Paghae sel-seldi, “Kelabo enekori me toro tenun,” aro ulamogha
12
1 Imag tiwalengelamnoag agha imag lag taongena, amik uro yabinepne sembe kekneba “Yaghe, mane agha uro yabil,” senen kekneba nhon lag tao. Kelabo nhondi el nongag enekamongena, heng agha nongag wangkamori, wal alibag sekamo. Eldi usoghag paliag tangtop nimiri kwiria elektoba elekamongena, imbrea ao bare aneko agha sunurop kwiria elekamo. 2 Keleneko memon wamoba, me mangaroanep peramdi, me mon telamonge og lelem ngolol alamo. 3 Ngolol alamoba, imag kembiagha nimiri “Huro yabilul,” senenne kekneba nhon lag tao. Imag lag taongena, paghae sel-sel nubu sirikne, eldi konna uwong wamoba, eldi usogna saekbare wamoba, eldi pinu yagnena sa'obare wamo. Eldi usog saekpare tanekoagna, yubu sia leropnang kwiria elekanepne saekpare, usog nhonag nhon, nhonag nhon elek-elek yabi amo. 4 Eldi amu eneko kepsengelamoana, ni imbrea imag wamonge palu wilindi neneptangkamong aghana, palu phende imag ya'ag wamongpa, palu wilindipne lulubom agha paghae sel-sel nenekori wenero mog so'oag pelengelamsio. Paghae sel-sel eneko kelabo me maghan telamo kel eneko whingag wamongena, me aneko mangaltole abeneko, “Me aneko toro tunun,” aro wamo. 5 Kelenekori me nengabo me mangaro ao me enekori mog so'o ni abenekoag nimi sembe yubu sia lero saelbamsilul. Nimi nubungeri salerop kame tunguna mikipne, besi agha sunurop kame tunguna saelbom agha nimi saelbamsilul. Ane sembe me aneko keleneko saeag agha Allahri pelepto kiliro tobori, Allahri “Me enekori nimi saelbamsilul,” aro El puka urobag aneko poa pio. 6 Unuaoba keleneko merea lebori, aldesag pioag aneko Allahri el sembe weroba wamoag pio. Pioag aneko el yae piamlulnena hengkun wilindiap wal no'opbareap ane yae piamlul.7 Keleneko pai aldesag pio ana, anam pin komag, imag mal taoba talamang. Allah arukna malaikat sikindo Mikhaelap, Allah arukna malaikat Mikhael umag wamongneap sindi, “Paghae sel-sel aneko luknubaukap,” aro mal talamang. Paghae sel-sel aneko babe, ilipsabo Allah arukna malaikat sikini Allah lilo uropnang paghae sel-sel sip tangtop malaikat aneko babe sindi, “Mikhael ilipsaboap luknubahukap,” aro mal talamong. 8 Mal talamong aghana Mikhaelap ilipsabo Allah arukna malaikat walingeap, sindi paghae sel-sel aneko ilipsaboap oro luknubahiong. Oro luknubahiongdi, paghae sel-sel anekoap, ilipsabo Allah liloa urop malaikatap, “Nuni Allah ua urobag imag wamlulom kom,” aro oro yagsiong. 9 Paghae sel-sel nubu phae eneko oro tobogto yag lambahiong! Paghae sel-sel nenekona, yum-yum samenag wamog phae, eldi nimi ni mog so'oag nimi haing kunuhiro “Orolena sik sembaukang,” aro ulamsiogti, ulamsilne wamla. Eldi nimi san tiliplamsilne phia sikini si Satanas engeropne wamla. Elap ilipsabo elag sip tangto Allah liloa urop malaikatap oro luknubahiongdi, mog so'oag tobogto pelengelahiong.
10 Neneko uro yabioba, ka'elamnoag agha yubu nubu uro imag agha lelamonge ka'ebano. Ka'elamnoba,
“Phia sikini nenekori nungkabo Yesusag sikne aro seneragtop nimi sembe
‘Malia ulamang,’ aro Allah whingag sop-sop san tiliptop yubu loloro teba'en nenelamsio.
Aghana, wenena Allahri phia sikini neneko tobogto pelengkao.
Ane sembe, wene ko'o eneogna Allahri Elmabo toro pipsinep ko'o wamla!
Wenena, Allahri El mikipneag agha nia mangkina saelbamsilne lag tal.
Nuni Allahri El samenag salag lero pibogne sunsunum uro
Eldi ‘Mog so'oag nimi talulamsileri, saelbamsilul,’ aro wepto poghogne Kristus poneko sembe
El saeag mikipne pibogpa, wene lag tal.
11 Nuni Allahri Pham Domba Me El saeag mikipne pibogpa, obekpa, eneng lambaoba, tebaog.
Tebaog aghana, Eldi eneng lambaogne neneag agha
Nungkabo Yesusag sikne aro seneragtop nimi tanekori
el lolorop yubu lero pibogne phia sikini neneko luknubaong.
Nungkabo tanekori, ‘Yesusti nu taulbahioba, Eldinge wamap,’ aro lag phoro lelamangneag agha
san tilipto leropne phia sikini neneko oro luknubaong.
Sindi sindam nimi sembe wana seneragtan koma
‘Omneik babe khapto wamnun,’ aro ulamong.
12 Ane sembe, a'un ni Allah imag ua urobag wamlomne, wana yeng uro wamlulom.
Aghana phia sikini aneko mog so'oag kulukulaori,
eldamne sembe elwamlangena ko'o weag uro wamnep komdi, eldi wanaag yo nubunge wamla.
Ane sembe, a'un mog so'oag ua uropneap,
mag nubunge longorop mag laut ua uropneap,
eldi wana yo senenneag agha a'un maiknoro seklebalulom,”
alamoa ka'ebano.
13 Paghae sel-sel anekori, “Na mog so'oag pelengelaneang,” aro el taori, kel nengabo me mangkao kel eneko, “Omnun,” aro neleplamo. 14 Aghana kelenekoag nubu winang abeao ol phende elag tarongpa, kel eneko Allahri el mo'obanep wea urobag, “Pai aldes saog urobag sip walero pulul,” aro tarong. Ol phende elag tarongba, Allahri el mo'obanebag pioba, paghae sel-sel anekori kel eneko opnep koma urobag hengkun wilindiap wal no'obareap wamo.
15 Undo wamoba, paghae sel-sel anekori, “Keleneko magti niknibaleba, tebalul,” aro mag nubu uro yabirop mag momagto phoaro kelenekoag sip ebo. 16 Aghana Allahri keleneko yeplamo abeneko pere, mog so'o sia'aro lelamlo saog ulamori, paghae sel-sel nenekori mag momagto phoaro ebonge neneko mog so'o selenga timbao andarina, magti keleneko obo kom. 17 Ane sembe paghae sel-sel anekori kelenekoag yo sembao. Kelenekoag yo sembaori, pina lebori, kelenekori nimi sisa nimi ol pihio. Kelenekori nimi sisa nimina, Allahri aruktop yubu leropne sael ul pirop nimiri Yesusag “Sikne agha lelamog” aro seneragtop nimi wamangpa, paghae sel-sel nenekori sin ol pihio. 18 Ol pihiori, paghae sel-sel eneko mag longorop mag laut abolag sekamo.