Allahap wana porog nenelamsil nimiap ma'aptanepne sembe
5
1 Nuri Yesusag wana palilamap tanena, Allahri nu, “Wana porog nimi,” sembamsil. Ane sembe, nu Saelba Uhiropne Yesus Kristus pere agha Allahap nunap ma'aptangkamap. 2 Yesusag wana palilamapne pere agha eldi Allah whingag enero poa sekililamsilba, Allahri wana nunag yorolamsil. Nunag wana yorolamsilba, nu wana yeng uro nang-nang alamapti, “Allah ponekoag imang wareroba wamlange nunag babe leknebahilul,” aro tilamap. 3 Wana yeng uro wamapnena, amik uro yabinepne sembe mo kom, aghana wene seklelamapne babe wana yeng uro wamap. Nu el uro wamapnena, nu seklenne seklelamapne pere agha el talamapti, “Wana palingkina sol wali uro ulamukap,” aro el talamap. 4 Wana palingkina ulamapne pere agha Allahri wali senelamsil. Wali senelamsil tanena, nuri wana yeng uro tiboglamap. 5 Nuri elag wana palingkina tiboglamap tanena, alinge nunag uahilul kom. Allahri Eldamne Yame Walinge nunag tarelamsilba, nuri wanaag to'oboldalamla andarina, Allahri nu o'ona maiknoro senelamsilne el talamap. Ane sembe alinge nunag uahilul kom.6 Allahri nu o'ona senelamsilnena, nu mikip kom uro wamuburi, Allah kipna koma salik-malik ulamubu. Undo wamubu aghana Allahri, “Wene tebalul,” sembaog sumeneko Kristus poneko nu sembe tatsiogpa tebaog. 7 Kristus nu sembe tebaogne anena, mog so'oag nimiri nimi pelebahinepne saog tebaog kom. Nu mog so'oag nimiri senelamapti ulamnep nena, nimi nhon wana porog nimi to, wali nimi to, tanena nimi eneko sembe ot nimi nhon-nhondi, “Nangkae pelebanundi nan agha wali omneikpa tebanun,” sembanep. “Nimi malinge sembe tebanun,” sembanepne nunag orog. 8 Aghana Allahri senerop nena, mog so'oag nimiri seneropneap sunsunum kom. Nuri walinge uan koma malinge ulamubu aghana, Kristus poneko nu sembe tebaog. Tebaogne pere agha Allahri nu o'ona senelamsilne lag nembarelamsil.
9 Kristus eneng lanaro tebaogneag agha Allahri nu sembe, “Wana porog nimi,” aro tam orog nenelamsil tanena, wene Kristusap ma'aptangkamapne pere agha Allahri nunag wana yo pimnep sumeneko taulbahilul. 10 Wana yo pipsilul kom nena, tam nene sembe. Nu samenag Allahap aisa neneptangto ulamubuag Elme nimiri obekpa, tebaogne pere agha Allahap nen samoro ma'aptabu. Wene el tebaogne pere agha Allahap ma'aptangkamap tanena, Elme nen kamag taogti wene wamlange pere agha, nen phelekto yeplamsileri, sik tapto taluro wali nembahilul. 11 Abeneog kom. Samen Allah aisa nembabu aghana, wene Allah si paliag nenelamapti, “An Anme Yesus Kristus nu Saelba Uhiropne pere agha samoro ma'aptangkamap,” aro kiplamap.
