9
1 Allah arukna malaikat lamne ponekori eldi mag ma'i pho seoba, kemelamnoag agha imbrea nhon imag agha so'oag timbao imbrea imno. Imagne nhondi ina kupna nhon imbrea enekori saeag taroba, saelbamoba imno. Ina kupna eldi saeag nembaongena, selenga nimiri we sumbanep kom selenga ina kupnepne eldi saeag nembaoba, saelbamo. 2 Imbrea enekori selenga nimiri we sumbanep kom selenga neneko kuboba, aneko toman agha auk mhong imnonge, haosin nubungeag agha auk loloropba, auk mhong inibin tu alamo saog auk mhong walelamoa imno. Mhong selenga aneko agha walelamonge nenekori hengap imap inipto lililoboba imno. 3-5 Mhong aneko warelamo abeneko pere wheng mog so'oag kulukul alamongba ipsino. Wheng tanekoag, “Pongoroba babe, kal babe, meroba babe, a'undi tero loba nembaheng kom,” aro sinag pat pipsio. Pat pipsioba, wheng taneko mikip tahiongena, whengdi nimi si sapsiikpa, seklebaikne sanga yongeri si sapsiroba saog seklebaukang. Wheng tanekoagna, “A'undi ualulom,” aro ambatsio nena, “Allahringe kekneba haioghag kekneba noptop kom nimi agha sare nelepto opsululom,” aro ambatsio. “Opsululom,” aro ambatsio aghana, wheng tanekoag Allahri iriklamsiongena, “Whengdi nimi olamsiikpa, teban koma seklelamukang. Seklelamikne neneko wal lambare undo uro yabilul aghana, wheng tanekori nimi olamsiikne agha nimi tebukang kom,” sembaori iriklamsio. 6 Whengdi nimi olamsiik ko'o nonokoag, nimiri senennena, “Wal lambare abenekoag nu olamsiangba, wali tebanun,” senelamukang. Sindina, “Nu wali tebaukap,” senelamukang aghana, sin sembe tepnange weag wamlul.7 Wheng taneko kembiag agha, mal tarop pham kuda saog wamo. Nimiri “Mal tabaukap,” aro wea uro, “Pham kuda alibag pukamneri, nimi sarekarepto opsinun,” aro pham kuda nong nenekoag seng enekatsilong. Pham kuda nong nenekoag seng enekatsilong saog uro, wheng neneko kembiag agha undo saog wamo. Whengdi usog alibagna, leng-leng aroba kamongkai saog kwiria elektoba saogne wamo. Sindi whingna nimi whing saog wamoba imno. 8 Sindi hongna, kelabori hong waronne saog wamo. Sindi sina, pai kam singa si yonge saog wamoba imno. 9 Wheng tanekori saramag lelem to'optangtobana, seng kat sirikne eneklamong saog uro lelem toptangtop. Wheng tanekori olngendi yubu lilim lerobana, pham kuda maiknori kereta kililamnaba, mal tal piropa lilim leroba ane saog lilim lerop. 10 Sindi amuna sangb amu saoghari sapsirop. Sindi amu eneko yag uropti wal lambare ane mikip uro nimi ohiropne agha nimi seklelamonga imno. 11 Wheng taneko sikini yubu sia lenne nhon uropti eldi sinag yubu sia sinag pabhiro lerop. Yubu sia pabhiro leropne ponekona selenga urobag saelba uhiropne nenekori sinag aruksirop. Eldi si Ibrani yubuagna Abadon; Yunani yubuagna Apolion. Eldi si ene sembe, “Loba nenehiropne,” aro engerop.
