3
1 Yahudi nimiap Yahudi kom nimiap Allah whingag nika-nika urop ane sembe, Yahudi nimiri nanag hailamneikti, “Nu Yahudi nimi sembe paliag nembahinepne babe orog selam, te? Kon tepto ul palamapneri babe nimi yepsinep kom selam te?” aro wene haibanukang. 2 Wene aro haibanep aghana undo sembaheng kom! Walinge nhon sao nhon sao Yahudi nimiag maikno wamla. Samenagnena, Allahri yubu lelamogne sin Yahudi nimi ambarelamsiogti, “Yae paiamlulom,” aro saeag pibog.3 Allahri yubu ambarelamsiogti, saeag pibog aghana, Yahudi nimi nenneri sik semban koma wali uro saelbaek kom. Sik semban koma uaek tanena Allahri, “Uanun,” aro salag pibogne aneko kom nembalul te? 4 Undo seneragseng kom! Ualulneog. Nimi ni babe orolenange lemnep aghana, ot Allahri orolenange lemnep kom. Elmo sikne aghabog lemnepne wamla. Tam nene sembe sepna siptop nimi nhondi Allah omekto mome toro palilamogti,
“Andi yubu leropne lambaleba, nimi ni sikne aro el taukang.
Andi tam kareplapmenneag agha paliagne neneptalulam,”
aro mome toro pibog.
5 Mog so'oag nimiri sengkwanektop senenneag agha sunumna nhon tomnun. Nimiri yubu lemnep nena, “Nu mog so'oag nimiri sop-sop porog uro lero urop komne ulamap. Porog urop komne ulamapne pere agha ot Allahri porog uro lero uropne lag talamla. Allahri porog uro lero uropne lag nenelamap tanena, sa'a ta'ip agha Allahri nunag wana yo pipsinep? Undo nunag wana yo pipsile tanena, sik komneag agha nunag wana yo pipsinep te?” aro nimiri sengkwanektop senenneag agha yubu lemnep. 6 Undo seneragseng kom. Undo seneragna pagha tanena, Allahri mog so'oag nimiri uropne sembe tam porog uro karebatsinep kom. 7 Wana porog kom nimi anekori yubu lemnep nena, “Nari orolenange lemnange pere agha nimiri el wamukang nena, Allah Elmori yubu sikne agha lelamla,” aro yubu lemnep. Sin wana sengkwanektop nimiri seneragnep nena, “Nari orolenange lemnange sembe nimiri Allah kibukangne nubu tangto talul. Allah kibukang ane sembe, Allahri nari tam karebi agha ‘Mali ualam,’ aro ikinne nanag pimnep te?” aro haibenep. 8 Na Paulusti undo lelamna kom aghana, ora nimiri nu sembe san tilipto, “Undo lelamang,” aro lolon yubu lololamsiang. Nimi etneri, “ ‘Walinge lag talul,’ aro malinge uanun,” aro yubu ambatsile tanena, Allahri nimi enekoag tam karebaleri, sunsunum uro ikinne piplul.
Nimi nhon babe Allah whingag sikne wamla kom seogha
9 Wene aro lemna pagha tanena sa'a sukap? Nimi sisa nhon paliag wamlaba, sisa nhon umag wamla te? Kom! Lemnange kaupto lemnuan. Nimi niri malia ulamap. Yahudi nimi babe, Yahudi kom nimi babe, wana malinge seneragnari nu nimi ni wana kauplamsildi saelbamsil. 10 Tam nene sembe mome toro palilamekti,
“Nimi nhon babe wana porog uropne nhon wamla kom.
11 Nimiri tam wali uro seneragnari el tangtopne orog.
‘Allahap nanap sae tiptangto wamseneme,’ aro el torop nimi babe orog.
12 Nimi niri wail ibarelamongdi, sindam nimi wana loba neneldalamongdi,
Nimi nhon babe wana walingeag agha uropne orog.”
13 “Sindi homamangagna, nimi teptoba so'o lomag siktoba saog wamla.
Sindi silimuag agha ot orolena yubu lelamang.”
“Sindi pamna, paghaeri nimi opsineba saog wamla.”
14 “Sindi silomag nimi yo'orop yubuap warop yubuap teknel talamla.”
15 “Sin nimi tanekori, ‘Nimi opsibeba, eneng lambalul,’ aro men phea palamang.
16 Tala-tala palamangag loba nenero poa palamangba, nimi seklelamang.
17 Nimi taneko nimiap ma'aptangto uropne sembe sin ekon.”
18 “Nuni Allah kipto, ‘El mo nubunge,’ senelamseng aghana, log komdi, kiplamang kom,”
aro mome toro pibek.
