“Allah sembe awe nikne tolamap,” aro ambatsiogha
3
1-2 Nangkabo, samenag nari babe a'unag ambarelamsisi sumeneko Allah Yameri yubu ka'ebanep nimiag ambatsinep saog yubu a'unag anam ambatsinep kom saog wamog. Nari a'unag yubu ambarelamsisiba, wendog Kristusag wana piplum sumeneko olog me maum terop me saog wamlum. Me maum terop meri kwaneng kasne tenep kom saog wamlumba, Allah Yameri seneropne seneragnep nimiag ambatsinepne a'un sembe olog sunsunum komdi, ambatsisi kom. Wene babe Allah Yameri seneropne a'undi saelbanep kom saog wamlom. 3 A'un nimi mamun mon sek senenne agha waldalamlomne mog so'oag nimiri ul piropne sunsunum uro ul palamlom. Undop pagha tanena, Allah Yameri seneropne a'undi saelbanep kom saog wamlom. 4 Mog so'oag nimiri ul piropne ulamlomnena, nimi nhondi, “Na Paulusag neleptopne wamna,” alamlaba nen nhondi, “Na Apolosag neleptopne wamna,” alamla tanena, mog so'oag nimiri ul palamangne saog uro ulamlom.5 Apolos poneko etne wamlaba, na Paulus babe etne wamna? Nu wamnamnena, ot nu Saelba Uhiropne ponekori awe tatsiogne sunsunum uro awe tolamnomori, nuri yubu ambarelamsinomonge pere agha a'undi sik senelamlom. 6 Nana nimiri aweag meropne saog uro a'unag sam ambatsisiba, meroba aneko mag ikloa saog uro Apolos ponekori amik mag mo'oro iklamsiog. Aghana nuri tolamnamne neneko, ot Allah Eldamneri nubu nembarelamsil. 7 Undop pagha tanena, meropne poneko babe, mag mo'oro iktopne poneko babe nimi o'omne wamnam kom. Ot El nubu nembarelamsilne poneko Allah mo o'omne wamla. 8 Meropne poneko babe, mag mo'oro iktopne poneko babe ot awe nhonog torop nimi. Awe toropne sunsunum uro sin abenekoag kamna tatsiropne a'ero-a'ero tomnep. 9a Nari sunumna tomnange nenekoagna, nanap elap awe nikne tolamnam. A'un Allahri awe saog wamlom.
9b-10 Nen sunumna nhonag tol pina sumbatnuahin. A'un Allahri ae soroba nhon saog wamlomba, na ae soroba aneko o'oropne saog wamna. Allahri nanag wana yorolamneogti, wana hekaneogne sunsunum uro nari kirik wali uro yangaro meploa saog uro mepsiba, ora nimiri wene yangan kirik aneko alibag ae solamla. Wene ae solingkirop nimiri a'ero-a'ero wali uro seneraglamsengdi, ae ene yangan kirik eneag sobaheng. 11 Ae soroba yangan kirik meptaogne eneko Yesus Kristus wamlaba, nimi nhondi babe ae soroba yangan kirik nhon babe ma'aro yangaro pimnep kom. 12-13 Nimi etneri ae soroba yangan kirik ene alibag ae solamla tanena, amik sumeneko warebaleri, auk singkale sumeneko nimiri ae soropne eneko, “Walinge agha ae solamla to, malinge agha ae solamla to,” aro mipto lag nembalul. Wali kirik kamna kapto alibag urop kirik emas agha to, perak agha to, wali kirik orangeap agha to sobale tanena, ae soroba ane, “Wali to, kom to,” aro lag talul. Kal agha to, bu agha to, o'olaba agha to sobale tanena, ane babe lag talul. 14 Ae soroba eneko auk ten koma ya'ag wamla tanena, ae soropne ponekoag kamna talul. 15 Ae soroba aneko auk teleri kom nembale tanena, ae soropne poneko aukag lo'optaloa saog uro hae kamag wamnep aghana, kamna elag tatnepne loba talul.
16 A'undam nimiag Allah Yame ua ulamlaba, Allahri Mem Ae wamlomne sembe el wamlom kom te? 17 Allahri Mem Ae aneko Allahringe mo walia urop ae wamlaba, a'un Allahri Mem Ae wamlom. Ane sembe nimi etneri a'un Allahri Mem Ae loba nembahile tanena, Allahri nimi eneko babe loba nembalul.
18-20 A'undam nimi haing kunuptaheng kom. Wene mog so'oag wamang nimiri, “Wana hektop nimi wamap,” seneldalamangne neneko Allahri kemelamsilagna, “Mo limituk uro urop nimi wamang,” senelamsil. Tam nene sembe nimiri mome toro palilamogti, “Wana hektop nimiri, ‘Tognoro uanun,’ aro ulamangneag peroptangto kekhaekeldalamangpa, Allahri ililamsil,” aro mome toro pibog. Nen nhondi mome toro palilamogti, “Mog so'oag nimi wana hekto seneragtop nimi sembe Nu Saelba Uhiropne ponekori el uro wamlange, lobange seneraglamang,” aro mome toro pibog. Ane sembe, a'un nimi nhondi eldamne sembe seneldalamleri, “Wene mog so'oag wamang nimiri whingag na wana hektopne wamna,” seneldalamle tanena, nimi enekori, “Hae, nimiri na sembe, ‘Limituk nimi wamla,’ senelamneik,” aro lipsilul. Mog so'oag nimiri el sembe, “Limituk nimi wamla,” senelamiknena lipsilul andarina, Allahri tapto wana hekahinep seneragnange nimi enekoag talul.
21-22 Nia mangkina a'undinge wamla. Na Paulus babe, Apolos poneko babe, Kefas poneko babe ni a'undi nimi wamap. Ane sembe nimi nhon paliag nenero, “Eldinge wamna,” aro maipseng kom. Mog so'o babe a'undinge wamla. Kamag uro unne babe, tepnange babe a'undinge wamla. Wene ko'oag wamapne babe, amik ko'oag wamukapne babe ni a'undinge wamla. 23 Apna a'un Kristustinge wamlomba, Kristus Allahringe wamla.