Lebe aroba yonge mag longorop mag lautag agha lag taoa
13
1 Paghae sel-sel eneko mag longorop mag laut abolag sekamoa kemelamnoag agha, mag nubu uro longorop mag lomag agha lebe aroba yonge log nenehiropne lanalamoba imno. Eldi pinu yagne sao bare wamoba, tanekoagna, yubu sia lerop nimiri usoghag kwiria elektoba saobare elekamori, pinu nhonag nhon, nhonag nhon elekamo. Eldi usogna saekbare wamoa imno. Eldi usog saekpare tanekoagna, si engeroba Allah san tiliptop si engeropne eldi usog saekpare ni abenekoag mome toro paliroba imno. 2 Nari lebe aroba imno anekona, eldi nong pai kam elem uro mererop kam pai kam tutul wamloa saogne imno. Eldi yanna, nubua pai kam beruang nubu kam agha intong wandong agha norop kam saog uro norop kamdi yan saog wamoa imno. Eldi uram imnoana, kam yonge pai kam singa mikipne si ka'en saog wamoa imno. Elag mikipne taongena, paghae sel-sel anekori el saeag mikipne wamonge lebe aroba nenekoag piboba, paghae sel-sel sae taloa saog el yubu sia leropne mikipne tao. Yubu sia lero wamoba, paghae sel-sel aneko eldamneri ni mog so'o saelba uhiro yubu sia lelamloa saog, lebe aroba nenekori saelbamsio. 3 Lebe aroba el usog saekbare wamonge abeneko agha usog nhonag imnongena, usog neneko nimiri oboba, ya'ag tebanep aghana, meneng aneko kut tangkamoa, wali taloa saog meneng el usog nhonag imno. Meneng wamonge wali taoba, mog so'oag nimi ni wamloa anekori lo'om seongdi, lebe aroba nenekoag neleplamong. 4 Paghae sel-sel anekori eldi saelba unne mikipne lebe aroba anekoag taroa sembe, mog so'oag nimiri paghae sel-sel aneko omekto phalamonga imno. Sindi omekto phalamongdi yubu lelamongnena, “Lebe aroba nene wamla saognena, nhon wamla kom! Elag babe tanna mal taro luknubanep kom,” aro wene alamonga ipsino.5 Lebe aroba aneko yubu lemnep taori, eldamne sembe miptangtop yubu lelamori, Allah san tiliplamo. Lebe aroba anekoag mikipne tao andarina, hengkun wilindiap wal no'opbareap lebe aroba tanekori paghae sel-sel sae mikipne taori, mog so'o saelbamsio. 6 Lebe aroba aneko lemnep taori alnibaori, Allah Eldamneap, El si “Ya'ag Uropne” aro engerobaap san tilipna imbao.a Allah imag ua urobag babe, Elap nhon imag ua ulamangne babe san tiliplamsio. 7 Mikipne lebe aroba nenekoag taori, “Allah Eldamneri weptop mabo wea naglamsineri, oro luknulamsunun,” aro ulamori, Allah Elmabo luknulamsio. Luknulamsiori, mikipne el saeag wamongena, nimi sisa ni nimiap, yubu a'ero-a'ero lerop nimiap, mog so'o tala-tala urop nimiap, nimi winiptangto mo sektoba negara ni nimiap sembe yubu sia lelamori, saelbamsio.
8 Lebe aroba anekoag nimi ni mog so'oag urop nimiri omekto phalamukang. Sindi elag phalamik nimi ni anekona, Pham Domba Me ponekori sin sembe, “Ya'ag kamag wamukang,” aro nimi si topsin kom ane sembe, sindi lebe aroba nenekoag omekto phalamukang. Pham Domba Meri nimi kamag wamnep nimi sembe, “Ya'ag kamag wamukang,” aro nimi si toro mome nhonag mome toro pipsiog. Kamag wamnep nimi si tohirop mome nenekona, imap so'oap sumbaog sumag agha, Nuni Allahri karepto pibogti, “Amik Pham Domba Me poneko nimiri obikpa, nimiri malia ulamangne sembe tebalul. Tebalul aghana, nimi aneap, nimi aneap sindi, amik Pham Domba Me ponekoag wana saingnia seneraglamikti, ya'ag kamag wamukang,” aro el wamog. El wamogti, karepto pibogpa, nimi taneko si Pham Domba Meri mome neneag mome toptaog. Ane sembe, sindi lebe aroba yonge nenekoag phalamukang kom.
