Sardis nimi sembe yubu pibogha
3
1 Nen tipto ambarelamneori, “Nari ambarelangkenne tane Yesusag sikne aro seneragtop nimi as Sardis winiro wamang nimi sembe paia uro yubu ambatsiropne ponekoag mome toro piplulam. Piplulamnena:‘El imbrea saekbareap, Allah whingag Yame saekbare ua ulamangneap saelba uhiropne poneko wamnari, Nari yubuna andane. Nari sa'a-sa'a a'undi ulamlomne sembe elwamsin. A'undi ulamlomne sembe nimirina “Kamag wamang,” sembamsiang aghana, a'unna kulomag nimi teptop nimi saog uro wamlom. 2-3 A'un teptop nimi haing kwelekahut! Puksut! A'undi ul palamlomne ipsindi, Nari seneraglamnange ka'ebahut. A'undi ulamlomne sembe Nani Allahri, “Nari awe wali uro komopto tobang kom,” senelamsil. Ane sembe, a'undi salero ul palamlomne neneko teploa saog wamla aghana, Nanag sik tapto wana palilamlulom. Allahri a'un sembe “Nari awe wali uro komopto tobang kom,” senelamsil ane sembe, samenag a'un ambatsiekpa, ka'ebalumne neneko seneraghal pilulom. Ambatsiekpa ka'ebalumne neneko mikip uro saelba ulapmundi, a'undi malinge ulamlomne wailag nembalulom. A'un agha haing kwelekamundi, pukmun kom tanena, Nanagha haogha nimi yaloa saog uro a'unag yanun. Yanunne neneko a'undi “El etsum yalul,” annena, a'unna ekonag agha Na yanun.
4 Aghana a'un Sardis wamlom nimi anabiag agha nimi etpareri malinge wa'epto walinge aghabog ulamlom. Unulamlom nimi enerina, “Ag wanganne sembenga kaulbaneleag,” aro nimiri wali uro yae wamloa saog uro yae ultalamlomba, yaneba, Nari whingag ali semban koma wamlulom. “Walinge aghabog ulamukap,” aro yae uldalamang nimi sembe, Na a'un wamlomag yane tanena, “Nanap sae tiptangto wamukapne sunsunum,” sembahinun. “Sunsunum urop nimi,” sembahineba, sikinna ag wanganne kororopne enekamikpa, Nanap nhon yabalamukap. 5 Sikin ag wanganne kororopne enekamikne saog uro, nimi etneri malinge luknuro khapto ulamik tanena, nimi eneko sembe ag solomne agha wangkitsinun. Wangkitsineri, Nari nimi si toro nimi ya'ag uro kamag wamnep nimi sembe mome toro pairop wa'amogtoba nenekoag sindi si babe wamlul. Nimi kamag wamnep nimi si mome toropne nenekoag wamleba, sindi si mome toro pairoba wamlange nenekoag agha lupsunun kom. Nari Nani Allahap Eldi arukna imagnang malaikat wamangneap, sindi whingag agha Nari lemnunnena, “Sin Nari nimi wamang,” sunun. 6 Allah Yame Walingeri Yesusag sikne aro seneragtop nimiag leplange nenena, aori ka'ebalomne nimi niri seneragto saelbamlulom,’
aro mome toro piplulam,” aro Yesusti ambatneoba, nari a'un Sardis nimi sembe mome toro piamna.
Filadelfia nimi sembe yubu pibogha
7 Nen tipto ambarelamneori, “Nari ambarelangkenne tane Yesusag sikne aro seneragtop nimi as Filadelfia winiro wamang nimi sembe paia uro yubu ambatsiropne ponekoag mome toro piplulam. Piplulamnena:
‘Yubu nene Allah Eldamneri “O'omne” aro weptopne ponekori lero palilogna. Na sik uropne poneko wamna. Samenag Israel nimi sembe yubu sia leropne Daud ponekori mikipne saelbamogti, mikipne neneko ina kupna saog wamog. Wenena Allahri “O'omne” aro weptopne ponekori ina kuptoba mikipne saelbamnari, lelamna. Nari ina kupne tanena nimi nhondi babe serekanep kom. Nari ina serekane tanena nimi nhondi babe pa'abanep komne wamla. 8 A'undi ulamlomne sembe Na elwamnari wamna. A'un mikip kom wamlom aghana, Nari lelamnangeag neleplamnelomdi, Nari sae limna koma Nanag mikip uro seneraglamnelom. Ane sembe el wamlulom. A'un sembe Nari ina nhon kupsinonge neneko a'un whingag wamlaba, nimi nhondi babe serekanep kom. 9 Nari ina kupnonge nene sembe el uro wamlulom. Yahudi nimiri winiptangtop aeag longorop nimi tanekori sindam nimi sembe, “Nu Yahudi nimi wamap,” aldalamang. “Nu Yahudi nimi,” aldalamang aghana sindi wanaag Yahudi nimi wamang kom. Ot orolenange agha lelamangdi, phia sikini nubungeri yubuag nelepto ul palamang. Wene alamang nimi tanekoag Nari sinag uahineba, a'un tamag kipto yingkaukang. A'un tamag kipto yingkina yabu sanukto so'oag u amupto malingkiikti, ‘Imagne ponekori a'un o'ona sembamsil,’ aro lag phoro ambatsukang. 10 A'undi Nari lelamnangeag seneraglamnelomdi, eraruk wamlomneag agha wana palingkina solwali wali uro sunsunum uro ulpalamlom. Nari amik uanunnena, “Mog so'o niag wamang nimi mipsinun,” aro eraruk uro unne kwelekto yabilul. Aghana a'undi Nanag seneraglamnelomdi, ulamlomne sembe mog so'o niag eraruk uro unne kwelekto yabile sum eneko Nari a'un pelepto yepsinun. 