Zakheus kal araag waelbaogti tibaogha
19
1 Yesus “As Yerusalem tipto punun,” aro as Yerikho aneko wa'ina palamog. 2 As Yerikho enekoag nimi nhon saeagha tupne nhon sina Zakheus wamog. Zakheus poneko, “Roma nimi sembe kal ma'al payalulom,” aro Yahudi nimiag arukto poloro torop nang sikini wamog. 3 Zakheus ponekori, “Yesus yalamlange poneko wela saog nimi wamlange imnun,” aro ulamog aghana, nimi maikno to'op wamekpa, el nong purundi Yesus imnep kom wamog. 4 Ane sembe Zakheus el samenag merero menangal piogti, “Yesus yalamlenge imnun,” aro kal ara nhonag waelbaogti, tibogto wamog.5 Kal ara waelbaogti wamogpa, Yesus kal ara tamag aneko sekel piogti tiwalengkaogti, “Zakheus elemag kulukulae! Nari sumene, ‘Tala mapsene?’ sembamnari, andi aeag pinemeri wamnunam semban,” seog.
6 Wene seogpa Zakheus poneko elemag kulukulaogti, yeng uro kipto tolamogti, Yesus enero poa eldi aeag piog. 7 Eldi aeag enero poa wa'alamogpa, nimi wamek nimi tanekori, “El Yesusna sa'a sembe malia aghabog ulamla nimi enekori aeag wa'al pil?” aro yubu mali uro lelamek.
8 Wene aro senelamekti, yubu mali uro lelamek aghana, Zakheus sekogti Yesusag yubu lelamogti, “Nai, ka'ebalulam! Nari tuba saeag wamlange agha nari pogto phende nembi agha, nhon nandamne sembe piamneri, ‘Phendepnena nimi saeagha orog nimi sembe tatsinun,’ aro lag phoro lelamna. Neapna, nari samenag mane agha, ‘Roma nimi sembe kal ma'al poloro payalulom,’ aro aruklamsino aghana, kal ma'al phelektopne salero teno tanena, phelektopne nene nen lumbanun. Nimiag samoro tatsinunnena, sindi saeag agha phelekto tomnonge aghabog tatsinun kom aghana, nen maupto ik tombare lumbaloa saog uropne ma'aro tatsinun,” seog.
9-10 Wene seogpa Yesusti nimi tanekoag, “Nunisag Abrahamdi samenag, Allahag wana paiamog saog uro ae ene ngainge ponekori babe ‘Sikne,’ aro seneragto ulamla. Na Allahri wepto pogneogpa, mog so'oag nimi tahinge nenena, ‘Nimi ka'eseptangtop nimi ebahineri, wali nenero taulbahinun,’ aro yahi. Sumene ae aneag yanba, nunisag Abrahamdi samenag Allahag wana pairo kibog saog uro, ae ngainge ponekori babe nanag ‘Sikne,’ aro seneraglamneldi, yeng uro na kipto ae lom neneag tobongkipnel. Ane sembe, sumene Allahri nimi taluro saelbahinepne ae lom aneag kekneptal,” seog.
Tupne nhondi kamna kaptoba emas el arukna saeag pipsiogne sembe Yesusti likiptop yubu sunuro ambatsiogha
(Matius 25:14-30)
11 Yesusti yubu ambarelamsiogne as Yerikho wamek nimiri ka'elamek. Ka'elamekti sindi sembameknena, “Yesus wene as Yerusalem palamlari, nuri as Yerusalem peram wamabag yal. Undop agha, Yesusna Allahri wepto poghogne poneko wamsori, Yerusalem pile sumeneko El mori alniro nu sembe yubu sia lero saelbamsiso,” sembamek. Undo sembamek ane sembe, Yesusti sunumna yubu tolbina nimi tanekoag ambarelamsiogti, 12 “Nimi nubunge nhon wamogti, ‘Weag mog so'o nonoag pineba, na yubu sia leropne towalengkaneik tanena, samoro yanun,’ sembaog. 13 Wene sembaogti, anam pin komag eldi arukna sa'o bare yopsiog. Yopsiogti sinag kamna kaptoba alikinag uropne leng-leng aroba emas agha sunurop wanange sin a'ero-a'ero nhon-nhon tatsiog.a Tarelamsiogti yubu ambatsiognena, ‘Na palamneba, wamna komag a'undi kamna kaptoba wanange tatsinne neneag agha na sembe nen ma'aro nubu nembarelamnumun kekman samoro yanun,’ seogti sindi saeag nembaog.
