Likiptop yubu tupne saeag agha o'oro paia urop nimi sembe sunumna tolbina Yesusti ambatsiogha
16
1 Yesusti elag yubu ka'ero neleptop nimiag ambarelamsiogti, “Nimi nhon saeagha tupne nhon wamog. Tupne ponekori eldi sae agha maikno wamogpa, el yeptopne nhonag, ‘Nari saeag agha wamlange yae o'oro paiamlulam,’ aro sekirog. Sekirogpa o'oro paia ulamog aghana, ora nimiri tup nimi enekoag, ‘Andi sae agha maiknoa eneko eldi saeag pibomdi, “Yae o'oro paiamlulam,” seom aghana, nimi enekori andinge saeag uropne talupto salik malik nenelamlaba, kom talamla,’ alameka iliri ka'ebaog.2 Wene alameka ka'ebaogti, eldi saeagha paia ulamogne poneko yobogti hailamogti, ‘Nimiri yubu lelamongdi, naringe kal ma'al naringe saeagha wamlange andi saeag pimnonge, ‘Salik malik uro orog nenelamla,’ alamongba ka'ebanonge nene sik te?’ aro wene haibaog. Wene aro haibaogti, ‘Andi naringe saeagha paia uro kareploroba mauropne mome toro palilamlamne neneko a'iliro mome toatnemendi, lambamendi naringe saeag paia unne wamlulam kom,’ aro ili ponekori wene seog.
3 Wene seogpa, kal ma'al paia ulamogne ponekori seneraghogti, ‘Yaghe, nari wene sa'a agha uanun? Nari nai saeagha ngainge ponekori, “An nen wamlulam kom,” sunual wene seleri, na sae lipnele tanena, na awe weltonne nong pesa wamnari, nimiag molom-molom ahinne babe na ali. 4 Ane sembe wene nari uanunne el tan. Nari uahisene andarina, na naniri nanag, “Paia ualulam kom,” aro sae komopto lambitnele tanena, nangkabo maikno wamikari na sindi aeag toro pimnukang,’ sembaog.
5 Wene sembaogpa, ora nimiri sikini ponekoringe saeag agha tobekti, anam lunurop kom nang babe wamek. Sin anam lunurop kom nimi eneko agha tupne saeag agha paia uropne ponekori nhon-nhon yopsiog. Nimi samenagne yobog nimi enekoag hailamogti, ‘Naniringe saeagha andi anam lunurop komne etbare wamla?’ aro haibaog.
6 Wene aro haibaogpa, nimi enekori, ‘Eldinge agha nanag wamlange kal zaitun wana lolterop mag longoro liroba teng tombare saog anam lumban kom,’ seog.
Wene seogpa, paia ulamogne ponekori, ‘Samenag teng tombare agha saekag lebobo aghana, hae keyagman nembanun. Elem uro pukapmendi, teng phende agha mome toro pipmen tanena, na babe saekag lero mome tomnun,’ seog.
7 Wene seogti, nimi phendepne enekoag babe, ‘Naniringe saeagha andi anam lunurop komne etbare wamla?’ aro haibaog.
Wene aro haibaogpa, nimi enekori, ‘Eldinge agha nanag wamlange kwaneng roti wana gandum kau liroba teng tombare saog anam lumban kom,’ seog.
Wene seogpa, paia ulamogne ponekori, ‘Samenag teng tombare agha saekag lebobo aghana, hae keyagman nembanun. Teng wilindi mome toro pipmen tanena, na babe saekag lero mome tomnun,’ seog.
8 Wene seogti, mome toro pibogpa, ili ponekori amik mome toro pairopne nene kembiag agha el taog. El taogti, ili ponekori, ‘Na sae agha maiknoa yae paia uropne enekori sindi phelekto tatnepne neneko kom nembaori, wana hektopneag agha uao,’ seog.a
Kal ma'al pai uropne eneko sik komne aghana, ili ponekori el saeag uroba paia uropne eneko sembe, ‘Wana hektopneag agha uao,’ seog. Seognena, Kal ma'al pai uropne enekori, ‘Nangkabo maikno nanag taukang,’ aro ulamogpa iliri, ‘Walinge uao,’ seog. Abene agha sin mog so'oag urop nimiri, ‘Na olog wali tanun,’ aro wali-waliaba mog so'oag wamlange agha sindamneri sikinkabo maikno nembanep pog, tibinag pirop nimiri undo unulamang kom. 9 Abene agha nari a'unag wenero ambarelamsinnena, sa'a-sa'a mog so'oag urop wali-waliaba a'un saeag wamla tanena a'undi, ‘Nangkabo nanag taukang,’ aro ulapmun andarina, ni mog so'oag wali-waliaba orog tanep sumeneko Ya'ag Uropne Ponekori a'un lunuro Eldi aeag toro pipsilul.
