Allahri nimi wepsiogne sembe ambatsiogha
9
1 Na Kristus ponekoap ma'aptangto wamnari orolena yubu ambatsin koma ot sikne agha yubu ambarelamsin. Nari wanaag seneraglamnange Allah Eldamne Yame Walingeri el wamlari, “Sikne leplam,” aro nari wanaag ambarelamnelba, yubu ambarelamsin. 2 Nari wana ikin sirik ulamnelba, sop-sop wana saplamnel. 3 Wana saplamnelnena, nangkabo nanisag Israel ponekori mangaroba mangarobari mangkahiek nimi sembe wana saplamnel. Sin Israel nimi taneko Kristusap a'eptangto wamangpa, “Sin yo'obahinepne yo'obahileag aro nana agha lunuptanep andarina, sin taulbahiso,” sembamna. 4 Sin Israel nimi samen Allahri, “Nari kelmabo me taukang,” aro weplamsiogti yoplamsiog. Eldi imang wareroba sinag lag nenelamsiog. Allahri sinap yubu nikne saekag lebek. Allahri aruksirop yubu Musa pere agha sindi saeag pibog. Allahri awe tolamekti omeklamekpa, “Undo-undo tatsineri yeplamsinun,” aro sinag salag pibog. 5 Sikinisagti likto mangkahiek nimi agha Kristus poneko mangkaekpa, mog so'oag nimi nongag lag taog. El mori nia mangkina salelamlange poneko ot Allah wamla. Ot El mo ya'ag omeklamukapne wamla. Sikne agha saekag lebap.6 Allahri samenag Israel nimiag, “Undo-undo walia tatsineri yeplamsinun,” aro salag pibog. Wene aro salag pibog aghana, Kristus yaogpa, sindi el kibek komne sembe salag pibogne nene wene angaro yabil sembanep te? Undo sembaheng kom! Angaro yabil kom alamnangena tam nene sembe. Allahri Israel nimi tapto wepsiog nimina, ot sin Israel ponekori likto mangkahiog nimi agha kom. 7 Abraham elmabo babe. Abrahamdi likto mangkahiog nimi ni sembe Abrahamdi nimi yina likto piropne senep kom. Ni likto mangkahiogne elmabo alamap kom aghana, Allahri lebogne sunsunum uro, “Anme Ishak pere agha andi nimi yina likto pilul,” aro salag pibog. 8 Wene seogne nenena, Abraham nongdi likto mangkahiog nimi taneko Allah Elmabo taukang kom. Allahri nimi eneko sembe, “Nari kelmabo me,” senelamsil nimina, ot sin Allahri salag pibogne sunsunum uro lag nembahile kelmabo me taneogna, sin nimi taneko sembe, “Abrahamdi nimi yina likto piropne,” sehileba, Allah Eldi kelmabo me taukang. 9 Allahri salag lebogne neneko ane: “Nari lemna sumenekoag an kel Sara kelenekori me nengabo me mangaro aleba, wamtumunag samoro yanun,” seog.
10 Salag pibogne nene nhonog kom. Amik sum babe Abraham elme Ishak ponekori elkel tobogpa, Rhibka keleneko me monag taog. Me monag wamogpa, me phende monag wamdekpa mangkahiog. Me phende abeneko sikini Ishak ponekona, nunisag babe wamla. 11-12 Me phende abeneko anam mangaptan komag, malinge babe walinge babe uan koma monag wamdek. Monag wamdekpa, Allahri sin me phende abeneko sembe, “Walinge to, malinge to uarang,” aro seneragna koma tam karebatsiog. Allahri nimi kiliro yoplamsilne ponekorina, “Undo uro yaboho,” senelamogne sunsunum uro “Nimi ane wepsinun,” aro tam karebatsiog. Me phende monag wamdekpa, sikinin kelenekoag Allahri yubu lelamogti, “Nabinge paliag taleba, yandonge el arukna talul,” aro yubu ambarog. 13 Yubu eneko sunsunum uro Allahri yubu lebogpa, mome toro palilamogti, “Ilipsae Yakub o'ona sembamna aghana, eldo Esau karong,”
seogne mome toro pibog.
14 Wene seogpa, nuri sa'a sukap? “Allahri sik komne uaog,” aro nuri yubu lemnep te? Undo wene sembaheng kom! 15 Tam nene sembe Allahri Musa ponekoag yubu lelamogti,
“Nimi etneag yareag sembanenge, naba nari wanaag agha.
Nimi etneag o'ona sembanenge babe, naba nari wanaag agha,” seog.
16 Wene seog tanena, Allahri nimi weplamsilnena, nimiri wanaag yeng seneropne agha nimi weplamsil kom. Nimiri wali uro ul piropne agha babe Allahri nimi weplamsil kom. Ot Elba Eldi wanaag agha yareag senelamsilne sunsunum uro nimi weplamsil. 17 Nimi weplamsilne nene sembe Allahri Firaun ponekoag yubu lelamogne Musari mome toro pibog. Allahri Firaunag yubu lebogne ane:
“Nari an sekitkehingena, tam nene sembe.
‘Na mikipne an pere agha lag tale andarina, mog so'o tala-tala nimiri nari si lelamikpa, nubu talul,’ aro sekitkehi,”
seogne Musari mome toro pibog. 18 Wene seog tanena, nimi etneag Allahri, “Yareag sembandi undo unuahane,” senelamla tanena, nimi enekoag yareag seneropne agha ulamlul. Apna nimi etneag, “Wana kas mi aropne nembanun,” senelamla tanena, nimi eneko wana kas mi aropne nembanep.
