
malia ulamloa saog uro ulamong.
As Babel nimi nenekori as tala-tala urop nimi wana tohiro
loba nenelamsiongba, Allah wailag nembamong.
Aghana wene as Babel neneko loba tal!”
aro wene alamo.
9 Allah arukna malaikat phende abeneko wamdongag, wilindipne neneko yaori, yubu nubu uro lelamori,
“Nimi etneri lebe aroba anekoap, el lebe aroba maghag agha lanaropne yame sunumna nimi saeri sunuroba anekoap omekto yabu sanukto kiplamleri, lebe aroba anekoringe kekneba eldi haioghag to, eldi saeag to, toamle tanena, 10 Allahri yo senenne nimi enekori eldamneag apto piptangkamlul. Allahri undop nimi waro obahinepne nenekona, nimiri anggur mag yo mag salinge ma'aban komne mag ma'i lomag ikto piploa saog uro, lebe aroba neleptop nimi sembe Allahri sinag yo aghabog ikto pelengahileri, obahilul. Nimi eneko seklenne seklebalulnena, Allah arukna malaikat sol walinge whingag babe, Pham Domba Me whingag babe, aukag tapto song mali auk singina ibya ua urobag agha seklena seklebalul. 11 Auk mhong nimi taneko seklenne seklebaukangne mhong kukto walelamle paghabog wamlul. Sindi lebe arobaap, el yame sunumna saeri sunurobaap omekto yabu sanukto kiplamikti, lebe aroba anekori kekneba nongag tobik tanena, sin seklebaiknena, inipna kwelekna seklena seklelamik paghabog seklelamukang,”
aro wene alamoa ka'ebano. 12 Ane sembe, Allah Elmabo weptopne wamapne Eldi aruktop yubu kas mi agha salelameberi, Yesusag tapto wana saingnia seneraglamukap. Seklenne wamleba, wana phik wengero kom-kom aingniamleba, seklena babe seklelapmundi, khapto wamlulom.
13 Nari yubu imag agha lelamonge ka'ebanongena, “Yubu nene mome tobe: Weneag agha nimi etne Nu Saelbamsilne ponekoap ma'aptangtop nimi agha tebaik tanena, sin wana yeng uro wamukang,” seo.
Wene seoba, Allah Yame Walingeri samoro lelamori, “Otsik. Tebaikpa, sin Saelba Uhiropne poneko sembe samenag kilim weanga awe tolamangne sinap nhon Imagne whingag lag talul. Ane sembe, tebaik sum eneko sindi awe tolamangne libikti, tek-tek papto wali wamukang,” aro yubu lelamoa ka'ebano.
Yohanesti, “Wana mauropne mog so'oag agha wana taglamloa saogne imno,” seogha
14 Undo uro yabioba, kemelamnoag agha toa solomne lag tao. Toa solomne alibag aneko imag uropne mog so'oag nimi taogne saogha nhon pukamo. Eldi usoghag aneko paliag tangtop nimiri kwiria elengkamongena leng-leng aroba emas agha sunuropne elekamo. Eldi saeag saelbamoana, karog si yonge kwanektopne agha kwaneng roti yo'o karepto yongorop karog agha saeag saelbamoba imno.
15 Imnori kemelamnoag agha, Allah arukna malaikat nhon Allahri Mem Aeag agha lanaptangka lanaltogho. Lanaptangkom agha lebori yubu nubu uro El toa alibag pukamonge enekoag, “Wene wana whi talba, yongorop li saog wamla ane sembe, karog saelbom agha saekom-saekoma kareplamlonga saog uro sae nginikom agha mog so'oag nimi wimbahilulam,” alamoa ka'ebano. 16 Wene seoba El toa alibag pukamonge enekori karog tobom agha saekom-saekoma, mog so'oag karepto pololamoa imno.
17 Nari nen kemelamnoag agha Allah arukna malaikat nenne Allahri Mem Ae imag agha lanalamoa imno. Eldi babe yongoro tongorop karog yonge nhon saelbamoa imno. 18 Nen kemelamnoag agha Allah arukna malaikat nenne Allah sembe auk mhong towalengero tamnebag agha auk saelba urop malaikat eneko yao. Yaori, karog yonge saelbamo malaikat enekoag yubu nubu uro lelamori, “Mog so'oag haing anggur wana whi tal ane sembe, karog yonge saelbamlama ane agha mog so'oag haing anggur wana whinge tagnepne karog agha karebel pululam,” alamoa ka'ebano. 19 Wene seoba, Allah arukna malaikat anekori karog tobom agha saekom-saekoma, haing anggur wana mauamonge koag agha karepto poloro tobori, anggur wana lolterobag lang-lang aro toltoglamo. Anggur wana lolterobag anekona, nimiri anggur wana yan ingisaplamlongdi, mag loltero ikto tobongkiplamlonga saog uro, Allahri nimi yonge waro yan ingisapsileba, eneng lanaro tebaukang. 20 Anggur wana lolterobag tanekona, as kaluro sorop asag agha saeri lolterop komdi, paiag agha yan ingisapsiro loltel pirop. Anggur wana lolterop mag loltelamoba, la'inilamoana nimi eneng agha mag yabirop mag saog uro la'inilamoa palamoa imnoana, we uro tai sip nimi sa'oag walelingkiogti, yabalamoana 300 kilometer yabalamo.