“Nia Mangkina Saelba Uropne poneko imag puka uroba imno,” seogha
4
1 Neneko uro yabioba, na whingag agha haing uamna kwelekamna senenag agha na whingag lag tao. Nari kemelamnoag agha ina siram nhon imag kubamoba imno. Kubamoba kemelamnoag agha yubu nhon, samenag babe nanag yubu leboba ka'ebano yubu neneko, mag ma'i trompet pho aroba lilim nubu uro lerop saog urop yubu lilim nenekoag agha nanag lelamoba ka'ebano. Yubu lilim enekori nanag yubu lelamori, “Ane walelae. Amik sik uro yabilulne Nari anag kembatkeneba iplulam,” alamoa ka'ebano. 2 Wene alamo abeneko pere Allah Yame Walinge nanag taneori, imag agha kiliro towalengkaneo. Kiliro towalengkaneoba, kemelamnoag agha nimi nubunge saelba uahiropne puka urobag aneko el pukamonge poneko imno. 3 Pukamonge poneko imnongena, imang wareroba eren saogneap uwong saogneap imang warelamoba, el pukamoag aneko mano yame erenne agha warekloamoa imno. 4 Nimi nubunge saelba uahiropne puka urobag kanero warekloamo anekoag nen nimi nubu nang yubu epto wenehiropnang puka urobag tom tara bare wamoa imno. Sin nimi saelba uhiro wenehirop nimi tom tara bare aneko kemelamsinoba, ag solom ag wangarop nimi sindi usoghag kwiria towalengkamongpa ipsino. Sindi usoghag kwiria towalengkamongba, ipsinongena, leng-leng aroba kamna alikinag uro toroba emas agha sunuroba usoghag elekamongdi, pukamonga ipsino. 5 Nimi nubunge puka urobag nusamagne enekoag agha lepna saog uro libango aropne lanalamoba, limang talaglamo. Limang talaglamoba, nimi nubunge puka urobag eneko whingag whea saekbare tiniro meroba wamoba imno. Saekbare tiniro meamongba, imnonge nenekona, Allah Yame saekbare wamlange sembe imno. 6 Nimi nubunge saelba uhiropne puka urobag neneko whingag sip nen wamoba, imnongena mag longorop mag sin aneko whiri yame-yame uropba sa'a-sa'a babe imnep wamoa imno. Nimi nubunge saelba uhiropne puka uroba enekoag ingkis sunuro wamongena, lebe aroba kamag uropne tombare wamongne abeneko whingag sip babe wailag sip babe haing wana aghabog to'opto wamoa imno. 7 Lebe aroba selekne nenekona, eldi usog pai kam singa saog wamoba imno. Lebe aroba phendepne nenekona, eldi usog pham sapi yem pham saog wamoa imno. Lebe aroba wilindipne nenekona nimi whing saog wamoa imno. Lebe aroba tomne nenekona, eldi usog winang abeao winang im toman palamloa saog wamoa imno. 8 Lebe aroba tombare abenekoag a'ero-a'ero ubu piamsiona, ol no'opare ubu piamsio. Tara-tara sip babe haing wana maikno to'opto ubu piamsioa ipsino. Lebe aroba tanekori ae inipnag babe ae yo'obi babe olog ta'ap sen koma sepna aghabog saelba ulamong. Seplamongnena:“Sembenga orogne, sembenga orogne, nu Saelbamsilne sembenga orogne. Allah nia mangkina saelbamlange poneko wamlange, wamogne, wamle paghabog wamlul,”
aro omektop sepna seplamongba, ka'ebano. 9 El ya'ag kamag uropne, El saelba uhiropne puka urobag pukamlange poneko sembena, lebe aroba tombare abenekori omektop sepna seplamongdi, “Andi walia nunag tarelamsilamdi ulamsilamne sembe kibiang An sembe towalengelangkeap,” aro omeklamong. Lebe aroba tombare abenekori El sembe omeklamong abeneko 10 nimi nubunang yubu epto wenehiropnang tom tara bare abenekori u amupto so'oag malingkina kiplamong. Sin nimi tom tara bare nangdi so'oag malingkina kiplamongdi, nimi nubunge saelba uahiropne puka urobag pukamonge ya'ag kamag uropne poneko whingag yingkina yabu sanukto so'oag malingkina kipto omeklamong. Omeklamongdi, sindi kwiria usoghag elengkamongne kopto El saelba uhiropne puka urobag pukamonge poneko whingag tobogto palilamong. Sindi kwiria kopto palilamongdi, yubu lelamongdi,
11 “Nuba Nuni nu Saelbamsilamne Nuni Allah!
Andi agha nia mangkina sumbalumne neneko Andi seneropne agha nia mangkina sunuro yabiogba, wene babe kamag wamla.
Ane sembe, tarelamsilamdi ulamlamdi saelbamlamne sembe nimiriba An aghabog kibiang towalengero An omeklangkukap.
Omeklamapnena, An mo mikipne sunsunum uropne wamlamne aghabog omeklangkukap,”
aro omeklamong.