19 Wene aro yubu lemnaba, a'un nimiri nanag samoro hailamnumundi, “Allahri, ‘Undo uro yaboho,’ seneropne nimiri kom senep kom. Ane sembe sa'a sembe nunag tam piplul?” aro wene sembanep.
20-21 Wene sembanep aghana, an mog so'oag nimi etne wamlamdi, Allahag haim-haim alamlulam? Sunumna nhon sumbatsunun. Nimi nhondi so'o olog tomnari, so'o nenekoag agha mag ma'i nhon-nhon sumban. Mag ma'i sunuropne ponekona, el mori so'o saelbandi, elba eldi wanaag agha sumban tanena, ane sunsunum te? Mag ma'i nhon sumbanep nena, “Ot mag ma'i anda wamla,” aro el ponekori nhon sumbanep. Mag ma'i nhon sumbanep nena, “Wali sirik wamleri, o'omne talul,” aro nhonsumbanep. Aghana el saeri sumbahoba, so'o agha mag ma'i taho mag ma'i enekori yubu lelamnari, sunuropne ponekoag, “Sa'a sembe undo sumbaneom,” aro haibanep te? Undo wene aro haibanep kom.
22 Ane saog uro Allahri uanepne sembe lemnuan. Allahri seneraglamsori, “Nari wana yo senenneap mikipneap nimi ni whingag lag tahisoba, el taheng,” aro seneragnep. Wene aro seneraglamsori, sunsunum uro nimi nhon-nhon sembe, “Nari wana yo sinag paiamsineba tebaukang,” aro tam karebatsinep. Aghana opsin koma wana mamsonge agha lipsisoba, ko'o we uro pohoba, amik opsinep. 23 Undo uahinep aghana, Allahri nen seneragna nhon seneraglamnep nena, “Mog so'oag nimiri el talamikti, tup nenehiroba sikne ot nari imang warerobag mo wamla aro el taukang,” sembanep. Wene aro seneraglamsori, sunsunum uro nimi nhon-nhon tanekoag yareag senelamsisori, “Paliag nembahineri, imang warerobag nhon wamukap,” aro wero paiamsinep. 24 Wero paiamsinep nimi tanekona, nu yopsiog nimi sembe lemna. Yahudi nimi mo, “Nanag yahut,” aro yopsiog kom aghana, mog so'o tala-tala urop nimi babe yoplamsil. 25 Allahri tam nene sembe lebogpa, Hosea ponekori yubu tipto mome toro pibogne ane:
“Sin wene Nari nimi kom aghana amik, ‘Nari nimi,’ senun.
El wene o'ona sembamna komne amik, ‘Nari o'ona sembamna nimi,’ aro engero pimnun,”
seogpa mome toro pibog.
26 Allahri nen yubu lebogpa, nhonag mome toro pibognena,
“Sin mog so'o nhonag wamang nimiag, ‘A'un Nari nimi kom,’ aro ambatsisi aghana,
amik sin nimi tanekona, ‘Allah Kamag Uropne Eldi kelmabo me,’ aro engero philul,”
seogpa mome toro pibog.
27 Tanena Allah silimu yubu tiptopne Yesaya ponekori Israel nimi sembe yubu haum aro lelamogti,
“Israel nimi kirik a'angkea mag longorop mag laut abolag lalaptoba a'ilbanep kom saog wamang aghana,
sin Israel nimi taneko agha ot nimi ologha taulbahilul.
28 Tam nenena, nu Saelba Uhiropne ponekori, ‘Uanun,’ seogne
men phea mog so'oag sik uro uitlul,”
aro haum seogti mome toro pibog.
29 Yubu ene sunsunum uro Yesayari samenag yubu lelamogti,
“Imagnang sikini nu Saelba Uhiropne ponekori nu sembe nimi yina likto piropne nhon yae pipsiso kom tanena,
Sodom nimiap Gomora nimiap tebaek saog uro nu tebanep,” seog.
“Israel nimiri Kristusag wana palilamek kom,” aro ambatsiogha
30 Wene seogpa seneraghi agha sa'a sukap? Anena, nimi sisa Yahudi kom nimiri, “Wana porog nimi neneptahane,” semban koma ero palamek kom aghana, Kristusag wana paliropne pere agha sin nimi taneko wana porog nimi nembahiog. 31 Ot Israel nimiri, “Wana porog nimi neneptahabe,” aro aruksirop yubu saelba ul palamek aghana, wana porog nimi neneptan koma wamang. 32 Sa'a aghari undo uro yabinep? Sin Israel nimiri ul palameknena, Kristusag wana pairo ul palamek kom aghana, sindam nimiri ul piropne agha, “Wana porog nimi neneptahane,” aro ul palamek. Anena, sindi ul palameknena, nimiri ina palamloba kirikag puri tikto phukul ingkinep saog ulamek. 33 Sindi Kristusag wana paia urop komne sembe likiptop yubu Allahri yubu lebogpa, mome toro palilamogti,
“Kembahut! Sion so'o tanekoag kirik mebiamnaba, nimi palamikag kirik anekoag puri tikto phukul ingkinep.
Nimi etneri elag sikne aro wana palilamle tanena, ali talul kom,”
seogpa mome toro pibog.