Yesusti likiptop yubu pham domba ka'eseptangtop phamag sunumna tolbina ambatsiogha
(Matius 18:12-14)
15
1 Ik nhon sum sin Yahudi nimi agha Roma nimi sembe kal ma'al poloro torop nimiap, ora nimi sin sembe nimiri, “Malia maikno ulamang,” senehirop nimiap yaekti, Yesusti yubu ambarelamsiogne ka'elamek. 2 Yingkina Yesusti yubu ambarelamsiogne ka'elameka Farisi nimiap, Musari aruksirop yubu amohirop nimiapti kembahiekti, parog-parog alamek. Parog-parogha yubu lelamekti, “Nimi eneri nimi mali nimi tane, ‘Nangkae,’ aro topsildi, kwaneng nhon nikag telamang,” aro parog-parog alamek.3 Parog-parog alamekne sembe Yesusti likiptop yubu sunumna nhon tolbina ambarelamsiogti, 4 “A'un nimi nhondinge pham domba teng tombare saog wamseng agha nhon ka'eseptan tanena, a'undi huanep? Pham domba ngainge ponekori pham domba teng wilindiap epto phendeba abeneko paiag maneng telamikag laplopsileri, ‘Ka'eseptal pham neneko ebanun,’ aro pinepneog wamla te? Sik uro elamleri, kekman iplul. 5 Pham domba ka'eseptanepne neneko elamleri, iple tanena, eldamne poneko awiri, ‘Nanenge pham domba ka'eseptanelne neneko iroan,’ aro sa'oag sa'oro poro agha aeag payalul. 6 Poro agha aeag payaleri, eldi elkabo eldi ae peramag nimi yopsileri ambarelamsileri, ‘Pham domba naringe ka'eseptaonge neneko elamnari imna ane sembe, nu awi senelamukap,’ selul. 7 Nari lemnange sembe ambatnuahin. A'undi pham domba iroanepne sembe awi sembamsom aghana, nimi ka'eseptangtop nimi iroanepne sembe Allah imag ua urobag aneko imagnangdi awi senelamang. Nimi malia uan koma Allahri senenne sunsunum uro urop nimi teng wilindiap epto phendeba wamika sembe Allahri babe, imagnangdi babe awi senelamang tiog. Aghana Allahap imagnangap sin niri awi sirik sembanep nena, nimi nhondi babe malia-malia ulamlea agha, ‘Malia ulamnange sae limneri, Allahri senenne saelbaneri uanun,’ aro samoro yale nimi eneko sembe awi sirik uahilul,” aro Yesusti parog-parog alamek nimi tanekoag ambatsiog.
Kamna kaptoba wana nhon ka'eseptangtopne sembe ambatsiogha
8 Yesusti nen sunumna nhon ambarelamsiogti, “Kelabo nhondinge kamna kaptoba wanange sa'o bare wamsinep. Sa'o bare wamsinep aghana, nhon ka'eseptaho tanena, kelenekori sa'a hualul? Kelenekori ualulnena, whea tiniro tibin nembi agha ae popsengkea po'oro eltolamleri, kekman iroalul. 9 Elamleri iroalul tanena, eldi elkabo, eldi ae peram nimi yopsileri lelamleri, ‘Kal ma'al naringe ka'eseptaneonge neneko ero eltolamnari iroandi, nu awi senelamukap,’ selul. 10 Nari lemnange sembe ambatsinuan. Ane saog uro nimi nhon mali-malia ulamlea agha, ‘Malia ulamnange sae limneri, Allahri senenne saelbaneri uanun,’ aro samoro yale nimi eneko sembe Nuni Allah awi sirikti el arukna imagnang malaikat whingag lolo'obalul,” aro Yesusti ambatsiog.