12 Loba nenehiropne ponekori wheng arukahioba, nimi opsio abeneko pere sekleroba selekne aro engeropne uro yabioba, imno. Yabioba imno aghana, sekleroba phendepne yanualba, sekleroba wilindipne babe amik yalul. 13 Neneko uro yabioba, Allah arukna malaikat no'opne ponekori mag ma'i pho seo. Pho seoba, ka'elamnoag agha, yubu lelamonge Allah sembe pairo auk mhong towalengero tamnebag agha ka'ebano. Allah whingag anekoa leng-leng arop emas yangaroba Allah sembe auk mhong towalengero tamnebag wamogpa, ingkis tombare nenekoag pinu yagne tombare wamogne nenekoag agha, yubu lelamonge ka'ebano. 14 Yubu enekori Allah arukna malaikat no'opne ponekoag yubu lelamori, “Allah arukna malaikat tombare mag nubunge Efrat inag sae haing kaupto wamangne abeneko sae lopsululam,” alamoa ka'ebano. 15 Wene seoba, Allah arukna malaikat abeneko sae lopsio. Allah arukna malaikat sae kauptoba agha sae lopsiongena, Allahri samenag, “Ot heng ko'o neneag, sumene sum, wal neneag, hengkun eneag amik sae lopsineba, nimi mog so'oag nimi maikno opsilulom,” aro tam karepto pibog. Eldi samen karepto pibogne sunsunum uro Allahri poglamsiori, “Nimi ni mog so'oag wamangne ma'abi agha palu wilindi neneptahin tanena, nimi palu phende opsiseng kom aghana, nimi palu wilindipne ni ya'ag opsululom,” aro pogto sae lopsio. 16-17 Sae lopsioba, nari haing uamna kwelekamna senenag agha ipsinonge, pham kuda nimi alibag puka urop pham tanekoap, nimi pham kuda alibag pirop nimi tanekoap teng-tenga ipsino. Pham kuda alibag poa phirop nimi mal tarop nimi ililamsinoba, sin nimi teng-tengne wamonga nimiri a'elbahinep kom aghana, “Dua ratus juta nimi wamang,” aro yubu lelamonga ka'ebano. Pham kuda alibag puka urop nimi tanekona, sindi saramag besi agha sunuroba seng enekamongne, seng auk wana saogne seng uwongne ipsino. Seng enekamongne neneko, halubil saogneap, kamongkai pun saogneap seng enekamong. Pham kuda tanekori usog ipsinoana, pai kam singari usog saog wamongpa, sindi sika'enag agha la'inilamoana aukap, mhongap, auk song malinge ibyaap la'inilamoba ipsino. 18 Pham kuda tanekori sika'enag agha aukap, mhongap, ibyaap la'inilamo andarina, nimi maikno tebaong. Nimi ni mog so'oag urop nimi ma'abi agha palu wilindi neneptan tanena, nimi palu phende teban kom aghana, aukap, mhongap, ibyaapti nimi palu wilindipne maiknoro ya'ag opsionga ipsino. 19 Pham kuda tanekori sika'eanag agha la'inilamori, nimi ya'ag opsiong aghana, sindi mikipne usoghag babe, amuag babe wamo. Sindi amuna, phae saog urop usog pomaghag sip wag la'arop. Amu tanekori nimi olamsiongpa seklelamong.
20 Nimi olamsiongne neneko, nimi ni ma'aro palu wilindi neneptan tanena, nimi palu phende tebaong komba, pham kuda tanekori nimi palu wilindipne ni ya'ag opsiong. Aghana nimi tebaong kom nimi tanekori malia ulamongdi, phia phalamongne lipsiong kom. Sin kamag urop nimiri tipto phia phalamongdi, nimiri saeri sunurop mema phalamong. Mema sunuroba leng-leng aroba emasap, lengana solomne perakap, besi uwongne sunurobaap, kirikap, kalap, agha mema pharoba sunulamongdi, phia phalamong. Nimiri mema sunuroba ni tanekori sa'a-sa'a imnep komdi, ka'ebanep komdi, yabinep kom aghana, mema sunuroba nenekoag agha mog so'oag nimiri tipto phia phalamong. 21 Neapna sindi sop-sop malia unulamongne taneko lipsiong koma, nen tipto nimi ya'ag olamsiongdi, phia si lerop miliag agha lelamongdi ulamong. Kelabo nengabo salik-malik uro waleptangamongdi, haogha tolamsiong. Nia malia ulamongne neneko lipsiong komdi, Allahag saombaong kom.