Nimi kekneba sindi haioghag lag tangtop nimi teng-tenga Yohanesti ipsiogha
7
1 Neneko uro yabioba, kemelamnoag agha Allah arukna imagnang malaikat tombare mog so'o ingkis sunuro seksek yabilamonga ipsino. Sindi phoana mog so'o ingkis sunuro phoana yalamonge abeneko “Pho seleag,” aro sale-sale yabiamong. Andarina mog so'o mektopneag pho alamongeap, mag longorop mag laut maghag sip pho alamongeap, mog so'o kal ua urobag pho alamongeap abeneko pho alamo kom. 2 Undo saelbamongpa, kemelamnoag agha Allah arukna malaikat nenne heng walelingkirobag siba lag talamonga ipsino. Allah arukna malaikat anekona, Allah kamagne ponekori “Naringe,” aro kekneba neneroba nhon malaikat anekori saeag pibogpa, malaikat aneko yalamoa imno. Allah arukna malaikat anekori Allah arukna malaikat tombare abenekoag yoplamsio. Yoplamsio malaikat abenekona, Allahri samen, “Sindi mog so'oap mag longorop maghap loba nembaukang,” aro mikipne tatsio malaikat tombare abenekoag yubu mikip uro malaikat heng walelingkirobag siba yaonge anekori yoplamsio. 3 Allah arukna malaikat anekori sin yoplamsiori yubu lelamongena, “Nuri anam Allahri awe torop nimi taneko wepto sindi haioghag anam ‘Allahringe' aro kekneba pipsin komagna, a'undi mog so'oap, mag longorop laut maghap loba nembaheng kom,” alamoa ka'ebano. 4 Nanag ambatneoba ka'ebanongena, “Sin Allah Elmabo teng-tengne (144.000) wamang nimi taneko haioghag kekneba pipsiap,” alamo. “Nuri sindi haioghag kekneba pipsiap nimina nimi sisa ubu piamang nimi Israel aobare wamang nimi eneko haioghag kekneba pipsiap,” alamongba ka'ebano.5 Sin Israel nimi sisa aobare ubu piamangne nimi sisa wamangne neneko sunuro kekneba pipsiong nimina teng-tengne (12.000) pipsiong. Sin nimi sisa wamang aneko sunuro nimi sisaag agha kekneba pipsiong nimina:
Yehuda nimi sisag agha teng-tengne (12.000) pipsiong.
Ruben nimi sisag agha pipsiong nimina teng-tengne (12.000) pipsiong.
Gad nimi sisag agha teng-tengne (12.000) pipsiong.
6 Aser nimi sisag agha teng-tengne (12.000) pipsiong.
Naftali nimi sisag agha teng-tengne (12.000) pipsiong.
Manasye nimi sisag agha teng-tengne (12.000) pipsiong.
7 Simeon nimi sisag agha teng-tengne (12.000) pipsiong.
Lewi nimi sisag agha teng-tengne (12.000) pipsiong.
Isakhar nimi sisag agha teng-teng (12.000) pipsiong.
8 Zebulon nimi sisag agha teng-tengne (12.000) pipsiong.
Yusuf nimi sisag agha teng-tengne (12.000) pipsiong.
Apna Benyamin nimi sisag agha teng-tengne (12.000) pipsiong.
“Undo unuabo,” aro wene alamonga ambatneong.
Saelba Uhiropne Puka Uroba Whingag Nimi Teng-Tengne A'ilbahainep Kom uro Wamonga
9 Neneko uro yabioba, nen imnongena nimi maikno longoroba ipsino. Sin nimi wamongba, ipsinonge neneko nimi nhondi babe a'ilbahainep kom uro wamongba ipsino. Sin nimi ubu piamongba ipsino nimi taneko nimi sisa ni nimi anabiag agha, yubu a'ero-a'ero lerop nimi ni anabiag agha, mog so'o tala-tala urop nimi ni anabiag agha, nimi winiptangto mo sektoba negara ni nimi agha, ubu piamongba ipsino. Sin ubu piamongba ipsino nimi eneko sindi ag siliro pelengka urop ag solom ag aghabog wangkamong. Solom ag wangkamongdi, pilibu koap, tol koap, yahae koap sale-sale pina nimi nubunge saelba uhiropne puka uroba pukamonge ponekoap Pham Domba Meap abeneko whingag sekamongba ipsino. 10 Sin abeneko whingag sip sekamongdi, yubu mikip uro haum alamongdi,
“Saelba Uhiropne purobag wamlange Nuni Allah poneko
El aghari nu mog so'oag nimi taulbahio.
Nu mog so'oag nimi taulbahiropne Pham Domba Me poneko,”
alamongba ka'ebahino.
11 Sin ni Allah arukna malaikat wamongne sekongdi, nimi nubunge saelba uhiropne puka urobaap, nimi nubunang yubu epto wenehiropnangap, lebe aroba tombare wamongne abenekoap kanero sekong. Allah arukna malaikat wamongne taneko saelba uahiropne puka urobag pukamonge poneko saramag yingkina yabu sanukto haiog so'oag sip paiamongdi, Allah omeklamong. 12 Sindi Allah omeklamongdi lelamongnena,
“Sikne agha Allah omekto lebang.
Nuni Allah paliag wamlange wana hektopne poneko nubu nenero omeklamap.
El mikip wamlari nia mangkina Eldi saelbamla.
Eldi nunag ulamlange sembe nuri omekto kiplamebenge neneko lo'oe tanep kom.
Wamle paghabog wamlul.
Nene sikne agha lelamap,”
aro wene alamong.
13 Wene alamongba, nimi nubunang yubu epto wenehirop nimi tomtara bare abeneko nhondi nanag hailamneori, “Ag solom ag siliro pelengka urop ag wangkamang nimi tanena et nimi? Asna tala nimi agha yaang?” aro haibaneo.
14 Wene aro haibaneoba narina, “Nai nana ekon. Nai an agha elwamlamdiog,” seno.
Wene senoba, eldi lelamori, “Nimi tanena seklenna nubu uro seklelamong ko'oag agha sae kiliptaong nimi. Sindi ag wangaro pelengka unnag a'elbaongdi, Pham Domba Me enengag agha sin ag solomne wangarop nimi neneptaong. 15 Ane sembe sin Allahri nia mangkina saelba uahiropne puka uroba whingag ua ulamangdi, sinag kweleknag Allah Eldamneri Ae Mem Aeag Allah sembe awe toro omeklamang. Awe toro omeklamangba, El saelba uhiropne puka urobag pukamlange ponekori sin toro pelebahileri, sinap nhon wamukang. 16 Sin nen kwaneng mag yo sembaukang kom. Sin heng bobori babe, auk bobori babe seklebaukang kom. 17 ‘Nen seklebaukang kom,’ sennena, Pham Domba Me nimi nubunge saelba uahiropne puka uroba peramag wamlange ponekori sin piamsilul. Sin piamsilengena, nimi walinge eldi pham domba o'ona senero yae paiamsiloa saog uro Pham Domba Me ponekori Eldam nimi yae paiamsilul. Eldi poa lepsileri, mag lu walinge nimi kamag nenerop mag lu enekoag poa philul. Poa phileri, sindi hail mag timbahionge ni aneko sembe Allah Eldamneri sindi hail mag lupsileba, nen seklebaukang kom,” aro ambatneo.