Yohanesti mome toro pibogha
Wilindipne
1
1 Na sabalne Allah Elmabo wenehiropne wamnangeri yubu ene an Gayus sembe mome toro palilamna. Nangkae, an nari wanaagne wamlamne, anap nanapti sikne salelamnamneag agha an o'ona senelangken.2 Nangkae wanaagne, andi wana seneragna wali wamla saog uro nari an sembe Allahag molbarelangkennena, nia mangkina uro yabalamle abeneko pere ot walinge agha anag tagheleba, an nong nikna koma mikip wamlulam, aro molbarelangken. 3-4 Wene aro lemnange tam nene sembe. Orange babe uro yabohoba, yeng uanoho aghana nimiri nari mabo sembe ambarelamnehengdi, “Andi mabo kelmabori sikne salelamangdi, sunsunum uro ul palamang,” aro ambatnehengba ka'ebahane tanena, yeng maikno uanepne neneko paliagne wamla. Nungkabo Yesusag wana palirop nimi etpare tanekori an sembe nanag ambarelamneongdi, “Sikne salelamlari, porogne sop-sop ul palamla,” aro ambarelaneong. Ambarelaneong yubu ka'ebanori, yeng maikno uaneo.
5 Naba nangkae wanaagne, nungkabo Yesusag wana palirop nimi yeplamsilamne andi Yesusag wana paliropneag agha ul palamlam. Nungkabo anag yaong sum andi sin ekon nimi yaong aghana, wali yepsiom. 6 Andi o'ona senelamsiomdi, sinag wali uaomne sembe sin nimi tanekori Yesusag wana paliro winiptangtop nimi whingag yubu ambatsiong. Nungkabo nen anag yahengpa, andi Allahag tatnepne sunsunum uro sin yepsisomdi, “Wali tipto pululom,” aro kipsisom tanena, “Nangkae an wali yepsilam,” sembahane. 7 “Yepsisom,” aro ambatkennena, sin nimi taneko, “Kristus si nubu talul,” aro lambaongdi, ambatto tongolamsiong. Ambatto tongolamsiongag, Allah ekon nimi tala-tala wamang nimiri sin yepsiong kom aghana, ambatto tongolamsiong. 8 Ane sembe nuri sin, “Kristus si nubu talul,” aro ambatto tongolamsiong nimi sembe uahebengena, sin kipsinepneog wamla andarina, sinap sae tiptangto sik yubu ambatsiropne ul palamukap.
9 Samenag nari a'un Yesusag wana paliro winiptangtop nimi sembe mome toro pimno. A'un sembe mome toro pimno aghana, Diotrefes ponekori eldamne sembe, “Whingagne tahane,” senelamlari nari yubu saelban koma ka'ebao kom. 10 Ane sembe, amik yane tanena, eldi nu sembe san tilipto lolon yubu kamolange lelamlange sembe ekon tanep komdi wembanun. Eldi nu sembe og mo yubu toraplamsil kom aghana, nungkabo Yesusag wana palirop nimi elag yingkirop nimi sembe Diotrefes nenekori sin babe kiplamsil kom. Ora nimiri babe nungkabo yingkirop nimi taneko, “Kipsisebe,” aro uanep. Aghana, “Sin kipsisebe,” senerop nimi babe Diotrefes nenekori iriklamsildi, “Kipsimun tanena, nu winiptangtobag ane wamlulom kom,” aro yag lanalamsil.
11 Naba nangkae wanaagne! Nimi etneri malia urop tanena, nimi eneko Allah ekondi malia urop. Malia uropne neneko saog uro nelepto uaheng kom. Aghana nimi etneri walia urop tanena, Allahringe wamla ane sembe, walia uropne saog uro nelepto ulamlulam. 12 Anena Demetrius poneko sembe nimi niri, “Walia ulamlaba ililamap,” aro maiplamang. Demetrius ponekori sikne salero ul piropne babe lag neneldalamla. Nuri babe el sembe, “Wali ulamla,” aro maiplamap. Nuri lelamapnena an el uro wamlamne, nuri ot sikne agha lelamap.
13 Mome eneag yubu maikno anag ambatkehene aghana, saeag agha mome toro palinne sunsunum kom senelamna. 14 “Elem uro haiptahaneme,” senelamna ane sembe, haiptanemeri yubu lemnunam. 15 Nangkae, an wana aingniro wali wamlulam. Nungkabo tane wamang nimiri an kiplangkeang. Andi babe nungkabo an ya'aghag wamang nimi babe a'ero-a'ero si lepmendi kipsululam.
Abenda.