14 Wene aro tatsiogti, piog aghana as eneko wamek nimiri el sembe sin karongdi nimi poglamsiekti, ‘A'un pimundi, nimi eneko towalenkipnep nimiag ambarelapmundi, “Nimi neneko sembe nu sae saekag komdi, el yubu sia leropne towalengkipseng kom,” sululom,’ aro nimi pogsiek. 15 Pogsiek aghana tup nimi nubunge poneko towalengero, ‘Mog so'oag wamang nimi sembe yubu sia lelamlul,’ aro sekirekpa, nen samoro eldi as enekoag yaog. Yaogti, ‘Nari kal ma'al tatsinonge nubu nembaong to?’ aro eldi arukna samen kal ma'al tareamog nang eneko yopsiog.
16 Wene aro yopsiogpa, nimi samenag yaog nimi enekori ili nimi nubunge ponekoag ambarelamogti, ‘Nai, andi kamna kaptoba wanange ot nhon tatneomne nenekoag agha nari saelbamnori, nen wana mauamloa saog uropne sa'o bare nembano. Andi samen nhon tatneomneap, nen sa'obare nari saeag taongeap ni tarelangken,’ seog.
17 Wene eldi arukna anekori, ‘Sa'o bare nembanori tarelangken,’ seogpa ili ponekori, ‘An sik uro nari arukna walinge wamlam! Nari ologha tatkeno aghana, andi wali sik uro saelbaom. Ane sembe nari an towalengkagheneba, as soro kalurop as sa'o bare nimi sembe yubu sia lelapmendi, nari umag saelbamsululam,’ seog.
18 Eldi arukna phendepne eneko ambarel aogti, ‘Nai, andi kamna kaptoba wanange ot nhon tatneomne nenekoag agha nari saelbamnori, nen wana mauamloa saog uropne lambare nembano. Tatneomneap nen lambare nenekoap ni tarelangken,’ seog.
19 Wene seogpa ili ponekori eldi arukna anekoag, ‘Wali ulamomba, Nari an towalengkagheneba, as soro kalurop as lambare nimi sembe yubu sia lelapmendi, nari umag saelbamsululam,’ seog.
20-21 Eldi arukna wilindipne neneko yaogti ambarelamogti, ‘Nai, nari an sembe el wamnari, “Nari nai nimi yonge logne wamla,” sembano. Andi nimi luknuhiro nimiri saeagha uropneap, andamneri wero meroan komneap sop-sop taluro tolamsilam. Ane sembe, nai, andi samenag kamna kaptoba wanange tatneomne neneko “Ka'eseptaleag,” aro ta'esoma lomag wali uro wa'amogto paiamno. Kembalulam. Wene ane wamlaba, nen samoro tarelangken,’ seog.
22 Wene seogpa, ili ponekori samoro yubu lelamogti, ‘An nari arukna teba'en uropne wamlam. Andi nanag ambatnelamdi, “An nimi yonge wamlamdi, nimi luknuhiro nimiri saeagha uropneap, andamneri wero meroan komneap sop-sop taluro tolamlam,” senelamnelamdi yubu ambatnelam, te? Andi wene aro yubu ambatnelamneag agha nari an sembe tam lelekto karebaneri, anag ikinne pelengkanun. 23 Andi na sembe, ‘Elna nimi undopne wamlaba na log,’ sembahom tanena, kal ma'al nari tatkenonge neneko poa nimi elne sik uropne saeag pilphinep. Sin el uropnangdi saeag pil pohomdi, ‘Kal ma'al neneko nubu neneptangto wana mauamleba, nani nen samoro yaleba, mauropne nene naniag talul,’ aro uahom tanena, nari tatkenongeap, nen phelektopneap topsene,’ seog.
