Allah Yameri seneropne sunsunum uro ulamnepne sembe ambatsiogha
8
1-2 Samen Allahri Musa pere agha aruksirop yubu ambatsiogpa, irikna phiro malia ulamubunge teptopne apto abu. Teptop nimi tabu aghana, wene nu Yesus Kristusap ma'aptangkamap tanena, kamag nenehirop Yame anekori nu talulamsildi, wanaag aruklamsil. Nuri wanaag aruklamsil andarina, samen aruksirop yubu nimi opsinep yubu enekori wene nu aruklamsil kom. Ane sembe wene Yesus Kristusap ma'aptangkamap nimi tam karepto ikinne nunag pimnepne orog. 3 Nari yubu lelamnangena, Musari aruksirop yubu ni wali uro saelba ul palamseng tanena, nimi eneko yepsinep. Aghana nu nimi nongog wamap nimiri ni wali uro uanep komba, Musa pere agha samen aruksirop yubu enekori nimi wali nembahinep kom. Ane sembe Allahrina, “Malia urop nimi taluro yepsinun,” aro me Eldamneringe mog so'o eneag poghol aog. Mog so'oag nimiri malia ulamang aghana Allahrina, “Nari me eneko mog so'oag nimi nong saog talul,” aro Elme poghol aog. Mog so'oag yaogpa, nimiri malia uropne sembe “Kom talul,” aro El nongag tam karebaog. 4 El nongag tam karebaog andarina, Allah Yameri nuri wanaag aruksiropneag nelepto ul palamebenge toman agha Allahri samenag aruksiog yubu sia ambarogne sunsunum uro ul palamukap. Mog so'oag nimiri nongag ul piropneag nelepto ulamukap kom.5 Anena, mog so'oag nimiri senenne sunsunum uro ul pirop nimi tanekona, nimi nong mo sembe seneraglamang. Aghana Allah Yameri senenne sunsunum uro ul pirop nimi tanekona, Allah Yame yeng seneropne sembe seneraglamang. 6 Nimi nong mo sembe seneragtop tanena, teptopne agha lag tanep. Allah Yame yeng seneropne sembe seneragtop tanena, wana aingniro wali uro kamag uro unne lag tanep. 7 Anena, mog so'oag nimiri nimi nong mo sembe seneragtopne neneri Allahap aisa neneptangkamla. Aisa neneptangkamlange nenena, Allahri aruksirop yubu ka'ebanne agha, nimiri wana mamsoba, sunsunum uro uaheng. Aghana mog so'oag nimiri wana mamnep komdina, Allahri senenneap sunsunum uro uanep kom. 8 Sin mog so'oag nimi nongag uropne mo sembe seneragtop nimi tanekori Allah wana yeng nembanep kom.
9 Ot a'unna, mog so'oag nimi nongag mo ua ulamlom kom aghana, a'undi kulomag Allah Yame leknea ua ulamsil tanena, Allah Yameri seneropne sunsunum uro ulamlom. Aghana, Kristus Yame nimi nhonag leknea ua ulamsil kom tanena, nimi eneko Kristus ponekoringe kom. 10 Ot Kristus poneko a'unap ma'aptangkamlom tanena, nu mog so'oag nimiri malia uropne sembe nimi nong aneko otsik ya'ag tebanep aghana, a'un wana porog nenelamsilne sembe a'undi yame kamag tahioba wamlulom. 11 Apna a'un kulomag Allah Yame leknea ua ulamsil tanena, a'un nimi nong tebanepne taneko babe kamag nembahilul. Yesus tebaogpa, nimi teptopneag agha Kristus poneko kamag nembaogne ponekori El Yame a'un kulomag ulamsilne pere agha a'un nimi nong babe kamag nembahilul.
