10
1 Nangkabo, nari sop-sop Allahag mololamnangena, “Israel nimi taulbahilulam,” aro molbarelamsin. Allahri Israel nimi ni taulbahiso tanena, wana yeng maikno uanoho. 2 Sin Israel nimi tanekori, “Allah sembe sol wali uro awe topsebe,” aro ulamangba, ililamnari lag phoro, “Wanaag agha ulamang,” alamna. Ot sindi ul palamangne ni wali uro seneragtopne agha ulamang kom. 3-4 Sin ekonne nenena, sindam nimiri, “Wana porog nimi neneptahabe,” aro ul palamang. Undo ul palamang aghana, Allahri aruksirop yubu ni kaupto wamlange sirikagne Kristus wamla. Elag wana palirop nimi ni Allahri wana porog nimi nenelamsil. Allahri wana porog nimi nenehiropne sembe Israel nimi taneko ekondi saelbamang komdi, “Nu mori wana porog nimi neneptahabe,” aro ulamang.Kristusag wana palirop nimi wana porog nembahinepne sembe ambatsiogha
5 Aruksirop yubu ul piropne agha wana porog nimi neneptangtopne sembe, Musa ponekori mome toro palilamogti, “Nimi etneri aruksirop yubu nene saelba ul palamla tanena, ul piropne neneag agha kamag wamlul,” aro mome toro pibog. 6 Wene aro mome toro pibog aghana, Kristus ponekoag wana paliropba, wana porog nimi nenelamsilne sembe mome toro pibog. Mome toro pibognena ane: “Andi wanaag, ‘Etne imag waelbalul,’ aro seneragseng kom,” aro mome toro pibog. Musari yubu ene mome toro pibog aghana likiptopnena, “ ‘Imag waelbaneri, Kristus poa mog so'oag kulukul ingkinun,’ aro seneragseng kom,” aro mome toro pibog.a 7 Nen mome toro pibogti, “Andi wanaag, ‘Etne selengaag kulukul pilul?’ aro seneragseng kom,” aro mome toro pibog. Musari mome toro pibogne ane likiptopnena, “ ‘Teptop nimiag agha el Kristus kamag nenero epnun,’ aro seneragseng kom,” aro mome toro pibog. 8 “Undo seneragseng kom,” aro mome toro pibog tanena, Allahag wana paliropba wana porogne nenelamsil nimi tanekori welaro seneragnep? Musari mome toro pibogne wamlange ane: “Yubu ene an peramag wamlari, andi pamag babe, andi wanaag babe ulangkel,” aro Musari mome toro pibog. Musari yubu ene mome toro pibogne ambarelamsiapti, “Yubu nene sikne aro seneraglamlulom,” aro ambarelamsiap. 9 “Pamag babe, wanaag babe,” seogne anena tibin nembatnuahin. A'undi, “Allahri Yesus teptop nimiag agha kamag nembaog,” aro elag wana palilapmundi, “Yesus nu Saelba Uhiropne wamla,” aro pamag agha lag phoro lelapmun tanena, Allahri a'un taulbahilul. 10 Wanaag anekona, nimiri wana paliro sikne aro seneragnep andarina, Allahri wana porog nimi nembahinep. Pamag agha nimiri yubu nikne lag phoro lemnep andarina, Allahri nimi eneko taulbahinep. 11 Tam nene sembe Allah Yubuag mome toro pairopne nhon wamlangena, “Nimi etneri elag sikne aro wana palilamle tanena, ali talul kom,” aro mome toro pibog. 12 Tam nene sembe, Yahudi sisa nimi a'erop, Yunani nimi sisa a'erop kom. Yahudi sisa nimi sembe babe, nimi sisa yogne sembe babe, nimi etneri elag sikne aro wana palilamle tanena, ali talul kom. Nu Saelba Uhiropne nhonogneri ni Saelba Ulamsil. Nimi etneri elag engero yoplamla tanena, sin nimi tanekoag nubu uro tarelamsil. 13 Tam nene sembe samenag mome toro palilamogti, “Nimi etneri nu Saelba Uhiropne ponekoag si engero yoplamseng tanena, sin ni taneko taulbahilul,” aro mome toro pibog.
14 Wene “Yopsut,” aro mome toro pibog aghana, nimiri anam elag wana palirop kom tanena, elag “Yepne!” aro yopnep kom. Aghana el sembe anam ka'emna kom tanena, nimiri elag sikne aro wana pimnep kom. Aghana ora nimiri anam yubu ambarel ingkihirop kom tanena, nimiri yubu ene ka'ebanep kom. 15 Aghana nimi anam wepto pogna komag pagha tanena, nimiri ambarel ingkihinep kom. Tam nene sembe Allah yubuag mome toro pibogne nhon wamlange, “Sindi yubu walinge ambarel ingkihirop nimiri yan ingilingiropne wali kemerop,” aro mome toro pibog.
16 Wene aro mome toro pibog aghana, Israel nimi ni tanekori yubu walinge ambarel ingkihirop yubu eneko ka'ero saelbamang kom. Allahri yubu silimu tiptopne Yesaya ponekori nen mome toro palilamogti, “Nai, na Saelba Ulamnelamne, nuri yubu ambatsibo aghana, yubu ene nimiri sik senelamang to, kom to?” aro mome toro pibog. 17 Ane sembe, Kristus yubu ambatsiropne pere agha nimiri yubu sikne ene ka'ebanep. Tanena Kristus yubu nene ka'eropne pere agha nimiri Elag wana pimnep.
18 Undop pagha tanena, nimiri sembanepnena, “Israel nimiri yubu ene aori ka'ebaek kom te?” aro haibanep. Undo kom. Ot sik Israel nimi aori ka'ebaek. Israel nimi agha sepna siptop nimi nhondi samenag mome toro pibognena ane:
“Sindi yubu lilim lambaekne sabo taog.
Apna sindi yubuna tala-tala ambatto pabiek,”
aro mome toro pibog.
19 Aghana nimiri sembanepnena, “Yubu ene Israel nimi ekon te?” sembanep. El wamnepneog. Samenag ka'ebaeknena, Musa ponekori Allah yubu tipto Israel nimi ambarelamsiogti,
“Weag urop nimi Na sembe ekon aghana, Nari sinag uanunne sembe wana yo talulom.
Na Allahap sin Yahudi sisa kom nimiap nimi lom neneptangtop kom aghana sin nimi tanekoag uanunne sembe a'undi, ‘Nuringe mo wamso,’ aro mon sek talulom,”
aro Musari ambatsiog.
20 Weag urop nimi eneko sembe amik Yesaya ponekori babe log kom uro Allah yubu silimu tipto ambarelamsiogti,
“Na Allah wamnange sembe ‘El tahabe,’ senerop kom nimi wamang aghana, sinag na wamnange sembe el nembahin.
Sin nimi tanekori na el tongonerop kom aghana, sinag lag neneptan,”
aro Allah yubu silimu tipto ambatsiog.
21 Wene aro ambatsiog aghana, Israel nimi sembe Allah yubu tipto ambarelamsiogti,
“Lukun yo'obi inipnag babe, ‘Sae tiptahabe,’ aro sae nginiklamna aghana,
nimi tanekori Nari yubu ingisaplamangdi, toraplamneang,”
seog.