10 Nimi etneri tam ologne babe wali sik uro saelba urop tanena, tam nubunge babe nimi enekoag, ‘Saelbalulam,’ aro pimnep. Neapna, nimi etneri tam ologne babe wali sik uro saelba urop kom tanena, tam nubunge babe elag pimnep kom. 11 Ane sembe mog so'oag uroba a'undi saeag pairop wali-waliaba a'undi sik uro sol wali uro saelbamsom kom tanena, Allahri wali-waliaba singkikne neneko a'undi saeag piplul kom. 12 Ora nimiri eldinge aba a'undi saeag nenero, ‘Yae paiamlulam,’ sehobog, a'undi sikne agha ulamsom kom tanena, nen a'unag, ‘Hae, andinge ya'ag talul,’ aro tatsukang kom. 13 Nimi nhon arukna wamsori, iliri awe topso tanena, eldi nik sum ili phendepneri yubu nelebahinep kom. Iliyabo ni phenderi yubu nik sum neleplamsiso tanena, nimi enekori, ‘Nelagha yepsinun,’ aro ili nhon wanaag o'ona sembanepti, nhon karong sembanep. ‘Nani yabo ni phende nik sum yepsinun,’ aro ulamso tanena, nhondinge yeng semban koma nenneringe awe sol wali uro topso. Ane saog uro, nimi nhondi babe mog so'oag wali-waliabaap kal ma'alap neleptop tanena, nimi enekori Allahri awe tomnep kom,” aro Yesusti eldi yubu ka'ero neleptop nimiag ambatsiog.
Musari aruksirop yubuap Allahri nimi Saelba Uhiropneap sembe Yesusti ambarelamsiogha
(Matius 11:12-13)
14 Farisi nimi kal ma'aldi wana tohirop nimi taneko wamekti, Yesusti ni ambarelamsiogne kaebaekti, og soro yubu nebaek. 15 Og soro yubu nebaek aghana, Yesusti ambarelamsiogti, “A'un Farisi nimiri na yubu neplamnelom nimiri a'undam nimi sembe, ‘Allah whingag walia urop nimi wamap,’ seneldalamlomdi nimi whingag ul palamlom. Aghana a'undi wanaag seneragha ulamlomne Allah Eldamneri el wamla. A'un mog so'oag nimiri ‘Wali paliag sirik,’ seneropne Allahrina ‘Karong, elel,’ senelamla.
16 Yohanes mag sinag pelengelamsiogne poneko anam yan komag, Allahri Musa pere agha aruksirop yubuap, Allah silimu yubu tiplamek nang yubuap saelba ambarelamsiekpa, kekman Yohanes yaog. Yohanes yingkirop ko'o enekoag agha Allah Yubu Walinge Allahri nimi mog so'oag nimi Saelba uhiropne sembe ambarelamsiapne nimiri ka'elamsiang. Nuri ambatsirop yubu nene ka'ebom agha nimi ni wamloa saog nimiri, ‘Allahri nu babe saelbamsilul,’ aro wepto nonogholtalamek. 17 Allahri imap so'oap sumbaogne hae amik sum kom tanep aghana, Allahri aruksirop yubu Musari mome toro pibog yubu neneag agha ologha babe kom tanep kom.
18 Nimi etneri eldi kel liagha yog kelabo tolamsil tanena, kelabo haogha tohiropne tal. Apna nimi nhondi lililamsile kel agha kabuni nhondi kel eneko tolamsil tanena, nene babe kelabo haogha tohiropne ulamla,” aro Yesusti ambatsiog.
