Mome wa'amogtoba sae werero kekneba Pham Domba Me ponekori kologlamogha
6
1 Neneko uro yabioba, kemelamnoag agha mome wa'amogtoba sae werero kekneba saekbare wamongne taneko agha Pham Domba Me anekori samenagne nhon kologhaoa imno. Kologhaoba ka'elamnoag agha lebe aroba tombare samen imnonge abeneko nhondi yubu limang yubu saog lelamoba, “Yae,” aro yoplamonge ka'ebano. 2 Wene alamoba, nari kemelamnoag agha pham kuda solomne nhon sekamoa imno. Pham kuda alibag pukamo nimi eneko yin saelbamoba, nimi paliag tangtopne usoghag kwiria elektoba nimi nenekori usoghag kwiria elekiamonga imno. El palamonge neneko, “Nimi mal talamnari, nimi oro luknubahinun,” aro wea piropne saog uro palamoa imno.3 Neneko uro yabioba, kemelamnoag agha sae werero kekneba phendepne neneko Pham Domba Me anekori kologhaoba, kemelamnoag agha lebe aroba samen imnonge phendepne nenekori yubu lelamori, “Yae,” alamoa ka'ebano. 4 “Yae,” alamoba pham kuda nenne nhon nen lambao. Lamba yao pham kuda aneko eldi kon hongna uwong pham agha lambao. Lamba yaoba, pham kuda eneko alibag pukamo nimi enekoag mikipne tao. Mikipne elag taongena, “Nimiap-nimiap ma'aptangto aingniro uropne neneko mog so'oag agha kom nembale andarina, nimiap-nimiap loba nenepdalamukang,” aro elag mikipne taoba, yao. Ane sembe nimi enekoag mal tarop karog nubunge elag taroba, yao.
5 Nen kemelamnoba, sae werero kekneba wilindipne neneko Pham Domba Me anekori kologhaoa imno. Kologhaoba ka'elamnoag agha lebe aroba samen imnonge wilindipne nenekori yubu lelamori, “Yae,” alamoba nari kemelamnoag agha pham kuda mirin pham lag tao. Lag taoba, pham kuda eneko alibag pukamo nimi enekori saeag saelbamo ana, “Ikinaba undo wamla,” aro kembiagha el nenehiroba eldi saeag saelbamoba imno. 6 Nari yubu lilim nhon ka'ebanongena, lebe aroba tombare samen imnonge taneko anabiag agha yubu lelamoa ka'ebano. Yubu enekori pham kuda alibag pukamo nimiag iriklamongena, “Kwaneng yo nubunge waelbanual. Awe ae yo'obi ningki nhon tolamikne sembe kamna kapsiropne kwaneng roti sunuroba gandum walinge libatsiropne ot sae nhonog tobaukang. Gandum yogne kamag umag uropne awe ae yo'obi ningki nhon tolamikne sembe libatsiropne ot sae wilindi tomnep. Aghana kal zaitun wanaap, anggur wanaap kamna alikinag taleagti, zaitun aweag pongoropneap anggur aweap loba nembaheng kom,” alamoa ka'ebano.
7 Wene seoba, kemelamnoag agha sae werero kekneba tomne neneko Pham Domba Me anekori kologhao imno. Kologhaoba ka'elamnoag agha lebe aroba tomne nenekori yubu lelamori, “Yae,” alamoa ka'ebano. 8 “Yae,” seoba kemelamnoag agha pham kuda nhon whingna naiktop phamdi whingag saog pham wamo. Pham kuda enekoag pukamo nimi sina “Tepna” engerop. El amik peram-peram nelebel alamongena, nen nhon sina “Hadesa,” aro engeropne nelebel alamo. Sindi saeag mikipne tao andarina nimi ni mog so'oag wamong nimi ma'abi agha palu tombare neneptahin tanena, nimi palu wilindi opsinep kom aghana, nimi palu tomne ni ya'ag opsinep. Sindi nimi mal talamna toman nimi maikno opsinep, kwaneng yo li toman nimi maikno opsinep, naikna toman nimi maikno opsinep, apna lebe aroba si yoabari nimi maikno opsinep.
9 Neneko uro yabioba, kemelamnoag agha sae werero kekneba lamne neneko Pham Domba Me anekori kologhaoa imno. Kologhaoba kemelamnoag agha Allah sembe auk mhong towalengero tamneba umag aneko kemelamnoag agha Allahri Yubu nubu nenero nimi ambatsirop nimiri yame ipsino. Nimi yame ipsinongena, sindi Allah Yubu Yesus sembe sik uro ambarelamsiekpa, ora nimiri “Karong” aro ya'ag opsiekpa, Allah yubu ambatsirop nimi yame wamonga ipsino. 10 Sindi yubu haum aro nubu uro lelamongdi, “An sembenga orogne sikne wamlamdi nu Saelbamsilamdi nia mangkina Saelbamlam! Nimi so'oag wamang nimiri nu opsiekne sembe ik etbare wapmendi, Andi tam lelekto kembamendi, lumbahilulam?” aro haum aro hailamong. 11 Sinag a'ero-a'ero ag wangaro siliro pelengenne solomne tatsiori, sinag “Olog tek-tek papto wamlulom,” aro ambatsio. Tipto ambarelamsiori, “A'unkabo Yesusag seneragto Nari awe torop nimi mog so'oag kamag uro wamangne amik sum nimiri ya'ag opsukang. Opsiikpa, Na Allahri Namabo yame nene a'ilbahineri, Nari senenne sunsunum uro, ‘Ni abene,’ sembaneri, lumbahinun,” seoba ka'ebano.
12 Wene seoba, kemelamnoag agha sae werero kekneba no'opne neneko Pham Domba Me anekori kologhao. Kologhaoag agha sa'uma nubunge uao. Heng babe inibin taonge ag pham kambing piri hong wiropne saog uro piri taoba, walna eneng saog tao. 13 Imbreana lulupto mog so'oag timbaongnena, khao nubunge ulamloba, kal wana hulne tinilo saog uro imbrea imag agha mog so'oag timbao. 14 Im kom taongom seonge kaluna nubunge wa'amoglo saog uro kom taongom seoba, yimap mog so'o mag longo kanerop mog so'o ua urobag anekoap nhonag merekel tal pio.
15 Unuaoba mog so'oag yubu sia lerop nimiap, nimi nubu nangap, yin salerop nimi sikini yaboap, saeag agha tup nimiap, nimi saelba uhirop nimiap, nimi yog nimiap, mo sektop nimiap, nimi arukna urop nimiap ni tanukoag tiplenglamsinoba, kirik arame ina, kirik selenga ina tognoltalamong. 16-17 Yim tanekoag kirik tanekoag yubu haum aro lelamongdi, “Wene ikinne pairop sum eneko yal. Eldi nimi nubunge puka urobag pukamlangeap, Pham Domba Me anekoapti nu opsirikagti, a'un yimap kirikap nu sopto niknibahisom! Wene sin abenekori oro wabahinepne neneko siriro la'anilamlaba, nimi nhon babe sin whingag kas mi agha seknep kom ual. Ane sembe, El nimi nubunge puka urobag pukamlangeap Pham Domba Meap abenekori nu ipsileagti, a'un yimap kirikap nu sopto nikniro tognobahisom!” aro wene alamongba ka'ebahino.