Me nhon ka'eseptaogne sembe ambatsiogha
11 Yesusti nen sunumna nhon babe ambarelamsiogti, “Kabuni nhon eldi elmabo phende wamdek. 12 Elme nabinge ponekori iliag yubu lelamogti, ‘Nai, andi nanag amik, ‘Tatkenun,’ senelamlamne, wene agha na sembe pogto tatnululam,’ seog. Wene seogpa ili ponekori elmabo abeneko eldi saeag agha wamogne poghatsiog. 13 Poghatsiogpa, ik etbare uro yabiogpa, wameka elme nabinge ponekori iliri saeagha poghatsiogne taneko nimiag kamna kapto kal ma'al toro aogti, weag urop mog so'oag piog. Piogti awe tomna koma kal ma'al poa piogne nenekoag agha eldi, ‘Sa'a-sa'a uanun,’ senenne agha seneragna koma ulamog. 14 Eldi, ‘Uanun,’ senenne mo ulamogpa, kal ma'al eldi poa piogne neneko orog taogpa, so'o enekoag kwaneng yo nubunge waelbaog. Kwaneng yo waelbaogpa, me eneko saeag agha orogti kwaneng yo seklero wamog. 15 Kwaneng yo seklero wamogti, as wamog as enekoag agha nimi nhonag pina lelamogti, ‘Andi awe tomneba olog yepto tatnululam,’ aro molbaog. Awe molbaogpa, nimi enekori, ‘Naringe pham so'oag yae piamsimendi mo'olamsululam,’ aro ambarog. 16 Kwaneng yo seklero wamogti, kwaneng yo lelem, ‘Pham kwaneng taneko agha tehene,’ sembaog. El kwaneng yo seklero ua ulamog aghana, as eneko nimiri babe kwaneng olog tarelamek kom. 17 Tarelamek komba seneraghogti lelamogti, ‘Nari naiag awe tolamang nimi sinna kwaneng maikno uro telamang pogna, na elme agha tane kwaneng yori seklero tebalonga ulamna. 18 Na samoro naniag pineri lelamneri, ‘Nai, nari anapna Nuni imagne ponekoapag babe malia uahino. 19 Nai, nari mali uanonge sembe andi nanag ‘Name' anne babe olog sunsunum komdi, na Nai andi arukna tanun,’ aro wene sembaogti, 20 samoro iliag yalamog.
Wene sembaogti yalamogpa, iliri weag agha tibogaogti, wanaag yareag sembaog. Yareagti, ili poneko merero elme poneko somoro saleltol piogti, togtog aro kipto aog. 21 Kipto aogpa elme ponekori iliag yubu lelamogti, ‘Nai, nari anapna Nuni imagne ponekoapag babe malia uahino. Nai, nari mali uanonge sembe andi nanag ‘Name' anne babe olog sunsunum komdi,’ seog.
22 Wene seog aghana, ili ponekori eldi arukna taneko yopsiogti lelamogti, ‘Elemag ag walinge tolpina elag enekitlulom. Sae ma'alag tolongoroba tobongkongkia, yanag wangana wangkitlulom. 23 Undo unuongkia lepmundi, pham sapi mesah yagne nhon oro yobalulom. Yoro teberi yeng uro wamukap. 24 Nari me ane tebalonge saog uro wamori, ka'eseptao aghana, wene lag neneptaldi, nanag samoro kamag uro yal,’ aro sani yoro tero yengag ulamek.
25 Sinna aeag yeng unulamek abeneko, me yandonge aweag wamog. Aweag wamog aneko ae peramag yalamogpa, aeag sepna lilim ka'ebaog. 26 Sepna lilim ka'ebaogti, iliri arukna taneko yobogti hailamogti, ‘Sa'a agha aeag ulamang?’ aro haibaog.
27 Wene aro haibaogpa, iliri arukna anekori, ‘Andi anipsae samoro aeag yalba, andi nai ponekori, “Pham sapi walinge mesah yagne nhon oro yobalulom. Nari name nikto koma wali uro wamoa samoro yal,” aro ambatsilba ulamang,’ aro arukna enekori me yandonge anekoag ambarog.
28 Wene aro ambarogpa, me yandonge neneko wanaag yo uaogpa, aeag wa'alaog komba, ili ponekori lambaogti, ‘Nhon wa'aukap! Nunap nhon awi uro kwaneng tukap,’ aro olnobaog.
29 Wene aro olnobaog aghana, elme yandongeri iliag parog-parogha yubu lelamogti, ‘Hengkun-kunne andi yubu ka'elamnari, andinge awe tolamna aghana, andi na pham kambing ologne babe tatneom kom. Tatnohomba yobahaneba nangkaboap awi uro tehebe. 30 An meri andinge saeag agha abeneko kelabo ina yabirop kelaboap yabalamori, kal ma'al ni orog nembao aghana, wene el samoro yalba, pham sapi mesah yagne el sembe yobalam,’ seog.
31 Elme yandongeri iliag wene seogpa, iliri elme yandongeag, ‘Naba name, anna sop-sop nanap ane ua ulamnam. Nari saeag agha wamlange ni andinge babe wamla. 32 Aghana wenena, awi toro ulamapne ane sunsunum uro ulamap. Anipsae eneko nimi tebalonge saog uro ka'eseptao agha, kamag talori yalo saog ual. Ane sembe sumene sani yoro tero awi uro wamukap,’ seogti, iliri elme olnobaog,” aro Yesusti likiptop yubu tolbina ambatsiog.