Abraham ponekori Allahag wana paiamogne sembe ambatsiogha
4
1 Allahag wana paliropne sembe nu Yahudi nimi nunisag Abraham ponekori Allahag wana palilamogti, el talamogne sembe seneraglamsut. 2 Abraham ponekori walia maiknoro uanep andarina, Allahri el sembe “Wana porogne,” sembanep. Undo uro yaboho tanena, Abraham ponekori eldamne maiptanep. Ot Abraham ponekori Allah whingag eldamne “Walia uahinge,” aro maibiltananne babe orog. 3 Eldamne maiptangto lemnep komnena, Allah yubuag mome toro paibogne ane:“Allahri lebogne nene sembe Abrahamdi, ‘Ot sik uro lelamla,’ aro Allahag wana paiamogpa,
Nuni Allahri, ‘El wana porogne,’ sembaog,”
aro mome toro pibog.
4 Nu mog so'oag nimiri senelamapnena, nimiri nuringe awe topsengba kamna tatsisebe. Nuri wana sinag yororopne agha mo tatsirop kom aghana, “Eldi naringe awe toplaba, kamna kapto tatsin koma wamnep kom,” senenneag agha tatsirop. 5 Ot Allahri nunag tarelamsilne undo kom. Nuri walia uropne agha Allahri nu sembe “El wana porogne,” senelamsil kom. Allahri “El wana porog nimi,” senerop nimina, sin nimiri El sembe, “Salik malik urop nimi taneko Allahri wana wendogne porogne tatsilul,” aro Allahag wana palilamik tanena, Allahri nimi taneko wana porog nimi nenelamsil. 6 Tam nene sembe samenag Daudti nik yubu agha sepna mome toro pibog. Mome toro pibogne sunsunum urona, nimiri walia uan kom aghana, Allahri nimi eneko sembe, “Wana porogne,” sembamlaba, nimi eneko tapto wana yeng sembalul. Daudti sepna seplamogti,
7 “Irikna phirop nimi enekoag tam nembanep aghana, elag tam nenerop kom tanena,
irikna phirop nimi eneko wana yeng uro wamla.
Nimiri malia uropne neneko Allahri kemban koma niknilamla tanena,
nimi eneko wana yeng uro wamla.
8 Nimiri malia uropne neneko Saelba Uhiropne ponekori nimi enekoag tam nenerop kom tanena,
nimi eneko wana yeng uro wamla,”
aro sepna sebog.
9 Daud ponekori, “Nimi eneko wana yeng urop,” seogne nene sembe seneraglamsut. Ot Yahudi nimi kon tepsirop nimi sembe agha lebog to, sin kon tepsirop kom nimi sembe babe lebog to? Nuri yubu ambarelamsiapnena, “Abrahamdi Allahag wana palilamogne sembe Allahri Abraham sembe, ‘Wana porogne,’ sembamog,” alamap. 10 Abraham wela saog nimi wamogpa Allahri, “El wana porogne,” senelamogne sembe seneragsut. Abraham kon kareptop sum agha Allahri, “El wana porogne,” senelamog to, anam kon kareptop komag agha, “Wana porogne,” senelamog to? Kon kareptop sum agha kom aghana, Abraham anam kon kareptop komag Allahri, “El wana porogne,” senelamog. 11 Anam kon kareptop komag agha Allahag wana palilamogpa Allahri, “El wana porogne,” senelamog. “El wana porogne,” senelamogha sembe kekneba nhon el nongag kere kon karepto kon tebek. Ane sembe, nimi niri kon kareptop komag agha Allahag wana palirop tanena, “Nuni Abrahamdi Allahag wana palilamog saog uro ulamap,” senerop. Nimi taneko babe Allahri, “Wana porog nimi,” senelamsil. 12 Nu Yahudi nimi kon teptop nimiri babe, “Nuni Abrahamdi uaog saog uro uahabe,” aro ulamap. Ot nuni Abraham poneko mo kon karepto kon tebek kom aghana, Allahag wana palilamogpa, kon karepto kon tebek. Nuni Abrahamdi anam kon kareptop komag agha Allahag wana palilamog saog uro ora nimiri nelepto ul palamangdi, sin nimi tanekori babe, “Nuni Abraham,” aro wene alamang.
