Pham Domba Me Ponekori mome toro pairopne wa'amogtoba tobogha
5
1 Neneko uro yabioba, kemelamnoag agha mome toro pairoba wa'amogtopne nhon nimi nubunge saelba uhiropne puka urobag pukamonge ponekori sae sirik saeag saelbamoa imno. Saelbamo mome toroba tara-tara ni to'opto mome torobariog wamoba imno. Mome toro pairoba enekoag kekneba sae werero pairoba saekbareri sae werero mome serektopne wamoa imno. 2 Saekbare sae werero pairopne wamoba kemelamnoag agha Allah arukna imagne malaikat palisongne nhondi yubu nubu uro lelamori, “Nimi etne sunsunum wamlari, hae sae werero pairopne tane kweltebaleri, mome toro pairopne wa'amogtoba neneko sangkanep?” alamoa imno. 3 Aghana imag agha babe, so'oag agha babe, so'o mombolag agha babe nimi nhondi babe sangsanga mome toro pairopne wa'amogtoba nene sangaro lomag kembanep kom. 4 Mome toro pairopne wa'amogtoba sangaro lomag mome toro pairopne kembanep nimi sunsunum urop nimi nhon babe irop komdi, na wana ngik ngogha engkano. 5 Engkanoba nimi nubu nang yubu epto wenehiropnang taneko nhondi nanag yubu lelamori, “An engkaheng kom! El Yehuda sisa agha ‘Pai kam singa' aro engeropne kembae! Elna, ilisang Daud yubu sia leropne ponekori mangaroba nubunge wamlari, ni aisanang luknubahio. Eldi sae werero kekneba saekbare wamlange nene kweltebanepti, mome toro pairoba wamlange nene kembanep,” aro ambatneo.6 Wene seoba, kemelamnoag agha Pham Domba Me nhon nimi nubunge saelba uhiropne puka uroba taneko peramag sekamo. Sekamoba, sin lebe aroba tombare abenekoap, nimi nubunang yubu epto wenehiropnang tanekoapti longo kaneloamong. Pham Domba Me aneko kembanoagna, samenag oro kaleropne saog wamoa imno. Pinu saekbare wamoba, haing wana saekbare wamo. Pinu saekbareap, haing wana saekbareap anena, Allah Yame saekpare mog so'o sirikag-sirikag pogsinepne pongoro yabiamo. 7 Unuamoba Pham Domba Me aneko yaoba, nimi nubunge saelba uhiropne puka urobag pukamonge ponekori mome toro pairoba wa'amogtoba wamonge neneko sae sirik siba taroba saelbao. 8 Mome toro wa'amogtoba aneko Pham Domba Me ponekori sae saelbamoba, lebe aroba tombare wamongne abenekoap, nubu nimi yubu epto wenehirop nimi tom tara bare wamongne abenekoap, Pham Domba Me whingag “Kipnun” aro u amupto so'oag malpiong. Sindi a'ero-a'ero nhon-nhon sale-sale yabi among ana pingpong ana yubu lilim neneropne, apna leng-leng aroba kamna alikinag uro toroba emas agha kau soropneap saelbamong. Sindi a'ero-a'ero kau saelbamongne neneko lomag song walia liro aukag taroba saelbamong. Song walia kau lomag saelbamongne nenekona, Allah Eldamneri weptop mabori Allahag molona moloropne kau lomag to'opto wamlaba, saelbamong. 9 Molona moloropne kau lomag salelamongdi, sindi sepna wendogne agha nhon si sipto seplamong. Seplamongnena,
“Nimiri An opkeekpa, Andi eneng yingkiro tebalumne nenekoag agha
nimi sisa ni nimi anabiag agha,
yubu a'ero-a'ero lerop nimi ni anabiag agha,
mog so'o tala-tala urop nimi ni anabiag agha,
nimi winiptangto mo sektoba negara ni nimi agha,
Allah sembe nimi toro topsilum.
Ane sembe, ot An aghabog sunsunum uropne wamlam andarina,
mome toro pairoba wa'amogtoba eneko tobia
mome wa'amogtoba sae werero kekneba taneko kweltena kweltebanep.
10 Andi sin mog so'o tala-tala urop nimi agha toro topsilumdi,
Allah yubu ka'ero sunsunum uro urop nimi Allah sembe walia pairop nimi Elmabo walinge nembahilum.
Amik sum sindi babe yubu sia lero mog so'oag uropne saelbamsukang,”
aro seplamong.
11 Neneko uro yabioba, nen ka'ebanongena, Allah arukna imagnang malaikatdi teng-tenga maiknori yubu lelamonga ka'ebahino. Sin warekto sekongnena, nimi nubunge saelba uhiropne puka urobaap, lebe aroba tombare abenekoap, nimi nubunang yubu epto wenehiropnang tom tara bare abenekoap nusamag nembahiongdi, sin malaikat teng-tenga aneko warekto sekong. 12 Sin warekto seklamongdi, omektop sepna yubu nubu uro seplamongnena,
“Pham Domba Me oro kaleropne poneko El agha sunsunum uropne wamla!
Nia mangkina Eldi saeag taogpa, wali-walia maiknoro saelbamla! El agha wana hektopne, mikip sirikne wamla!
El unulamlange sembe El agha kiplameberi, paliag nenelameberi, omeklamukap,”
aro seplamong.
13 Wene alamongba, nari ka'ebanongena mog so'oag ni lebe aroba imag, so'oag, mog so'o mombolag, mag nubu uro longorop maghag ot ni lebe selonga mog so'o wamlonga taneko niri seplamong. Seplamongnena,
“El nimi nubunge saelba uhiropne puka urobag pukamlangeap Pham Domba Me anekoap Sin ni phende agha paliag wamdangdi, nia mangkina saelbamdang. Papna koma kipto omeklamseberi, ya'ag uro paliag nenelamsukap,”
aro sepna seplamong.
14 Sindi wene aro seplamongne sembe lebe aroba tombare abenekori samoro, “Sikne agha lero omeklamlom,” aro wene seongba, nimi nubunang yubu epto wenehiropnang tanekori u amupto so'oag malingkina kiplamong.