“Nimi aruknari eldamne mombolag neneptangto ili sembe awe toplul,” aro Yesusti sunuro ambatsiogha
(Matius 18:6-7,21-22; Markus 9:42)
17
1 Yesusti eldi yubu ka'ero neleptopnang ambarelamsiogti, “Nanag wana paliro neleplamunba, ina ane toman perarekto phukul pineba saogne nhon-nhon lag talul tiog. Aghana nimi etneri punpun tiptoba piple andarina, nimi olog nimi anekori nanag neleplamneik nimi phukul ingkile tanena, punpun tiptoba piple nimi eneko tapto seklebalul. 2 Nimi enekoag Imagneri ikinne pipleba seklebanep nena, nimi eneko ngangag kirik ikinne kerekto mag longorop mag nubunge lautag talobol pinepne ane olog keyagman saog. Nimi etneri punpun tiptoba piple andarina, olog nimi nanag neleplamneik anekori phukul piik tanena, punpun tiptoba piple nimi enekoag Imagneri ikinne piplulne aghabog ikin sirik.3 Ane sembe a'undamneri, ‘Nimi ekel ina pabihibeag,’ aro yae togtangkamlulom. Abeneog kom aghana, ankaeri tam malinge ulamle tanena, nimi eneko wenelamlulam. Ankae anekori, ‘Nangkae malia uano aghana, nen uanun kom,’ aro wene alamle tanena, elag wana yo pimna koma tam wailag nembalulam. 4 Ankae anekori anag tam malinge ik saek bare babe ni nik sum ulamle agha anag ik saekpare yingkina, ‘Nangkae anag malia uan aghana, nen uanun kom,’ aro yalamle tanena, elag wana mali pimna koma eldi ulamlea tam wailag nenelamlulom,” aro Yesusti eldi yubu ka'ero neleptop nimiag ambatsiog.
5 Wene aro ambatsiogpa, Yesusti wepto pogsiognang anekori nu Saelba Uhiropne Yesusag yubu lelamekti, “Nai, andi leplamne nuri uahaberi, nuri wanaag anag sikne aro seneraglamapne yepto mikip nembahilulam andarina, sol wali uro ulamukap,” aro wene seek.
6 Wene seekpa Yesusti, “A'undi Allahag olog ‘Sikne’ aro wana palilamlomne nubu tahoba, kwarang si ologne nene saog taho tanena, a'undi sikne aro seneraglamsomneag agha, ‘Mane agha urop,’ senenne ulamsom. Sunumnana, a'undi Allahag ‘Sikne’ aro wana palilamsomdi, a'undi kal yareng mikip uro so'oag pelengerop kal aneag lelamsomdi, ‘Telbom agha lepmendi, mag nubu uro longorop mag lautag meltal pululam,’ sehomba, sik uro kal aneko telbom agha mag nubu uro longorop maghag meltal pinep.
7 Nari a'unag, ‘Ulamlulom,’ aro ambatsinne sembe sunumna sumbatsinun. A'un tane wamlomne agha nhondinge arukna nhon awe wenne to, pham domba paia uhinne to nhon wamnep. Arukna aneko aweag agha to, pham domba paia urobag agha to yalamsoba, iliri elag, ‘Nangkae, pulaeri kwaneng abene telame,’ alamso kom. 8 Wene ‘Pulaeri kwaneng telame,’ sen koma iliri arukna anekoag, ‘Na kwaneng tununne wero yobatnemendi, andamne mag a'aleptangto ag walinge wangkamendi, nari kwaneng magap telamnenge payalulam. Nari yubu lemnenge sembe peramag nang-nangaro sekapmenba, kwaneng mag tene taneogna, anna amik tululam,’ senep. 9 Eldi arukna anekori ili yepto uropne sembe, ili ponekori el kipto, ‘Wali nari yubu lelamnange ka'elamneldi walia ulamnel,’ aro kiptop kom. 10 Ane saog uro, a'undi babe, sa'a-sa'a a'unag aruklamsinne sunsunum uro ulapmun tanena, a'undi, ‘Na kipneho,’ semban koma ulamlulom. A'undi wanaag mombolag neneptangto lelapmundi, ‘Nuna ot arukna aghabog wamapti, nunag kipsiropne sunsunum kom. Nuniri nunag aruksirop yubu sunsunum uro mo ulamobo,’ aro a'undi lemnep,” aro Yesusti eldi wepto pogsiognang ambatsiog.
