Allah arukna malaikat nhondi mome toro pairopne wa'amogtoba ologne Yohanesag imag agha tarelaogha
10
1 Nari tiwalengelamnoag agha, Allah arukna malaikat yogne mikipne imag agha kulukul alamoba tiwalengkano. El kulukul alamonge nongag toa eneklamloa saog wamoba, toari nikniamoba, eldi usog alibag mano yame wiriktangtoba tiwalengkano. Eldi whingna heng tingiropne saog wamoba, eldi yanna aeoghag auk pog tag-tagha singilamloa saogne wamoba tiwalengkano. 2 Eldi saeagna, mome toro pairopne wa'amogtoba ologne saelbamoba, mome eneko eldi saeag sangaro wamoba, imno. Eldi sirik yanna mag longorop mag sin nubunge lautag ingkamori, waneng yanna abolag mog so'oag ingkamoba imno. 3 Undo sekamori, eldi yubu haum aro lelamongena, pai kam singari kau arop saog uro nubu uro haum alamoba ka'ebano. Allah arukna malaikat anekori yubu wene aro haum seo tanena, limang yubu leroba ik saekbare samoro elag taltalang alamoa lilim ka'ebano. 4 Limang yubu leroba ik saekbare taltalang alamoba, nari mome tomnun aro ulamnoag aghana, nari imag agha yubu lelamonge ka'ebano. Yubu lilim neneko ka'ebanongena, “Limang saekbare abenekori yubu taltalagto alamangdi, yubu lebangne abenekona mome toro pimna koma tognoamlulam,” alamoba ka'ebano.5 Allah arukna malaikat yan tara mag longorop mag sin nubunge lautag ingkamori, yan tara abolag ingkamoba imno malaikat anekori, eldi sae sirik sae imag sae towalengkamoba imno. 6 Undo sekamoba, imno malaikat anekori, Allah ya'ag kamag uropne, El imap, so'oap, mag longorop mag lautap, nia mangkina teng han-hanna wamlangeap sumbahiogne poneko yobo. Yoplamori, salag lelamori, “Nani, lemnuanne ka'ebalulam. An el wamlamne, nari yubu sikne agha lelamna. Nen ta'ap wamna koma wene uro yabinep! 7 Samenag Allahri, ‘Uanun,’ senenne Eldi arukna yubu silimu tiptop nangag ambatsiog aghana, tognoroba saog wamog. Samenag Allahri tognoroba sinag ambatsiog aghana, ko'o we uro wamna komag Allah arukna malaikat saekne nenekori mag ma'i pho alamleba, Allahri tognoroba ambatsiogne sunsunum uro yabilul,” aro salag lero pibo.
8 Imag agha yubu lelamoba ka'ebano yubu enekori nanag nen yubu lelamoba ka'ebano. Eldi nanag lelamongena, “Pimendi, Allah arukna malaikat yan tarana mag longorop maghag ingkamlari, yan tarana abolag ingkamlaba, iplam malaikat eneko pimendi, eldi saeag saelbamlange mome toropne wa'amogtoba sangaropne neneko tol pululam,” alamoba ka'ebano.
9 Wene seoba pinori, “Mome toro pairopne wa'amogtoba ologne aneko tatnululam,” aro molbano. Wene aro molbanoba eldina, “Topmendi tululam. Topmendi temenba, andi mon lomagna og seklebalulam aghana, andi pamagna pondog mag saog uro emem sekelul,” seori ambatneo.
10 Wene seoba, nari eldi saeag agha mome toroba ologne neneko tomnori teno. Pamag telamnoagna pondog mag saog uro emem alamoba, teno aghana, menaghanoag mon lomag og uaneo. 11 Tenoba eldi nanag arukaneori, “Allahri amik uahilulnena, ambarelamsululam. Nimi sisa a'ero-a'erop nimiap, mog so'o tala-tala wamang nimiap, yubu a'ero-a'erop yubu lerop nimiap, yubu sia lerop nimi nubunangap Allahri sinag uahilulne sembe Allahri yubu silimu tiplapmendi, ambarelamsululam,” aro arukaneoba ka'ebano.