Tup nimi nubungeap Lazarusap sembe likiptop yubuag agha Yesusti ambatsiogha
19 Yesusti nen tipto sunumna sunuro ambarelamsiogti, “Nimi nubunge tupne nhon wamog. Eldi ag wangaro siliro pelengka urop ag wangalamogne mauk terek saogne agha wirop ag wet purumna tohon kelen agha wirop ag wangalamog. Walinge ag agha wangalamogti, elag sop-sop kwema orogti, eldi wanaag agha sa'a-sa'a, ‘Nanag taho,’ senenne toro saelbamogti, yeng sirik uro ua ulamog. 20 Yeng sirik uro ua ulamog aghana nimi nubunge ponekori ae aram ina siramag aneko nimi nhon saeag agha orogne Lazarus, ‘Nimiag mololamsilul,’ aro nimiri pil piekpa, meneng sisua kundiktopne wamog. Saeag agha orogne poneko eldi konag sorogti seklero 21 kwaneng yori, ‘Nimi nubungeri kwaneng telamleri, ubun pelengeloplea babe mon og uro tehane,’ aro ae aram ina siramag kwaneng yo wamog. Kwaneng yo wamogpa, ot kam agha yingkina eldi konag sorog tanekoag kamdi lolaglamek. 22 Undo wamogti saeag agha orog nimi eneko tebaog. Tebaogpa, Allah arukna imagnang malaikatti yingkina poa lebekti, nunisag Abraham imag wamoghag el kipto somorobag poa piek. Poa piekpa, amik sum saeag agha tupne nimi nubunge poneko babe tebaogpa, so'oag sikek. 23 So'oag sikekpa, samen saeag agha tup nimi teptop nimi ua urobag seklero wamog. Seklero wamogti, imag tiwalengelamogpa, nunisag Abrahamdi Lazarus poneko kipto somoro waliag nikag pukamdeka tiwalengkahiog.
24 Wene tiwalengkahiogti, el samen saeag agha tupne ponekori yubu lelamogti, ‘Nani Abraham, na yareagti o'ona sembane. Na auk ogti seklelamnari, andi na yepnululam. O'ona sembanemendi, andi Lazarus ambatmenba, eldi sae tom maghag werebongkia lepleri, nari silimu talaplamlange neneag pelaghal anulul,’ aro yubu lelamog.
25 Wene seog aghana Abrahamdi, ‘Name an el talulam. An teban koma wamomag sa'a-sa'a walingeog an saeag taoba, yeng uro wamom. Lazarusna mali uro seklero wamo aghana, wene elna yeng uro ane pukamlaba, anna seklero wamlam. 26 Neapna, a'un anabi nu anabiag kweren nubunge pairopne wamlaba, a'un ano wamlomne agha ane kauro yanep kom. Nu ane wamapne babe a'unag kauro yanep kom,’ aro wene seog.
27 Wene seogpa nimi samenag saeag agha tup nimi enekori Abrahamag yubu lelamogti, ‘Nai, wene selam tanena nari anag mololangkenne, andi Lazarus nari nai taptopne aeag wamlangeag poglulam. 28 Pogmenba pileri, nari nangkabo lambare wamang nang abeneko wenero ambatsile andarina, sin babe seklero unag na wamnag ane wamukang kom,’ aro wene seog.
29 Wene seogpa, Abrahamdi samoro el samenag saeag agha tupne ponekoag, ‘Sindinge saeag wamlangena, Musari mome toro pibog yubuap, Allah silimu yubu tiplamek nangdi mome toro pibek yubuap sindi saeag wamla. Sindi yubu mome toro pairop yubu nene ka'ebi agha eltanep,’ aro samoro ambarog.
30 Wene aro ambarog aghana, el samen saeag agha tupne ponekori samoro Abrahamag yubu lelamogti, ‘Nani Abraham, andi, “Mome toro pairop yubu mo ka'ebaik,” seheng kom. Nimi teptop nimi agha samoro pileri, ambatsile tanena, sindi malia senero ulamangne lipsikti, Allahri senenne salero ulamukang,’ seog.
31 Wene seog aghana, Abrahamdi samoro ambarelamogti, ‘Sindina, Musari mome toro pibog yubuap, Allah yubu silimu yubu tiplamek nangdi mome toro pibek yubuap ka'eban koma ul palamang. Wene ka'eban koma ul palamang pagha tanena, nimi teptop nimi kamag tangka sin ambatsilenge babe sindi sik sembaukang kom,’ seog,” aro Yesusti Farisi nimiag sunuro ambatsiog.