Yesusti nimi sa'obare kon tena pololamsiog nimi wali nembahiogha
11 Yesus “Yerusalem punun,” aro palamogti, Samaria so'o wilnip Galilea so'o wilnip ina palamog. 12 Palamogti as nhonag wa'alamogpa, nimi sa'obare kon tena pololamsiog nimi El yalamog inaag yaek. Yaekti weag agha sekilingkina 13 haum aro yubu lelamekti, “Yesus! Nuni, Andi nu seklelamaba yareag sembahi,” aro haum alamek.
14 Wene alameka Yesusti sin tibogahiogti, yubu lelamogti, “A'un pimundi, mem nang Allah sembe pairopnangag ‘Nuri kon kembahilulom,’ aro lag neneptangto ambatsimunba kembahukang,” aro ambatsiog.
Wene aro ambatsiogpa, sin ina'ag palamek abeneko pere sinag kon tena pololamsiogne neneko kut tahiog. 15 Sin nimi sa'obare nang kut tahiog nimi agha nhondi el nongag kemeldalamogpa, kon tena pololamogne neneko kut taogpa, “Yesusti wene selag agha na wali tan,” aro el taog. El taogti, nen Yesus wamoghag samoro yingkina yubu nubu uro Allah omeklamog. 16 Allah omeklamogti, Yesus tamag yabu sanukto u amupto malingkina, “Naba Naniong! Andi na wali kut nembanelam,” aro Yesus kiplamog. Wene aro kiplamog nimi eneko Yahudi sisa nimi taptopne kom aghana, Samaria nimi enekori Yesus kiplamog.
17 Wene aro kiplamogpa, Yesusti hairo yubu ambarelamsiogti, “Sin kon tena pololamsil nimi sa'obare wali kut taang, te? Nimi enekori wene samoro kibil anel aghana, nimi supna bare abenekono? 18 Nimi ene Samariange elna, Yahudi sisa taptopne kom aghana, ot el mori samoro yingkina Allahag ‘Naniong,’ aro omeklamla,” seog.
19 Wene seogti, nimi enekoag yubu lelamogti, “Andi Nanag ‘Sikne,’ aro seneraglamnelamne neneri an wali nembangkel. Hae, sekmendi wali pululam,” seog.
Imag agha mog so'oag nimi taogne poneko nen samoro yaleri, mog so'oag nimi saelbahilulne sembe Yesusti ambatsiogha
(Matius 24:23-28, 37-41)
20 Farisi nimi nimi etbareri Yesusag hailamekti, “Allahri nimi mog so'oag nimi saelbahilea etsum agha lag tangto alniro uro yabilul?” aro haibaek.
Wene aro haibaekpa, Yesusti samoro, “Allahri nimi mog so'oag nimi alniro saelbahilenge nenena, nimiri kekneba kembiag agha, ‘Wene alniro saelbamsil,’ aro el tanep kom saog wamla. 21 Allahri nimi saelbamsilne neneko wene a'un nusamag wamlari, uro yabalamla. Ane sembe nimiri amik elamsengdi, ‘Allahri weptopne “Mog so'oag nimi saelbamsululam,” aro poghogne yaldi, taneko wamla, to? Tanoko wamla, to' aro ibukang kom.
22 Wene aro Yesusti Farisi nimiag samoro ambatsiogti, eldi yubu ka'ero neleptopnangag ambarelamsiogti, “A'un amik wapmundi, a'undi na imag agha mog so'oag nimi tahinge sembe senelapmundi, ‘Eldi nu saelba uhilulne poneko lag tahoba ipsebe,’ sembamun aghana, haingdi imnululom kom. 23-24 Nimiri a'unag amik yubu lelamikti, ‘Kembahut! El imag agha mog so'oag nimi taogne ponekori nu saelbamsinepne pone yaori ane wamla,’ alamik to, ‘Ano wamla,’ alamik to, sindi yubu sik semban koma a'undi sinag nelebahiseng kom. Na imag agha mog so'oag nimi tahinge amik samoro yalamne sum eneko uro yabilulnena, lepna imag tingkamlari, imag warero pabalamlange nene saog uro lag talul. Ane sembe nimiri, ‘El poneko ane wamla,’ alamik tanena sik sembahiseng kom. 25 Na samoro yanepne neneko undo lag talul aghana, na anam samoro yan komag, nimi wene wamang nimiri na wa'eplamneikpa, maiknoro seklebanun.