24 Wene seogti nimi nubunge yubu sia leropne ponekori nimi wamek nimi tanekoag ambarelamsiogti, ‘A'undi kamna kaptoba wanange nhon ane eldi saeag agha toplulom. Topmundi elkae sa'o bare nembao nimi enekoag tatlulom,” seog.
25 Wene seogpa, nimi wamek nimi tanekori lelamekti, ‘Nai! Elna kamna kaptoba wanange sa'obare salelamlaba, “Nen tatlulom,” selamne neneno,’ aro wene seek.
26 Wene seekpa, nimi nubunge yubu sia leropne ponekori sinag samoro yubu lelamogti, ‘Nari lelamnange ka'ebahut. Nari tatnangeag agha nimi etneri nen wana mauropne nubu neneroale tanena, nimi enekoag nen ma'aro tatnun. Aghana nimi nhonag, “Nubu neneroalulam” aro el saeag nemban aghana, nimi enekori nubu neneroale kom tanena, el saeag wamlange babe nen toro anun,’ seog.
27 Wene seogti, nimi nubunge ponekori nimi tanekoag ambarelamsiogti, ‘Wene pumundi, nimi nanag aisa nenelamneangdi, “Nu as enekoag nimi sembe yubu sia leropne talul kom,” alamong nimi tolbina payamundi, na whingag anea ya'ag opsululom,’ seog,” aro Yesusti sunumna yubu ambatsiog.
Yesus nimiri kiplamekpa, as Yerusalem wa'iogha
(Matius 21:1-11; Markus 11:1-11; Yohanes 12:12-19)
28 Yesusti ni aneko wene aro ambatsiogti, sin whingag toman agha menangal palamogti, Yerusalem sip walelamog. 29 Yerusalem sip walelamogti, yim Zaitun kongtenag sorop as Betfageap as Betaniap neneko kongten peramag piog. As phende abeneko peramag wamogti, eldi yubu ka'ero neleptopnang phende el whingag sip pogsiog. 30 Whingag poglamsiogti, “As nu whingag wamla asag enetag pururom. Purumundi wa'alamtumun abeneko tilamtumunba, pham keledai me nhon kerekamika iptururom. Ipturumun pham keledai ene alibag nimi nhon babe pham ene alibag pulingkirop kom pham enda ipturom. Iptumun pham ene lopto poa yarurom. 31 Loplamtumunba nimiri ipsikti hailogsikti, ‘Sa'a sembe pham ane loplamtom?’ aro hailogsik tanena, a'undi samoro, ‘Nuni nu Saelba Uhiropneri, “Na inna panne kwema wamnelba tolpurorom,” selba loplamnam,’ sururom,” aro ambatsiog.
32 Wene aro ambatsiogpa, sin phende Yesusti pogsiognang abeneko samenag pirekti kemelamdekpa, Yesusti ambatsiogha sunsunum uro wamogha iptek. 33 Iptekti pham keledai aneko loplamdekpa, pham ngainang anekori hailamsiekti, “Sa'a sembe pham keledai ane loplamdom?” aro haibahiek.
34 Wene aro haibahiekpa, sindi samoro yubu ambarelamdekti, “Nuni nu Saelbamsilne ponekori, ‘Na kwema,’ selba loplamnam,” serek.
35 Wene serekti, pham keledai me aneko lopto poa leptekti, Yesusag poa yarek. Poa yarekti, sindi nongag enektop ag kwiripto Yesus pukanebag pham keledai paliag aneko yangki agha Yesus keapto pham keledai paliag pukirek. 36 Pham keledai anekoag pulingkiogti palamogpa, nimiri sindi nongag enektop ag kwiripto Yesus ina yalamog ina anekoag yangalamek.
37 Yesus palamogha yim Zaitun kongtenag agha kulukulingkirobag anekoa as Yerusalem tiboghanebag palamogpa, Eldi yubu ka'ero neleplamek nimi niri alniro Allah omeklamek. Sindi samenag agha Yesusag neleplamekpa, Yesusti ik sulu kekneba ulamogti, “Yaghe, mane agha Allahri el pere agha ulamla,” senen kekneba ulamogha ililamekne sembe awiri yubu nubu uro Allah omeklamek. 38 Sindi yubu nubu uro lelamekti,
“Nuni Allahri nu Taluro Saelba Uhiropne poglaba,
yalamlange poneko paliag nenelamsut!