11 Na men phea yanun, ane sembe a'undi Nanag saelbamnelomne neneko sae limnumunagti, wali uro yae wamlulom. Yae wali uro khapto wapmun tanena, a'undi malinge luknubamunne sembe usoghag kwiria elektoba tatsinun. Aghana, nimiri a'un luknubahileba, khapto wamna koma a'undi Na sae linumun tanena, nari usoghag kwiria elektoba tatsinepne neneko a'unag talul kom. 12 Nimi etneri malinge luknuro khapto ulamle tanena, Nani Allahri Mem Ae nenekoag nimi neneko aeog ikto towalengen kal saog nembanun. Unuaneri el aneko ya'ag sop-sop unag nembaneba, Allah ua urobag Eldi Mem Aeag agha nen lambalul kom. Nani Allah si nimi enekoag mome tomnun. Nani Allah siap, Naringe si wendogneap nimi enekoag mome tomnun. Nani Allahri imag agha as soro kalurop as Yerusalem wendogne mog so'oag pelengkaleba, kulukulalul. Imag agha pelengerop as si wendogne nimi enekoag si kekhaekto engeptaleba, as si nimi enekoag mome tomnun. 13 Allah Yame Walingeri Yesusag sikne aro seneragtop nimiag leplange nenena, aori ka'ebalomne nimi niri seneragto saelbamlulom,’
aro mome toro piplulam,” aro Yesusti nanag ambatneoba, nari a'un Filadelfia nimi sembe mome toro piamna.
Laodikia nimi sembe yubu pibogha
14 Nen tipto ambarelamneori, “Nari ambarelangkenne tane Yesusag sikne aro seneragtop nimi as Laodikia winiro wamang nimi sembe paia uro yubu ambatsiropne ponekoag mome toro piplulam. Piplulamnena:
Allahri samenag nia mangkina sumbaogti, Elmeri saeag pibogpa, nia mangkina El umag wamlaba, saelbamsil. Nia mangkina sumbaogne saelba uahiropne ponekori Allah yubu sik uro sol wali uro nimi ambarelamsildi, El Sikne aghabog Allahri salag pibogne sunsunum uro ulamla. El Sikne aghabog uropne ponekori yubu lelamlange neneko ane. 15 Na a'undi ulamlomne sembe Na elwamna. A'undi Na sembe ulamlomne nenena, “Allah yeng nembanun,” aro wanaag agha ulamlom kom aghana, “Karong” aro babe na liamnelom kom. Nari a'un sembe yeng senelamsinnena, “Sindi Na sembe wana yengag agha sol wali uro tolamik ane wali. Sindi na sembe ‘Karong' sembaheng babe hae liamnukang,” senelamsin. 16 A'undi ulamlomnena, wana yengag agha babe wana karongag agha babe ulamlom kom. A'undi wana yeng anabi karong anabiag ulamlom ane sembe, tungna saog uro Nari pamag agha tukom agha la'ambitsinun. 17 A'undi lelamlomdi, “Nuna sa'a-sa'a kwema kom. Nunag sa'a-sa'a wamlaba, nu tup nimi wamap,” alamlom. Aghana a'unna wanaag wamlomne, yareagti, wanaag orogti seklelamlonga saog wamlomba, Nari a'un kembi agha, “Sin saeag agha orogti, pik pele iroan koma haing uro wamloa saog nimi wamang,” senelamsin. 18 Ane sembe nari yubu wenero ambarelamsinnena, nanag agha leng-leng aroba kamna alikinag uro toroba emas nanag agha kamna kapto toplulom. Nanag agha topmun taneogna a'un tup talulom. Nanag agha babe ag solomne a'un wangaltonne kamna kapto topmun tanena, a'un kabeog wamlomdi ali senelamlomne lililapmundi, ali sembalulom kom. Neapna a'undi haingag nikna ulamsilba, haing toa saogne lililamsilne a'undi haingag pelaghal tananba, wali nenerop likna Nanag agha kamna kapto topmun taneogna, sik uro haingdi ililamlulom. 19 Nari nimi o'ona sembamsin nimiag nari yubuag agha wenelamsindi, “Nari yubu ka'ebaleba, wali wamlul,” alamna. Ane sembe a'un wana yengag agha Nari wenerop yubu sunsunum uro ulapmundi, a'undi malinge ulamlomne wailag nenelamlulom. 20 Kembamnululom! Na wene ina siramag sekamnari, ina kaungulamna. Nimi etneri na yubu ka'ebaneleri, ina kupnele tanena, Na wa'ineri, nimi enekoap kwaneng nhon tenemeri, el babe Nanap kwaneng nhon tununam.
21 Nimi etneri malinge luknuro khapto ulamle tanena, nimi eneko sembe, “Nanap nhon pukamnunam,” senun. Nari babe samenag malinge luknubahiri, Na Naniap saelba uahiropne alikinag pukanebag nhon pukamna saog uro, nimi etne babe malinge luknubale nimi eneko “Nari saelba uhiro pukanebag nhon pukamnunam,” aro elag ambatnun. 22 Allah Yame Walingeri Yesusag sikne aro seneragtop nimiag leplange nenena, aori ka'ebalomne nimi niri seneragto saelbamlulom,’
aro mome toro piplulam,” aro Yesusti ambatneoba, nari a'un Laodikia nimi sembe mome toro piamna.