“Kristusap nhon tebabu aghana, nen Kristusap nhon kamag tabu,” aro ambatsiogha
6
1 Undop pagha tanena, sa'a sukap? Nuri tipto malia ulamsebe andarina, Allahri wana nunag yorolamsilne nubu tangto phelekaho sembanep te? 2 Undo sembaheng kom! Malia uropne nene sembe teptop nimi tabu ane sembe tipto, “Malinge uahane,” sembanep te? 3 Nundam nimi agha Yesus Kristusag wana palilamapti, nu maghag pelengelamsiangne sembe a'un el wamlom te? Yesusag wana palirop nimi maghag pelengehirop tanena, “Kristus nu sembe tebaogne ponekoap ma'aptaap,” aro seneragtopneag agha maghag pelengelamsiang. 4 Ane sembe, nu maghag pelengelamsiangne pere agha Kristusap nimi teptop nimi saog tabuba, Kristus kirik hogtobag sikek saog uro elap nikag maghag pelengelamsiang. Maghag pelengelamsiang andarina, Ili Allah imang wareropne pere agha Kristus poneko nimi teptobag agha kamag nembaog saog uro, nu babe kamag nembi agha wendog nimi nembahiog. Wendog nimi nembahiog ane sembe, sunsunum uro ul palamukap.5 Nari yubu lelamnangena, el tebaogpa, sikek saog uro nu babe elap nhon ma'aptangom agha pelengelamsiang tanena, nu mo teptop wamukap kom. Mo teptop wamukap kom aghana, el kamag taog saog uro nu babe kamag taberi, elap nhon wamukap. 6 Nuri samenag, “Malia uahane,” aro ulamububa, malia uahane senenne nenekori nu arukna saog nembahiog. Arukna saog wamubu aghana, nu el uro wamap nena, nu Kristusap nhon ma'aptangtopneag agha, nu mog so'oag nimiri, “Malia uahane,” senenne neneko epto tobog. Epto tobog nena, nimiri el kalag sipto obeka anekoag, “Malia uahane,” senenne neneko elap nhon tebaog. Eldina, “Nimi nong ningkiri malia seneropne neneko kom taho, andarina nimiri, ‘Malia uahane,’ senenne nenekori nen tipto sin arukna nembahinep kom,” aro epto tobogpa, elap nhon tebaog. 7 Tam nene sembe, “Malia uahane,” senenneri mog so'oag nimi aruklamsil aghana, nimi teban tanena malia senenne nenekori nimi eneko arukna arukulanep kom.
8 Nu Kristusap ma'aptangto tebabu ane sembe, “Elap nhon kamag wamukap,” aro sik senelamap. 9 Nu el uro wamapnena, Kristus poneko nimi teptopneag agha kamag taog tanena el nen tebanep kom. Ane sembe tepnangeri el nen luknubanep kom. 10 El samen tebaogne, mog so'oag nimiri malia uroba sembe tebaog ane sembe, nen phendep sum tebanep kom. Aghana wene el kamag wamlange Allah sembe ua ulamla. 11 Ane saog uro a'undi babe a'undam nimi sembe seneraghel dalapmundi, “Na ‘Malinge uahane,’ seneropne sembena, na teptop nimi saog tahi. Wene Yesus Kristus ponekoap ma'aptangkamnamneag agha kamag nembaneogba, kamag wamnange Allah sembe ua ulamnun,” aro seneragel dalamlulom. 12 A'undam nimiri nong wanaag, “Malia uahane,” senenne lololdalamlange nene, “Mikip taleri, nanag arukaneleag,” aro wa'epto lanalamlulom. 13 A'undi, “Malia uahane,” senenne neneko a'undi nongag yan sae nia wamlange neleban koma sik komne malia uaheng kom. A'undi nongag yan sae nia wamlange sembe seneraglapmundi, “Na samen teptopneag agha kamag nembaneog. Ane sembe, ot Allahringe wamnun,” aro El saeag nenel dalapmundi, El mo sembe ot wana porogne agha ua ulamlulom. 14 Wene Allahri nimi saelbamsilnena, Musari aruksirop yubuag agha a'un saelbamsil kom aghana, Eldi wana nunag yorolamsilneag agha saelbamsil. Ane sembe a'undi, “Malia uahane,” senelapmunne nenekori a'undam nimi arukahilul kom.
Nimiri aruksirop yubu nelepto uropneag sunumna tol pina ambatsiogha
15 Aruksirop yubuag agha saelbamsil kom. Wana yorolamsilneag agha nu saelbamsil tanena, sa'a hulamukap? Malia ulamukap te? Undo seneragseng kom! 16 Sunumna nene a'un el wamlom. A'undi nimi nhonag yubu lelamsomdi, “Andi yubu nelepto ul palamnundi, andi arukna tanun,” sehom tanena, a'un arukna nembahinep. Eldi aruktop yubu nelepto ka'ebahom tanena, eldi arukna tahom. Ane saog uro a'undi, “Malia uahane,” senenne nelepto ulapmun tanena, “Malia uahane,” senenneri arukna wapmundi tebalulom. Aghana Allahri senenne nelepto ulapmun tanena, Eldi arukna wapmundi, wana porog nimi talulom. 17-18 Samenag a'undi, “Malia uahane,” senenneri a'undam nimi aruklamsiogpa nelepto ulamlum. Malinge ulamlum aghana, nimiri a'unag sik yubu wana porog nenerop yubu ambarelahiek. Samenag a'un malingeri aruklamsiogpa ka'elamlum aghana, wene malia senenne nenekoag agha a'un sae lopsiogpa, wana porog senenneri a'un aruklamsilba nelepto ulamlom. Sik yubu eneko ka'ebalumne wana nong ningkiri nelepto ulamlom, ane sembe Allahag, “Wah naniong,” aro kiplamap.
19 Mog so'oag nimiri Allahri senenne seneragna eraruk ane sembe, nimiri ul piropneag sunumna tol pina ambarelamsin. Nari lemnange, samenag a'undi “Salik-malik waleptahabe,” senenneap, “Irikna phibahabe,” senenneap a'un wanaag aruklamsiloa saog talamogpa, nongag yan sae nia wamlangeag agha nelepto irikna philamlum. Samen malingeri aruklamsiogpa, a'undi nelepto ulamlum. Samen nelepto ulamlum saog uro wenena, wana porog senenneri aruklamsileba, nongag yan sae nia wamlangeag agha nelepto ulamlulom andarina, Allahri senenne mo ulamlulom. 20 A'un samen, “Malia uahane,” senenneri aruklamsiogpa, nelepto ulamlum sumeneko, wana porog senenneri a'undi wana anam toamsiog kombana, wana porogne sembe seneragna koma mo wamlum. 21 Mo wamlumag ulamlumne nenekoag agha nimi yepsinepne orog. Samen ulamlumne ina agha Allahap ma'aptan koma teptopne agha mauptanep. Samen ulamlumne neneko sembe wene ali senelamlom. 22 Samen malia ulamlum aghana wenena, “Malia uahane,” senenne neneag agha sae lopsiogpa, ot Allahri aruklamsilne mo ul palamlom. Allahri aruklamsilne ul palamlomne pere agha malinge a'unag wamlange wepto toboglamsil andarina, Allahri senenne mo a'unag mauptaleba, ya'ag kamag wamlulom. 23 Nimiri malia uropne sembe nunag tanepnena, ot tepnange agha nunag talamso. Aghana Allahri nimiag wana yororo tarelamsilnena, nu Saelba Uhiropne Yesus Kristus pere agha ya'ag kamag uro unne tarelamsil.