13 Tam nene sembe seneragsut! Allahri Abrahamag salag palilamogti, “Anap, an wapmenba, mangaro pilili selengeabag mog so'o tatsineba saelbalulom,” aro salag pibog yubu nene, Musari aruksirop yubu pere agha saelbaek kom. Ot Abrahamdi Allahag wana palilamogpa, “El wana porogne,” sembamogne sembe Allahri Abrahamag salag lekto, “Mog so'o tatsineba saelbalulom,” aro yubu lebog. 14 Allahri Abrahamag salag pibogne nhon, amik Musa pere agha aruksirop yubu ambatsiogne babe nhon. Nimiri Musari aruksirop yubu saelba ul piropne pere agha Allahri tatsinun seogne saelbanep kom. Aruksirop yubu saelba ul piropne pere agha saelbamseng tanena, Allahri tatsinun aro salag pibogne neneko phelekaho. Aruksirop yubu saelba ul piropne agha saelbanep tanena, nimiri Allahag wana paliropne neneko ilil taho.
15 Nari lemnange nenena, Musari aruksirop yubu neneag irikna palilamog. Irikna phiro alamapne sembe Allahri wana yo nimiag pimnep. Aghana, aruksirop yubu wamna komag, irikna orog tanena, irikna phiropne babe wamnep kom. 16 Ane sembe Allahri tatsinun aro salag pibogne saelbanepnena, Elag wana palilamna taneogna saelbanep. Allahag wana pipsebeba saelbanep andarina, Allahri nimiag wana yorolamsilneag agha “Tatsinun,” aro salag lebogne ot sik uro Abrahamdi kelmabo meag tatsinep. Nu nimi sisa ni wamapne sembe, “Nuni Abraham,” senep. Abraham kelmabo meag, “Tatsinun,” aro salag pibogne anekona, ot sin Yahudi nimiri Musari aruksirop yubu saelba ul pirop nimi agha kom. Abrahamdi Allahag wana palilamog saog uro wana palirop nimiag babe, “Tatsinun,” seog. 17 Tam nene sembe mome toro pibekneag Allahri, “ ‘Nimi sisa nubunge mog so'o a'ero-a'ero wamik nimi sikinisang talulam,’ aro sekelilangken,” aro salag pibog. Salag lero pibogpa, Allah wamoghag aneko Allahag Abraham ponekori, “Sik lepla,” aro wana paiamog. Wamna kom aghana Allahri, “Lag talul,” seleba ot sik lag talul. Nimi teptopne babe kamag nembahinepne ponekoag Abrahamdi wana paiamog.
18 Allahri wene seogpa nimiri, “Undo uro yabilul aro tiro wamnun,” sembanep kom aghana, Abraham ponekori sik sembaog. Allahag wana pairo sik sembaogneag agha nimi mog so'o tala-tala wamang nimi sikini taog. Allahri elag, “An wapmenba mangaro pilili selenge undo-undo wamukang,” aro salag pibogne sunsunum uro tala-tala wamang nimi sikini taog. 19-20 Abraham poneko hengkun taibuka taubuka teng wilindi eptopne supna tarabare (100 tahun) saog wamogti, nong tebanep saog wamogpa, elkel Sara babe ibiliri sabal taogti, keleneko me monag babe wamnep kom wamog. Wamogpa Abraham tam nene sembe el uro wamog aghana, wana phende seneragna koma Allahag wana paiamogti, sik senelamog. Allahri salag pibogne Abraham ponekori mikip uro saelbamogti, sae limna koma Allahag wana paiamogti, kipto omeklamog. 21 Abrahamdi Allahag wanaag to'opto seneraglamogti, “Eldi salag lero ambatneonge ponekori mikipti sunsunum uro ualul,” aro el wamog. 22 Ane sembe Allahri, “El wana porogne,” senelamog. 23 Allahri el sembe sembamogne Allah yubuag mome toro pibek aghana, ot Abraham mo sembe pibek kom. 24 Nu sembe babe mome toro pibek. Nuri seneraglamapti, “Nu Saelba Uhiropne Yesus teptobag agha Allahri kamag nembaog,” aro elag wana palilamap tanena, nu sembe babe, “Wana porog nimi,” senelamsil. 25 Nuri Allahri aruksirop yubu ka'eban koma irikna phibabu aghana, Allahri tam nene sembe Yesus poneko tatsiog. Tatsiogpa obekpa, tebaog aghana, “Wana porog nimi taukang,” aro teptoba agha kamag nembaog.