Adamap Kristusap abeneko sembe tibin nembatsiogha
12 Allahap ma'aptangkamapne nene sembe, samenag Allahri mog so'o sumbaogne walinge aghabog wamog aghana, nimi nhondi uaogne pere agha nimiri malia unne lag taog. Malia uropne neneag agha tepna babe lag taog. Ane saog uro nu mog so'oag nimi ni malia urop nimi wamap ane sembe, nimi ni teplamap. 13 Allahri aruksirop yubu anam Musaag ambatna komag, mog so'oag nimiri malia ulamek. Malia ulamek aghana, aruksirop yubu orogti, irikna ekon tanena, nimiri malia uropne sembe, “Iriktop yubu ingisaplamlom,” aro babe wene senep kom. 14 Adamdi uaogneap, nimiri malia ulamekneap tamna nikne kom. Allahri irikna pibogne Adamdi ingisabogti, malia uaog. Nimiri malia ulamek nena, Allahri iriktop yubu eneko Musaag pimna komag agha malia ulamek. Iriktop yubu orog aghana, Adam wamog ko'oag agha Musa mangkaekpa wamog ko'o li eneko babe, tepna ulamogpa, nimi teplamek. Nimi teplamek nena, Adam nimi nhonog wamogti, eldi malia uaogne pere agha nimi niag teptopne uro yabiogpa, nimi ni teplamek. Nimi nhondi uaogpa, nimi niag uro yabinepne sembe Adam poneko sunumna taog. Allahri amik, “Nimi nhon yalul,” seogpa, “Amik yalul,” seogne poneko yingkiropne pere agha walinge nimi niag uro yabinep. 15 Aghana, “El yalul,” seogne ponekori Adamdi iriktop yubu ingisapto malia uaogne saog uropne kom. Nimi nhon Adam ponekori irikna ingisapto malia uaogne sembe nimi along nelepto teplamang. Aghana Allahri mog so'oag nimiag wana yorolamsilneag agha tarelamsilne nubu uro tarelamsil. Nimi nhon pere tarelamsilne ane, Yesus Kristus ponekori wana nimiag yorolamsilneag agha nimi teng-tengne sembe nubu uro phelekto tarelamsil. 16 Allahri walia tarelamsilneap, Adamdi malia uaogneap tamna nikne kom. Nimi nhondi malia uaogne sembe Allahri tam lelekto karebaogti, ikinne nimiag pibog. Aghana Allahri mo tarelamsilnena, nimiri maikno uro aruksirop yubu ingisapto irikna philamek aghana, sinag wana porogne tarelamsil. 17 Nimi nhondi irikna phibaogne pere agha tepna lag taogpa, nimi tepna umag taburi teplamang. Nimi nhon pere agha teplamang aghana, Allahri nubu uro mo tarelamsilnena, nimi nhon pere agha nubu uro tarelamsil. Eldi wana maiknoro nunag yorolamsildi, nimi nhon tatsiogne Yesus Kristus pere agha nu wana porog nimi nenelamsil. Nu samen tepna umag tabu aghana, kamag taukap sumeneko Yesus Kristus pere agha nubu nimi saog taberi, saelba ulamsukap.
18 Ane sembe nimi nhondi ik nhonog irikna phibaogneag agha ikinne pibogne nene nimi niag taog. Ane saog uro nimi nhondi wana porogti walia uaogneag agha ina yarebatsiog andarina, nimi ni sembe wana porog nimi nembahinepba, kamag wamnep. 19 Anena, ot nimi nhonogti yubu ingisapto malia uaogneag agha malia urop nimi teng-tengne taog. Ane saog uro ot nimi nhonogti Allah yubu sunsunum uro wali uro ulamogneag agha wana porog nimi teng-tengne nenelamsiogti nenelamsilul. 20 Allahri irikna palilamogti, “Nimiri irikna philamikti, malia maikno ulamukang,” aro el wamogti, aruksirop yubu eneko ambatsiog. Aruksirop yubu ambatsiogpa, yubu nene irikna philamekpa, malinge ulamekne maikno talamog. Malinge uropne maikno tanep aghana, Allahri nunag wana yorolamsilne nubu tangto phelektopne ulamla. 21 Samen mog so'oag nimiri, “Malia uahabe,” senelamekne neneri nimi arukna nenelamsiogpa, nimi teplamek. Teplameka teplamang aghana wene, Allahri nu wana walingeag agha, “Sin saelbamsinun,” aro nunag nubu uro wana yorolamsil. Wana walingeag agha saelbamsildi, nu Saelba Uhiropne Yesus Kristus ponekori wana porog nenelamsilne pere agha nu ya'ag kamag nembahilul.