12 Nangkabo, Eldi nu kamag nenelamsil ane sembe, ot sunsunum uro nuri sembamnepneog wamlangena, “Nu wene nimi nongag kamag wamapne ane, nu nong yeng nenenne agha nelepto ulamukap kom,” sembamukap. 13 A'undi ot nimi nong yeng neneropne agha nelepto ulapmun tanena Allahap ma'aptan koma mo tebalulom. Aghana a'un nimi nongog wamlomdi, a'un malia ulamlomne neneko Allah Yame Walingeri yeplamsilne pere agha oro sikmun tanena, kamag wamlulom. 14 Allah Yameri yeplamsil nena, nimi etneri Allah Yame seneropne nelepto ul pirop tanena, nimi taneko Allah Eldi kelmabo me wamang. 15 Samen a'un logti aruksirop yubu ul palamlum aghana, wene Allah Yameri a'un log nembahin koma, “Nari kelmabo me,” aro eldi seneropne a'undi wanaag ambarelamsil. Allah Yameri senenne ambarelamsilne pere agha, “Naba Naniong,” aro engero yoplamap. 16 Allah Yame El mori nuri wanaag ambarelamsilne agha, “Nu Allah El kelmabo me wamap,” aro el talamsil. 17 Eldi kelmabo me wamap tanena, Eldinge agha pogto nunag tatsilul. Allah el mori nunag tatsilul nena, nunap Kristusap ma'aptangtopne sembe pogto tatsilul. Nuna, “Allahri nu babe wali kipsilul,” aro Kristusap ma'aldalamapti, El sembe seklelamap tanena, Nuni Allahri nu babe Kristusap nhon wimbitsileri tatsilul.
Nu amik wali aro kipsilulne sembe ambatsiogha
18 Amik kipsileri imang wareroba nunag tatsilulne ane nubu sirik. Nari senelamnange, wene seklelamap aghana, amik imang wareroba nunag lag talulne nubu siriktina, wene seklelamapne sembe tam nubunge sembamna kom. 19 Amik sum kiplamsileri, Allahri nimi wepto, “Nari kelmabo me ane,” aro lag nembahilul. “Nari kelmabo me ane,” aro lag nembahilul sum eneko, “Elem uro yaboho,” aro tibogto nang-nangalamap. Ni so'oag uropne pongorobari babe, lebe arobari babe, ni tanekori, “Im so'o sumbahiogne poneko Eldi kelmabo me elem uro lag nembahiso,” aro tibogto nang-nangaro wamap. 20 “Eldi kelmabo me elem uro lag nembahiso,” senelamapne tanekona, tam nene sembe. Nia mangkina sumbahiogne ot wali sumbahiog aghana, nimi abenekori malia uarekne sembe, Sumbahiogne ponekori irikaog andarina, nia sumbaogne taneko loba taogpa, wali pinep kom. Irikaog aghana, amik uro yabilulne sembe tiboghaogti irikaog. 21 Irikaogpa ni sumbaogne taneko wene loba tangto polbanep. Loba tangto polbanep aghana, el uro wamogti, amik sum Allah Eldi kelmabo me imang warerobag agha lag nembahile sum eneko ni irikna taneko kom talul.
22 Tam nene sembe nu el wamap. Samenag agha babe, wene wamapne babe nia mangkina Allahri sumbaogne mog so'oag wamlange neneko seklero yabalamla. Nia mangkina sumbaogne tanekona, kelabo me mangaro anep kelabori, “Yaghe,” aro engelamlonga saog uro ni so'oag uropne sumbaogne tanekori nunap nhon, “Yaghe,” aro seklelamap. 23 Pongorobaap, lebe arobaap, so'oag uropneap seklero “Yaghe,” senelamang aghana, sin mo aghabog kom. Nuri babe wanaag, “Yaghe, amik nu Allah Eldi kelmabo me nong wali nembahile sum babe elem uro yaboho,” aro nang-nangalamap. Wene babe Allah Yame Walingeri nu alniro talulamsil aghana, “Amik ya'ag wali nembahilul,” aro wana awi uro nang-nangalamap. 24-25 Allahri nu samen taulbahiognena, “Amik ya'ag wali nembahinun,” aro taulbahiogpa, tibogto nang-nang alamap. Wene nangnang alamapnena, sik uro yabohoba, nuri haingdi ipsebe. Haingdi ipsebe tanena, “Yalul,” aro nen tibogto nang-nang aro wamsebe kom. Ot anam haingdi irop komdi, “Undo uro yabilul,” aro wana maropne agha tibogto nang-nang aro wamnep. Ane sembe wene nu haingdi imna komag nang-nang aro wamap.
