Efesus nimi sembe yubu pibogha
2
1 Yesusti nanag ambarelamneori, “Nari ambarelangkenne tane Yesusag sikne aro seneragtop nimi as Efesus winiro wamang nimi sembe paia uro yubu ambatsiropne ponekoaga mome toro piplulam. Piplulamnena:‘Na imbrea saekbare sae sirik saeag saelbamnange ponekori yubu lelamna. Na auk pog tiniro ik topne leng-leng aroba emas agha sunuroba yan iktoba saekpare nusam toman yabalamnari, yae wamnange ponekori lelamna. 2 Nari a'undi walia ulamlomne sembe elwamsin. A'un seklelamlomne sembe seneragna koma wana malamlaba, a'undi whin uro awe tolamlom. Nari a'un sembe elwamnange, a'undi senelamlomdi, “Sin wana yoaba urop nimi nunap sae tiptangto wamnep kom,” senelamlomne sembe na elwamna. Sin wana yoaba urop nimiri “Nu Yesusti wepto pogsirop nimi,” aldalamang aghana, sik urop komne agha minimna yubu agha “Nu Yesusti wepto pogsirop nimi,” alamang. A'undi sindi orolena lelamangne sembe mibamsilomdi, sindi yubu “Sikne kom,” aro el uro wamlom. 3 A'un seklelamlom aghana, wana palingkina Na Yesus sembe walia ulamlomdi, Na “Yesus si nubu talul,” aro solban sen koma sop-sop walia ulamlom.
4 A'undi Na sembe walia unulamlom aghana, nari a'un sembe “Sindi unuaheng kom,” senelamsin nena ane. A'undi samenag Na sembe alniro o'ona senelamnelumdi, ulamlum saog uro wene babe wanaag agha ulamlom kom. 5 Ane sembe samen wanaag agha ulamomne neneko libomdi, lomag eba timbaloa saog uro uaomne nene sembe el uro wamlulom. A'undi wanaag agha ulamlom komne nene wailag nembamundi, samenag ulamom saog uro wanaag agha ulamlulom. Wanaag agha unulapmun kom pagha tanena, na a'unag yaneri, auk pog tiniro iktoba yan aneko merobag anekoa wenelanun.
6 Undo lemna aghana walinge nhon a'unag wamla. Walinge a'unag wamlangena, Nikolaus ponekoag neleptop nangdi ulamangne sembe nari babe karong sembamsin saog uro, a'undi babe karong sembamlom.
7 Allah Yame Walingeri Yesusag sikne aro seneragtop nimiag leplange nenena, aori ka'ebalomne nimi niri seneragto saelbamlulom. Nimi etneri malinge luknuro khapto ulamik nimi sembe, Allahri wali uro wamnebag sumbaog so'o nenekoag nimi neneko Nandamneri enero payanun. Nimi neneko sembe, “Kal wana ya'ag kamag nenehirop kal wana nene telamlulam,” aro ambatnun,’ aro mome toro piplulam,” seo.
Yesusti undo ambatneoba, nari a'un Efesus nimi sembe mome toro piamna.
Smirna nimi sembe yubu pibogha
8 Nen tipto ambarelamneori, “Nari ambarelangkenne tane Na Yesusag sikne aro seneragtop nimi as Smirna winiro wamang nimi sembe paia uro yubu ambatsiropne ponekoag mome toro piplulam. Piplulamnena:
‘El nia mangkina wamna komag samenag wamogne, wene wamlange, amik babe komobanep komne wamle paghabog wamlulne, El tebaogti kamag taogne ponekori yubuna ane. 9 A'un seklelamlomdi, kwema uro wamlomne sembe nari a'un sembe elwamsin. Nimiri, “Nu Yahudi nimi wamap,” aldalamang nimiri sik yubu komne minilamangdi, a'un san tilipto hagsup alamsiang. “Nu Yahudi nimi wamap,” aldalamang aghana, sinna sik uro Yahudi nimi kom. Sinna phia sikini nubunge neleptopnang wamang. A'unna seklelamlom aghana a'unna wanaag tup nimi saog uro urop nimi wamlom. 10 Ko'o we uro wamna komag a'un seklenne nen lag talul aghana, seklebalulomne sembe log sembaheng kom. “A'un el uro wamlulom,” sembandina, ambarelamsinne, phia sikini nubunge nenekori nimi mikip nembahileba, nimi tanekori a'un wamlom nimi agha nimi etpare sae kiliro “Mipsinun,” aro sae kaupto kop aeag tobongkipsukang. Tobongkipsiikpa ik sa'obare a'un “Seklebaik,” aro ulamsiikpa, wamlulom. Ane sembe Na Yesusti a'unag ambarelamsinnena, a'undi Nari lelamnange saelbapmundiog, tebamun tanena, Nari a'un kamna tatsinun. Tatsinunnena, a'undi malinge luknubamunne sembe Nari kwiria a'undi usoghag elektoba elekahineri, a'un ya'ag kamag uro Nanap nhon wamukap.