19 Yubu nenena, aruksirop yubu saelba ul pirop nimi sembe mome toro pibek. Sin sembe pibek tanena, nu el wamapnena, Yahudi nimi sembe mome toro pibek. Ane sembe Yahudi nimi nhondi babe, “Na malinge urop komne,” senep kom. Malia uropne nene koloptanep komdi, mog so'oag nimi niri ulamapne sembe Allahri tam kembaleri karebalul. 20 Tam karebalul aghana, aruksirop yubu eneri nimi nhon babe wana porogne nembahinep kom. Aruksirop yubu ene pere agha nu mog so'oag nimiri, “Mali-malia ulamap,” aro el talamap. Ane sembe, Allahri mog so'oag nimi nhon sembe babe, “Aruksirop yubu ni wali uro saelba ul piropti, wana porogne neneptangtop,” selul kom.
Nimiri Yesusag wana paliropne pere agha wana porogne tanep aro ambatsiogha
21 Musari samenag agha aruksirop yubu pere agha Allahri wana porogne ambarelamsiogpa, Allahri yubu silimu tiptop nimiri babe undo ambarelamsiek. Aghana wene Allahri wana porogne lag nembatsionge aruksirop yubu pere agha lag nembatsio kom. 22 Yesus Kristusti Allahag wana pairo ulamogne pere agha Allahri wana porogne lag tao.a Nimi etneri Yesusag wana palilamla tanena, Allahri nimi sisa kembahin koma nimi eneko sembe, “El wana porog nimi,” senelamsil. 23 Nimi sisa kembahin komnena, mog so'oag nimi sumbahiogne Allah ponekoag imang wareroba wamlaba, nunag babe leknebahiso aghana, nimi niri malia ulamububa, nunag kom taog. 24 Nunag kom taog aghana, Allahri wana yorolamsilneag agha nuri malia uroba sembe mo tam kom nenero, “Wana porog nimi,” senelamsil. Mo tam kom neneropnena, nu Yesus Kristusap ma'aptangtop nimi sembe Kristus ponekori nu sembe kamna toptaogne pere agha tam kom nenero wana porogne nembamsil. 25 Samenag nimiri malia ulamekne sembe Allahri sik uro tam karebahiso tanena nimi taneko opsiso. Aghana opsin koma wana palingkiogti, “Nari wana porogne lag talul,” aro Elme Yesus tatsiog. Tatsiogpa obekpa, nuri malia uropne “Kom talul,” aro eneng lanaro tebaog. Nimiri Yesusag wana palilamle tanena, Allahri nimiri malia uropne kom nembanep. 26 Allahri wana paiamog ane sembe, El wana porogne wene lag tal. Wene lag talnena, El mo wana porogne wamlaba, nimi etneri Yesusag wana palilamla tanena, Allahri nimi eneko babe, “Wana porogne,” aro malia uropne tam kom nembarelamsil.
27-28 Undop pagha tanena, nimi nhondi eldamne maiptangto, “Nari Musari aruksirop yubu ni saelbamnari uan ane sembe, Allahri na sembe wana porog nimi sembamnel,” aro maiptanep, te? Kom! Ot nuri Yesus Kristusag wana paliropne pere agha Allahri nu sembe, “Wana porog nimi,” sehilul. Musari aruksirop yubu salero ul piropneag agha nimiri eldamne wana porogne neneptanep kom. Ane sembe, nundam nimi maiptanep kom.
29 Allah ponekori ot Yahudi nimi agha saelba ulamsil te? Kom! Nimi sisa Yahudi nimi babe, Yahudi kom nimi babe saelba ulamsil. 30 Sik. Allah nhonog wamlange ponekori nimiri Elag wana palirop nimi sembe, “Wana porog nimi,” senelamsil. Yahudi nimi kon teptopnang babe, ora nimi kon teptop kom nimi babe, nimi etneri Yesus Kristusag wana palirop tanena, sin nimi taneko sembe, “Wana porog nimi,” senelamsil.
31 Wene, “Allahag wana paliropne pere agha wana porog nimi tanep,” aro lemna tanena, nimirina nunag, “Musari aruksirop yubu neneko teba'en alamlom, to?” aro haibahinep. Undo sembaheng kom! Nuri Allahag wana palilamapne pere agha aruksirop yubu eneko, “Yubu sikne,” aro saekag nenelamap.