26 Tam nene saog uro, nu wana ikinag nong pesa urobag agha Allah Yame Walingeri nunap ma'aro yebelalamsil. Nu yebelalamsilnena, nuri wanaag, “Allahag molbahane,” sembanep aghana, “Yubu welaro molbahane,” aro ekon urobag agha Allah Yame Walingeri yeplamsil. Nuri pam silimuri yubu lemnep komne tiplamlari, Allah Yame Walinge Eldamneri nu sembe Allahag molbarelamsil. 27 Allah Eldi kelmabo me wepsiog nimi sembe Yame Walingeri molbarelamsil. Allahri nuri wanaag to'opto wamlange ililamlari, Eldamne Yame Walingeri seneragnange el wamlari, nhonog wamla. Ane sembe Yame Walingeri nu sembe molbarelamsilne el wamla.
28 Nu el wamap nena, nimi etne Allahri kiliro, “Nari awe tol tongolamlul,” aro yobogpa, Allah o'ona senerop tanena, nimi eneko Allahri yae paiamla. Sa'a-sa'a uro yabalamlangeag agha babe Allahri nimi eneko sembe, “Wali neneptangtopne agha elag talul,” aro poloro piplul. 29 Tam nene sembe, samenag agha el wamsiog nimi taneko wepsiogti, “Name nhonogne yandonge wamlaba, sin babe Nari kelmabo me wamikti, el yame saog taukang,” aro nimi maikno wepsiog. 30 Apna sin wepsiog nimi taneko yopsiog. Apna yopsiog nimi taneko wana porog nimi nembahiog. Apna wana porog nembahiog nimi taneko “Paliag nembahinun,” aro nubu nimi nembahiog.
Allahri nu o'ona senelamsilne ponekoap ma'aptangtopne sembe ambatsiogha
31 Tam nene sembe sa'a sukap? Allah poneko nunag sip wamla tanena, etneri nunap aisa neneptangto paliag tanep? 32 Allahrina, “Naba nameag tam timbaleag,” semban koma mog so'oag nimi ni sembe Elme tatsiog. Undop tanena welaro seneraglamlom? Elme wanaagne tatsiog tanena, Eldi wana nunag yorolamsilneag agha Elmeap nia mangkina babe sik uro tatsilulneog aro seneraglamap.
33 Allah Eldamneri wana porog nimi nembahinep. Eldamneri, “Wana porog nimi nembahinun,” aro wepsirop nimi tanekoag nimi nhondi babe tam pipsinep kom.
34 Yesus Kristus nu sembe tebaogne, kamag taogne babe, el mo Allah sae sirik sip waelbaogti wamlange ponekori nu sembe Allahag molbarelamsil. Ane sembe nimi nhondi babe nu sembe, “Malia uaekne sembe ikinne pipsiso,” senep kom. 35 Kristus ponekori nu o'ona senelamsilne ponekoap nunap ma'aldalamap tanena, nimi nhondi babe a'ebahinep kom. Nu sekleropneri to, nunag ikinne tiniropneri to, nu aisa neneptangtop nimiri sarekerepsiropneri to, kwaneng yo uropneri to, kabeog uropneri to, nu opsinepneri to, nimiri nu teplopsinepneri to, nhondi babe nunap nu o'ona senelamsilne ponekoap sae saleptangkamapne sae komobahinep kom. 36 Samenag babe nimiri Allah yubuag mome toro pibogne sunsunum uro,
“Anag sip tabunge sembe lukun siro inipnag nimiri nu olamsiang.
Sindina, pham domba ohirop saog uro nu olamsiang,”
aro mome toro pibog.
37 Wene seogpa, tam malinge nene nunag uro yabiropne abeneko pere nu mombolag nemban koma Kristus ponekori nu o'ona senelamsilne neneri nu mikip sirik nimi nenelamsil. 38 Nari sik senelamnari yubu ambatsin nena, Allahri nu o'ona senelamsilne ponekoap ma'aldalamapneag agha nimi nhondi kiliro a'ebahinep kom. Kamag wamnange to tepnange to, Allah arukna imagne malaikatti to, phia mikibari to, wene babe, amik babe, mikip uropne nhondi babe a'ebahinep kom. 39 Nia mangkina Allahri sumbaogne paliag sipne to, mombolag sipne to, nhondi babe a'ebahinep kom. Nu Saelba Uhiropne Yesus Kristus pere agha Allahri nu o'ona senelamsilba, nia mangkina wamlange nhondi babe nu kiliro o'ona senelamsilne nenekoag agha nu a'ebahinep kom.