11 Allah Yame Walingeri Yesusag sikne aro seneragtop nimiag leplange nenena, aori ka'ebalomne nimi niri seneragto saelbamlulom. Nimi etneri malinge luknuro khapto ulamle tanena, el nimi nong tebale babe, Allahri nimi ni tam lelekto kemero kareptop sumeneko nimi ane ik phendep sum tebalul kom. Ya'ag kamag wamlul,’ aro mome toro piplulam,” seo.
Yesusti undo ambatneoba, nari a'un Smirna nimi sembe mome toro piamna.
Pergamus nimi sembe yubu pibogha
12 Nen tipto ambarelamneori, “Nari ambarelangkenne tane Na Yesusag sikne aro seneragtop nimi as Pergamus winiro wamang nimi sembe paia uro yubu ambatsiropne ponekoag mome toro piplulam. Piplulamnena:
‘Yubu enena, karog yonge si tara tara yo uro karog saelbamnange ponekori yubu wamla. 13 Nari a'undi as sembe na elwamsin. A'un wamlomag aneko phia sikini nubungeri nimi maikno mikip uro saelbamsildi, el puka urobag wamloa saog wamlom aghana, a'undi Na sembe ali semban koma Nanag sikne aro seneraglamnelom. A'unkae Antipas poneko, Na Yesus sembe nimiag sol wali uro ambatsiogne sembe as Pergamus anekoag yo urop nimiri Antipas ya'ag obek. El obek aghana, a'undi “Nu opsiikag” aro Nari yubu sae limneom komdi, phia sikini nubunge ua urobag aneko papna koma Nanag saingnia sikne aro seneraglamnelom.
14 A'undi Nanag wali salelamnelom aghana, Nari a'undi ulamlomne sembe karong sembamsinnena, a'un anabiag agha nimi nenne pogto Bileamdi samenag yubu ambarogne Israel nimiri ka'elamek saog uro ka'elamlomdi, ulamlom. Unulamlomne nene sembe karong sembamsin. Bileamdi samenag Balakhag ambarelamogti, “Andi Israel nimi wana topsimendi, ina ka'esebeltananneag nembahailulam,” aro ambarog. Ambarogpa Bileamdi yubu sunsunum uro Balakhti ulamog andarina, Israel nimiri Allah yubu ingisaplamekti, Allah iriktop yubu phiro nengabo kelabo salik-malik uro waleptangkamekti, mema pharoba sembe pairop kwaneng babe toro telamek. 15 Bileamdi samenag yubu ambarogne ka'elamekti, nelepto ulamek saog uro, yubu ambatsiropne Nikolaus nenekori orolena yubu ambarelamsil. Orolena yubu ambarelamsilba, a'un anabiag wamlom nimiri eldi yubu salero nelepto ulamlom. A'undi eldi yubu nelepto ulamlomne nene mali.
16 Malia unulamlom ane sembe, malia ulamlomne wailag nembamundi toro toboghahisut! Kom pagha tanena a'un anabiag agha orolena salero nelepto ulamang nimi sembe, ‘Na aisa nenelamneang,’ sembaneri, na men phea yingkina karog naringe silomag kilbi agha nari sinag pimnun. 17 Allah Yame Walingeri Na Yesusag sikne aro seneragtop nimiag leplange nenena, aori ka'ebalomne nimi niri seneragto saelbamlulom. Nimi etneri malinge luknuro khapto ulamle tanena, kwaneng roti Allahri sae agha tatsiropne, manna si engerop kwaneng roti tognoropne nene agha tatnun. Apna nimi neneko sembe kirik solomne walinge elag tatnun. Kirik solomne nene alibagnena, nimi neneko sembe si wendogne engero mome toro pimneba, si wendogne nene sembe ot nimi neneko agha el tanep,’ aro mome toro piplulam,” seo.
Yesusti undo ambatneoba, nari a'un Pergamus nimi sembe mome toro piamna.
