Allahri yubu silimu tiptop nimi phende ipsiogha
11
1 “Ambarelamsululam,” aro arukaneoba ka'ebanoba, nanag tatneonge, ae soropne porog o'obaneba luna saogne nanag tatneo. Tatneori, nanag yubu lelamori, “Sekmendi Allahri Mem Ae soroba nubunge sunul pululam. Allahri Mem Ae tanekoag Allah sembe pail pina aukag tarobag babe nubu uroba sunul pululam. Sunul pimendi, Allahri Mem Ae tanekoag Allah omektop nimi wamangne babe a'ilbahilulam. 2 Ot andi Allahri Mem Ae sunulapmenneag agha, Allahri Mem Ae aramag abolag sipna sunul piheng kom. Allahri Mem Ae aramag abolag sip mog so'o tanekona, Allah omektop kom nimi sembe wa'inebag liro pipsiog, ane sembe mog so'o nene sunuro a'ilbaheng kom. Sin Allah omektop kom nimiri as eneko luknuro ingkina saelbamika, hengkun wilindiap, wal no'opbareap Allah El Mori as soro kalurop as walinge aneko ingkisaplamukang. 3 Allahri as kaluro sorop as neneko ingkisaplamukang aghana Allahrina, ‘Nari yubu tiptopnang phende abenekoag yubu tatsinenge hengkun wilindi nen ma'aro wal no'opbare tipto ambarelamsurukang. Nari yubu silimu tipto ambarelamsiriknang abenekori sindi wana ikin uro senenne agha ag malinge wangkarikti, Nari yubu silimu tipto ambarelamsurukang,’ seo,” aro ambatneo.4 Sin Allahri yubu silimu tipto ambatsiropnang phende abenekona, kal wana zaitun maurop kal yo'o phende abeneko wamdang.a Sin phende abenekona, auk pog tiniro iktoba yan phende Allah imap so'oap saelba uhiropne whingag sekamdongne abeneko wamdang.b 5 Nimi etneri, “Sin abeneko opsukap,” aro ulamsiik tanena, Allahri karepto pibognena, “Sin abenekori pamag agha auk lanalamleri, sin aisa neneptangtop nimi eneko opsilul,” aro karebaog. Ane sembe sik undo uro yabilul. Nimiri, “Sin abeneko opsukap,” aro ulamsiik tanena, sin abenekori “Nu aisa neneptangtop nimi opsununam,” aro pamag agha auk lanaropne ulamdikpa, nimi taneko aukti tehilul. 6 Allah yubu tipto ambarelamsirik ko'o enekoag Allahri sinag mikipne pipsio andarina, mag imag agha kulukulanepne sindi yubu leptikneag agha kom taleba, mag timbalul kom. Allahri mikipne sin phendenangag pipsionge neneag agha, mag luap mag longorop magap ni wamlange sin abenekori eneng agha nembanep. Allahri mikipne sinag wamla andarina, sindi wanaag seneragna sunsunum uro, “Undo-undo ulamnemeba, mog so'oag loba nenehiroba nhon sao, nhon sao uro yabilul,” senenne sunsunum uro sik talul.
7 Sin abenekori Allahri yubu silimu tiplamdikne komopto ambatsirikpa, lebe aroba selenga anekoag agha yalenge nenekori sinap mal talamukang. Mal talamukang aghana, lebe aroba yonge nenekori sin abeneko oro luknubahileri, ya'ag olopsilul. 8-10 As kaluro sorop as nubunge wamdikag tanekona, samenag sikin Saelba Uhiropne poneko babe nimiri el sae kaupto kalag sipto obekpa, amik babe lebe aroba nenekori sin abeneko luknuro opsileba, as anekoag inaag tebarika maloamtukang. As kaluro sorop as nene likiptop yubuag nimiri engeropnena, Sodom to, Mesir to, aro engerop. Sin tebarika nong teptoba abeneko as kaluro sorop as nubunge tanekoag ik wilindiap pogtop sumap ina pirobag agha mo teploamtukang. Allahri yubu silimu tiliplamdik nimi abeneko anam teban koma, sin abenekori ulamdikneag agha, mog so'oag urop nimi maiknoro seklelamukang. Ane sembe sin aisa neneptangtop nimi mog so'oag wamik nimi tanekori, “Sin abeneko tebarangne wali,” aro wana awi uahileba, sani yoro wana wali neneltana amoptangto tareltalamukang. Nimi sisa ni nimi anabiag agha, yubu a'ero-a'ero lerop nimi ni anabiag agha, mog so'o tala-tala urop nimi ni anabiag agha, nimi winiptangto mo sektoba negara ni nimi agha, sindi nong teptoba abeneko kemehiro wana awi wamukang. Sin nong teptoba abeneko kemelamsiikti, “Nong teptoba abeneko so'oag sikil ahiseng kom,” aro iriklamsiikpa, nong teptoba abeneko inaag agha wamtukang.