26-27 Na imag agha mog so'oag nimi tahinge nen samoro yane sumeneko, samenag Nuh wamog ko'oag wamek nimiri ulamekne saog uro sin amik wamukang nimiri babe ul palamukang. Nuh wamog ko'oag wamek nimiri Allah sembe semban koma kwaneng mag tenne aghabog seneraglamekti, kabuniri kelabo tolbang, kelabori kabuni tohin ulamek. Undo unulamekpa, Nuh poneko kabongag wa'iogpa, sin unulamek nimi taneko magti sin nhin opsiog. Ane saog uro sin amik nimiri Allah sembe semban koma ul palamikpa, samoro yanun.
28 Nuh wamog ko'oag uro yabiog saog uro amik Lot poneko wamog ko'oag babe nen uro yabiog. Sin Lot wamog ko'oag wamek nimiri Allah sembe semban koma mo kwaneng mag tenne aghabog seneraglamekti, saeag agha kamna kapto toltonne ulamekti, awe wero mero, ae soro ulamek. 29 Undo unulamekpa, Lot poneko as kaluro sorop as Sodoma lanalamog sumeneko babe Sodom nimiag imag agha auk pogap, auk song malinge ibyaap imag agha pelengelaogpa, Sodom nimi ni opsiog.
30 Ane saog uro sin amik nimiri, Allah sembe semban koma sop-sop ulamneba ul palamikpa, Allahri weptopne el imag agha mog so'oag tangtopne ponekori, ‘Etne wamnange nimi niri eltaukang,’ aro lag neneptalul. 31 Allahri weptopne poneko lag tale sumeneko nimi eldi ae imaghag tai waelbamle nimi elem uro kulukaleri, ae lomag wamlea, ‘Tomnun,’ aro ae lomag wa'in koma elem-elem merero pilul. Nimi aweag wamle nimi babe eldi sa'a-sa'a piplea samoro tol pin koma merero pulul. 32 Lot poneko elkelag uro yabiogne sembe ekon tan koma wali uro seneraglamlulom. 33 Nimi etneri, ‘Na mog so'o aneag wali wamnun,’ aro seneragto ulamle tanena, nimi eneko el kamag wamnepne ka'eseptalul. Aghana nimi etneri, ‘Na wali wamnepne sae limneri, tebahanea babe Allahri lebogne sunsunum uro ulamnun,’ aro ulamle tanena, nimi eneko el ya'ag kamag uro wamlul. 34 Nari a'unag lemnunne nene sikne agha Na Allahri weptopne lag tane sumeneko sembe lemnuan. Na amik lag tangto yalamne sumeneko ae kwelekan komag nimi phende ae usa nhonag malamtik aghana, nimi nhon kom taleba, nimi nhon mo wamlul. 35 Kelabo phende nikag, ‘Kwaneng roti sumbaukap,’ aro gandum wana sikto urulamtik aghana, nhon kom taleba, nhon mo wamlul. 36 Nimi phende awe nikag welamdik aghana, nhon kom taleba, nhon mo wamlul,” aro Yesusti eldi yubu ka'ero neleptopnangag ambatsiog.
37 Wene aro ambatsiogpa, Yesusti yubu ka'ero neleptopnangdi Yesusag hailamekti, “Nai, nu Saelbamsilamne, Andi ambatsilamne nene alaba uro yabilulne agha leplam?” aro haibaek.
Wene aro haibaekpa, Yesusti samoro ambarelamsiogti, “Nimi teptoba wamleag nong sop terop winang aneko poloro yingkaukang. Undo uro yabinebag keknep talul,” aro Yesusti ambatsiog.