Tiatira nimi sembe yubu pibogha
18 Nen tipto ambarelamneori, “Nari ambarelangkenne tane Na Yesusag sikne aro seneragtop nimi as Tiatira winiro wamang nimi sembe paia uro yubu ambatsiropne ponekoag mome toro piplulam. Piplulamnena:
Allah Elme Eldi haing wana auk pog tagtag arop saogne wamlaba, Eldi yanna kirik alneropba mheng-mhenga agha uwong i arop saogne wamla. Eldi yubu a'un Tiatira nimi sembe nene. 19 Nari a'undi nia ulamlomne sembe Nari a'un elwamsin. A'un mamun o'ona seneptangkamlomne sembe Nari elwamsin. A'undi Nanag “Sikne” aro wana palilamlomne sembe Nari elwamsin. A'undi Nari awe tonne sembe solwali wali uro tolamlomne sembe elwamsin. Neapna a'un seklelamlom aghana wana malamlange nari a'un elwamsin. Nari wene a'un sembe elwamsinnena, samenag awe wenne olog hae saog uro welamlum aghana, wene maiknoro welamlomne sembe elwamsin. 20 Unulamlom aghana Nari a'un sembe karong sembamsinnena ane. A'undi wana kel nhon Izebel, “Na Allahri silimu tiptop kel,” aldalamla kel enekoag a'undi wana tarelamlom. Eldi orolenange agha Nari arukna maikno yubu ambarelamsiori, wana tolamsio. Ambarelamsiori, wana tolamsio andarina, Nari awe torop nimiri eldi yubu nelepto ina selepneroman palamang. Ina selepneroman palamangdi, Allah iriktop yubu phiro nengabo kelabo salik-malik uro waleptangkamangdi, mema pharoba sembe pairop kwaneng babe toro telamang. 21 Eldi malia undo ulamla aghana, Nari el sembe wana pimnori, “Mali-malia ulamlange lipleri, Nanag samoro yalul to, kom to,” aro ko'o tatno. Ko'o tatno aghana mali-malia neneko lia yan koma nengaboap waleltananne agha tipto ulamla. 22 El uro wamsut! Nari eldi ulamlange sembe ae usa mamnebag mampitneba, ae koloag nong og seklebaluldiog. Ae koloag aneko elag nelepto salik-malik waleltalamang nimi tanekoap sin seklena seklebaukang. Sindi elag nelepto ulamangne neneko libik kom tanena, sinag seklenne sik uro yabilul. 23 Elmabo elag neleplamang nimi babe opsine andarina, Na Yesusag sikne aro seneragtop nimi ni wamangneri eltaukang. Na sembe eltaukangnena, “Ot Eldi agha nimiri seneragha uropneap, nimi wanaag seneragha ulamangneap elwamsildi, nimiri uroba kembaleri, malinge to walinge to aro karebaleri, lunuro pipsilul,” aro eltaukang. 24 Aghana a'un nenne Tiatira wamlomne, sindi malinge ulamangne saog uro ulamlom kom. El Izebel kelenekori “Mili tognoroba walinge ambarelamsin,” alamlaba, phia sikini nubungeri ambatsirop yubu salero neleplamlom kom. Ane sembe, Nari lelamnangena, “Nari a'unag nen ma'aro yubu ikinne ualulom sunun kom,” aro ambatsin. 25 Aghana a'undi wene saelbamlomne neneko sae limna koma saelbamlulom paghabog Na amik yanun. 26-27 Nimi etneri malinge luknubaleri, Nari awe komopto tolamlul tanena, Na Naniri mikipne Na tatneogne saog uro, Nari babe nimi enekoag mikipne neneko tatnun. Nari mikipne saelbamnange sinag tatsineba, malinge luknuro khapto ulamik nimi tanekori mog so'o tala-tala wamang nimi sembe yubu sia lero saelbamsukang. Tam nene sembe samenag nimiri Allah yubuag pet si lero mome toro pibog. Mome toro pibognena,
“Eldi mog so'oag nimi saelbamsilulnena, besiag agha sunurop kame saelbaleri, kas mi agha mog so'oag nimi saelbamsilul.
Eldi yubu ka'erop kom nimi sembe so'o katneag agha sunurop mag ma'i solapto urubanep saog uro luknubahilul,”
aro mome tobog.
28 Sin malinge luknuro khapto ulamik nimi tanekoag kekneba nhon imbrea heng walelingkirobagne Nari tatsinun. 29 Allah Yame Walingeri Yesusag sikne aro seneragtop nimiag leplange nenena, aori ka'ebalomne nimi niri seneragto saelbamlulom,” aro Yesusti ambatneonge nari a'un Tiatira nimi sembe mome toro piamna.