Nuni Allah imagneri aisa neneptan koma ma'aptangamukap.
Allah paliag sirik imag wamlange omeklamsut!”
aro omeklamek.
39 Wene alamekpa Farisi nimi agha nimi etbare sin anabiag wamekne tanekori ka'ebaekti, Yesusag lelamekti, “Nai, andi nimi amolamsilamne wamlam. Andi yubu ka'ero neleptop nimiri an sembe yubu lelamangne sunsunum komdi sinag ‘Yubu kom tahut,’ aro wembahilulam,” aro ambarek.
40 Wene seekpa, Yesusti samoro sinag, “Nari a'unag sik uro lelamna. Sindi babe yubu kom taheng tanena, sindi wene lelamang saog uro kirik so'oag ubu piamangne taneri babe haum alamseng,” aro sinag samoro ambatsiog.
41 Yesus as Yerusalem peramag piogti, as soro kalurop as Yerusalem aneko kembiagha Yesus engkaog. 42 Engelamsiogti, “A'un as Yerusalem nimi sumene wana hekahisoba, ‘Undo unuaberi, nu aisa neneptan koma aingniro wamukap,’ aro el tahom tanena, a'un wali wamnep. Aghana a'un whingag wamlange ililamlom komdi a'undi wana seneragnep kom. 43-44 A'un as Yerusalem nimi eneri na Allahri wepto pogneogne ponekori, ‘Taluro Saelbahinun,’ aro yalamnange iamnelom kom. Ane sembe, a'unag amik uro yabilulnena, a'un aisa nimiri as Yerusalem ane tembom kaembom aro sekelingiro yaikti, ‘Nimi opsukap,’ aro wea urobag kanero sobaukang. A'un aisa nimiri wea wa'aikti, a'un as Yerusalem nimi olopsukang. As ene tembom kaembom agha ni kwerekto pin serepna nembahiikpa, kirik pai sobi ubu walerop kirik enekoag agha nhon babe nen soroba sekamlul kom,” aro Yesusti as Yerusalem nimi engkatsiog.
Yesusti Allahri Mem Ae aramag wa'iogti, malia ulamek nimi yag lambahiogha
(Matius 21:12-17; Markus 11:15-19; Yohanes 2:13-22)
45 Yesus Allahri Mem Ae aramag wa'iogti kemelamsiogpa, nimi maikno wa'ina pail alameknena, “Nimiri kamna kapto tobukang,” aro pail alamekpa, kamna kapto tolamek. Yesusti ipsiogti, kamna kapto payalamek nimi yag lambahiog. 46 Yag lanalamsiogti yubu ambarelamsiogti, “Samenag Allahri yubu lebogne nimiri mome toro pibogne undo:
‘Nari ae anena, nimiri Ya'ag Uropne Poneko omekto molona molba urop ae wamlul,’ seog.
Aghana a'undi ulamlomneag agha ‘Nimi ohiro haoghaba torop nimi tognop tangtobag' saog nembaom,” aro Yesusti yag lambahiog.b
47 Yesus sop-sop Allahri Mem Ae aramag wa'ilamogti, nimi yubu ambarelamsiog. Yubu ambarelamsiog aghana, memnang Yahudi nimiri sae agha Allah sembe pairopnang sikiniyaboap, Musari samenag mome toro pibog yubu ambatsiropnangap, Yahudi nimi nubunangap tanekori, “Yesus obukap,” aro pa'asea sum elamek. 48 “Obukap,” aro ulamek aghana, Yesusti yubu ambarelamsiogne nimi maikno ka'elamek nimi ni tanekori sindi wanaag, “Yubu ambarelamsilne wali uro ka'elamsebe,” senelamek ane sembe, Yahudi nimi nubunangdi, “Yesus saelbaberi obukap,” sembamekne ina eraruk wamog.