Mome wa'amogtoba sae werero kekneba saekne kologhaoa
8
1 Pham Domba Me anekori mome wa'amogtoba sae werero kekneba saekne optenaptopne neneko kologhaoba, imag taneko yubu lilim nhon orog wamoba, heng ko'o olog pio. 2 Heng ko'o olog pioba, nari kemelamsinoag agha Allah arukna imagnang malaikat saekbare abeneko Allah whingag sop-sop sekamong malaikat ipsinoba, mag ma'i pho aroba trompet saekbare Allah arukna imagnang malaikat saekbare abenekoag tarelahio.3 Tarelahioba Allah arukna imagne mailakat nenne lag tao. Eldi saeag emas agha kau sunuroba Allah sembe mhong song walinge taroba kau payaori, Allahag mhong towalengero tarobag aneko sekamo. Eldi saeag payaongena, Allah sembe taro mhong song walinge tamneba maiknoap, Allah Eldamneri weptop mabo niri Allahag molona molorobaap eldi saeag taoba, “Allah sembe pimnun,” aro kau lomag payao. Nimi nubunge saelba uhiropne puroba whingag sip payaori, Allah sembe auk mhong towalengero tamnebag aneko pailaong. 4 Allah Eldamneri weptop mabo niri Allahag molona moloropne ni anekoap, emas agha kau sunuroba Allah sembe mhong song walia taroba anekoap Allah arukna malaikat saeag payaongba, mhongap molona moloropneap Allah whingag walelamo. 5 Walelamoba Allah arukna imagne malaikat anekori Allah sembe mhong song walia taroba kau aneko tobori, Allah sembe pailpirobag agha auk wana tobori, taroba kau lomag aneko tolongkia mog so'oag pelengelobo. Mog so'oag pelengelobo abeneko pere lepna tingo-tingo alamoba, limang altara alamoba, sa'uma mog so'o lologlamo.
Mag ma'i pho aroba trompet yubu lilim leboa
6 Neneko unuaoba, Allah arukna malaikat saekbare abenekori mag ma'i pho aroba trompet saelbamongne taneko “Pho sukap,” aro ulamong.
7 Allah arukna malaikat selekne nenekori mag ma'i pho seoba, luli wana imag agha kulukulan aloghoba, auk pogap enengap ma'aro mikip uro mog so'oag kulukulan alogho. Kulukulan aloghoba, mog so'o ni wamlange agha so'o pogtoba wilindi neneptan tanena, pogtopne phende mali tao kom aghana, pogtopne wilindipne aukti tero kom tao. Mog so'o pogtopne wilindipne kom taongena, ni kal pongoropne mog so'oag wamonge babe, pongoroba erenne ni wamonge babe ma'abi agha pogto wilindi neneptan tanena, pogtopne phende mali tao kom aghana, pogtopne wilindipne aukti tero kom tao.
8-9 Allah arukna malaikat selekne nenekori pho seonge unuaoba, phendepne nenekori mag ma'i pho alamoba, nubua auk telamloa saogha, kemenagna yim nubunge auk telamloa saogha mag nubu uro longorop mag lautag tobogto pelengeloboa imno. Tobogto pelengeloboba ni mag nubu uro longorop mag laut eneko pogto wilindi neneptan tanena, pogtopne phende mali tao kom aghana, wilindipne nenekoag mag longorop mag lautag lebe aroba ni wamloa abeneko agha ni teplobongpa, mag eneng aghabog to'op tao. Nimiri mag alip toman pabirop kabong nubunge ni wamangne neneko babe ma'abi agha pogto wilindi neneptan tanena, pogtopne phende mali tao kom aghana, wilindipne ni kom tao.
10-11 Allah arukna malaikat phendepne ponekori pho seonge unuaoba, wilindipne ponekori mag ma'i pho alamongena, imbrea nubunge si “Imbrea Sekne” aro engeropne auk pog tag-tag alamongena, whea saog uro auk pog tag-tag alamonge imag agha tinil alamo. Imbrea mog so'oag tinil alamonge nenekori mag yabirop maghap mag lu wamlange abenekoap niknilingkio. Mag niknilingkiona, ni mag yabirop maghap, ni mag lu wamlange abenekoap ma'abi agha pogto wilindi neneptan tanena, pogtopne phende mali tao kom aghana, wilindipne nenekoag niknilingkio. Niknilingkioba, mog so'o ingkis anekoag mag yabirop maghap, mag lu abenekoap sek mag aghabog tao andarina, nimi sek mag eneko teong nimi agha nimi maikno teplobong.
12 Allah arukna malaikat wilindipneri mag ma'i pho seonge unuaoba, tomne ponekori mag ma'i pho seongena, hengap, walap, imbreaap pogotoba lulubaloa saog uaoba, tibin warea unne pogtoba orog tao. Heng yo'obi sop-sop heng warelamla ko'o nene agha pogto wilindi neneptan tanena, heng ko'o pogtopne phende warelamo aghana, heng ko'o wilindipne warelamo kom. Inipnag tibin warea uropne nene agha babe pogto wilindi neneptan tanena, pogtopne phende warelamo aghana, pogtopne wilindipne inibin aghabog tao.
13 Allah arukna malaikat saekpare nene agha, tombareri mag ma'i pho seongne unuaoba, nari kembanoba, winang abeao winang alikin toman palamoa imno. Im toman palamo abeneko pere yubu nubu uro lelamonge ka'ebanongena, “Sekleroba! Sekleroba! Sekleroba! Allah arukna malaikat wilindi abenekori mag ma'i pho alamik tanena, nimi ni mog so'oag wamangne sik uro seklebaukang,” aba palamoa ka'ebano.