9 Aori ka'ebalomne nimi niri seneragto saelbamlulom.
10 Nuni Allahri, “Nimi nene nimiri sae kaupto pabukang,” aro karepto pipso tanena,
nimi eneko sae kaupto pabukang.
“Nimi nene mal tarop karog agha nimiri ya'ag obukang,” aro karepto pipso tanena,
nimi eneko mal tarop karog agha tebalul.
Ane sembe, Allah Eldamneri weptop mabo seklenne wamleba, wana mamleba seklena babe seklelapmundi, khapto wamlulom.
Lebe aroba so'oag agha la'iniroba lag taoa
11 Nari kemelamnoag lebe aroba yogne mog so'o lomag agha la'inilamoa imno. Eldi pinu yagne phende wamoana pham domba pinu saog wamoa imno aghana, eldi yubuna paghae sel-seldi yubu saog lelamoa ka'ebano. 12 Lebe aroba samen mag longoropne agha lanaropne nenekori el mikipne neneko lebe aroba amik so'oag agha lanaropne nenekoag piboba, mikipne neneag agha yubu tipto ambarelamsiori, “Lebe aroba samne si nubu talul,” aro amikne nenekori yepto ulamo. Lebe aroba samne samenag nimiri oboba, tebanep aghana, wali taoba lebe aroba samne nenekona, amikne nenekori yepto ulamo. Lebe aroba amikne nenekori, “Nimi ni mog so'oag wamang nimiri el omeklamukang,” aro mikip uro aruklamsiori, lebe aroba samen mag agha lanaropne yepto ulamo. 13 Lebe aroba amik so'oag agha lanaropne nenekori ulamonge, “Yaghe, mane agha ulamla,” senen kekneba nubunge maikno ulamo. Nimi ni whingag agha ulamongena, imag agha auk mog so'oag pelengelalamonge babe ulamo. 14 Lebe aroba samen mag agha lanaropne nenekori lebe aroba amikne nenekoag mikipne piboba, “Lebe aroba samne si nubu talul,” aro lebe aroba amikne nenekori, “Yaghe mane agha ulamla,” senen kekneba ulamo. Ane sembe, amikneri lebe aroba samne yubu tiplamori, “Mane agha ual,” senen kekneba ulamonge neneag agha mog so'oag nimiri orolena sik senelamong. Lebe aroba amikne nenekori mog so'oag nimi aruklamsiori, “El samenag nimiri mal tarop karogti oboba, tebanep aghana wali taonge neneko sembe, ‘Kibukap,’ aro el yame sununma sunuro sekitlulom,” aro arukahio. 15 Aruklamsioba sunulamongba, lebe aroba amik so'oag agha lanaropne nenekoag mikipne tao andarina, eldi lebe aroba samne yame sunumna sumbaongne nenekoag hain epna tarelamsioba, lebe alamongdi, yubu lelamong. Yubu lelamongba, nimi etneri yame sunumna nenekoag pharo omeklamsiong kom tanena, yame sunumna nenekori yubu leropne sunsunum uro nimi eneko ya'ag olamsiong. 16 Nimi ni nubungeap, ologneap, tup nimiap, saeagha orog nimiap, nimi arukna urop nimiap, mo sektop nimiap, “Yeng to, karong to,” senen nimi niag, lebe aroba amik so'oag agha lanaropne nenekori aruklamsiori, “A'undi sirik saeag to, haioghag to kekneba nhon pipsiikpa, wamlul,” aro arukahio. 17 Kekneba saeag to, haioghag to, palilamsiongne anena, nimi nhondi nongag lebe aroba si engeroba mome torop kekneba palilamsiongba, nimi nenne nongag lebe aroba si lunuro a'ilina mome torop kekneba palilamsiong. Nimi etne el nongag kekneba nene orog pagha tanena, nimi enekori “Tomnun,” sembaho aghana, kamna kapto tomnep kom. Apna, nimi enekori, “Pimneba, ora nimiri kamna kapto tobukang,” sembaho aghana, eldi nongag kekneba nene orog pagha tanena, eldi saeag agha babe ora nimiri kamna kapto tomnep kom.
18 Wana hekahinep yubu ane ambatnuahin! Lebe aroba si engeroba lumbanep a'ilina nenena nimiri a'iliroba wamla. Ane sembe, nimi etneri el wali uro seneragnep tanena, lebe aroba si engeroba lunuro a'ilina nenena seneraglamleri, el tanep. Lebe aroba si engeroba lumbanep a'ilina anekona: teng tomtarabare eptopne sa'otarabare (666) wamla.