11 Ik wilindiap pogto sum enekoap teptoba abeneko inaag mo wamdik aghana, amik uro yabilulne sembe imnonge ane. Allahri Eldi yubu silimu tiptopnang abenekoag hain epna phoaro tobongkipsioba, kamag tarong. Allahri sin abeneko kamag nembahioba, sin sektongpa, sin ipsiong nimi taneko log maikno uahio. 12 Allah yubu silimu tiptop nang phende abeneko sektongpa, yubu nubu uro imag agha sin yoplamsioa ka'ebarongne, “Ane walelarurom!” alamoa ka'ebarong. Sin aisa nenehirop nimi whingag agha sin abeneko imag walelamdongpa, toari niknibahio.
13 Walelamdong abeneko sa'uma nubunge ulamori, ae soroba as enekoag wamonga maiknoro loba tao. Ni ae soroba as enekoag wamongne ma'abi agha pogto sa'obare neneptan tanena, ae pogtopne supnabare kwerektao kom aghana, ae pogtopne sa'onge kwerektao. Sa'uma nubunge ulamo abeneko pere nimi teng-tengne (7.000) nimi sa'uma anekori ya'ag opsio. Undo opsioba, nimi nenne kamag wamong aghana, Allah imagne nubunge sembe sin log lelem, “An mikipne wamlam,” aro Allah paliag nenero kiplamonga ka'ebanori, imno.
14 Nimi sekleroba phendepne neneko uro yabioba, imno. Aghana, kembamlulom! Nimi sekleroba ik wilindipne uro yabinual.
Mag ma'i trompet saekneag Allah arukna malaikatti pho aro yubu lebogha
15 Nari kemelamnoag agha, Allah arukna malaikat saekne nenekori eldi mag ma'i pho alamo. Pho alamoba, ka'elamongba imag agha yubu nubu uro lelamongdi,
“Wene mog so'oag nimi sembe yubu sia lenne nhonogne, ot Nuni Allah Eldamneri yubu sia lelamla.
Mikipne nene Eldi saeag agha wamlaba, Eldamneri ‘Nimi saelbamsilul,’ aro wepto poghogne Kristus ponekoag ni saeag nembaog.
Nuni Allahri Kristus poneko saeag pibogpa, yubu sia lero ya'ag uro saembamsile paghabog wamlul,”
aro haum aro lelamong.
16 Wene alamongba, yubu epto wenehiropnang tom tarabarenang Allah whingag pukamongnang taneko sikin nubunang puka urobag agha kulukulaongdi, yabu sanukto uamupto malingkina Allah omeklamong. 17 Allah whingag uamupto malingkina omeklamongdi,
“Nuni Allah Mikip Phelektopne im so'o ngainge wamlam.
Yum-yum samenag babe im so'o ngainge wamlum aghana,
wene Andi mikip phelektopneag agha
alniro ya'ag uro yubu sia lelamlamdi, saelbamsilam.
Ane sembe ‘Nuni, wali saelbamsilam,’ aro kiplangkeap.
18 Nuni Allah omektop kom nimiri wana yo senenne agha yanghang alamsiong,
aghana wene Andi sin sembe wana yo senero opsinep.
Wenena, nimi ni teptop nimiri samenag ulamekne sembe Andi tam porog uro kareptop sumeneko wene wamla.
Wenena, Andi arukna Andi yubu silimu tiptop nimi tanekoap,
Andi weptop mabori An omekto kiplangkeang nimi tanekoap,
ologne nubunge wene Andi kamna tatsilulam.
Aghana, mog so'oagne loba nenehirop nimi sembe wene loba nembahilulam,”
aro Nuni Allahag omekto yubu lelamong.
19 Undo uro yabioba, imnoba, Allahri Mem Ae imag wamlange ina siram kuptao. Kuptaoba, ae lomag imnonge, Allahri Musaap Israel nimi sembe salag piptangtop mome neneko pia urobag imno. Pia urobag nenekona, kabong saog uropne soropba lom nenekoag salag piptangtop mome neneko wamlange, kabong neneko lag taoba, imno. Lag taoba, lepna tingom-tingom alamoba, limang talaglamoba, yubu mu alamoba, sa'uma ulamoba, kirik wana saog luli wana imag agha kuluklamonge nubunge telamoba, imno.