Yesusti nimiag, “Malinge ulamlomne libom agha Allahri senenne saelbapmun kom tanena tebalulom,” seogha
13
1 Yesusti nimi yubu ambarelamsiogpa, nimi wamek nimi tanekori Yesusag, “Galilea nimi etpareri pham domba poa, ‘Allah sembe oro aukag tabukap,’ aro ulamong abeneko Roma nimi sikini Pilatus nenekori ya'ag opsio,” aro Yesusag ambarek. 2 Sindi wene aro ambarekne ka'ebaogti, Yesusti yubu lelamogti, “A'undi senelamlomne, ‘Sin Galilea nimi tanekori mali-malia maikno ulamekne sembe seklero tebaong aghana, Galilea nimi yog nimiri malia maikno uan koma tebaong kom,’ senelamlom te? 3 ‘Kom' alamna! Ot sin tebaong nimi aghabog malia maikno urop nimi sembaheng kom. Ambarelamsinne ka'eapmundi, el uro wamlulom! A'undi malia ulamlomne libom agha Allahri senenne saelbapmun kom tanena, sin tebaong saog uro a'un babe tebalulom. 4 As Yerusalem nimiag uro yabiogne sembe babe olog ambatsinun. Mag Siloam peramag ae wenge solwalengero nimi yae uhin ae tuplamogti, nimi sa'o tara bare niknibahiogpa tebaek nimi nenena, ‘Sindi malia maikno ulamongdi tebaong,’ senelamlom te? Nimi ni as soro kalurop as Yerusalem wamongne taneko, ‘Sin malia ulamong komdi tebaong kom,’ senelamlom te? 5 ‘Kom' alamna! Sikne agha ambarelamsin. A'undi malia ulamlomne libom agha Allahri senenne saelbapmun kom tanena, sin tebaong saog uro a'un babe tebalulom,” aro Yesusti ambatsiog.Yesusti sunumna kal ara wana maurop kom kal sembe sunuro likiptop yubu ambatsiogha
6 Yesusti wene aro ambatsiogti, nen sunumna nhon ambatsiogne ane.
“Nimi nhondi eldi anggur merop aweag kal ara nhon meamog. Meamog aneko ik etbare, ‘Wana mauamla to?’ aro yingkina kemelaog. Kemelaog aghana kal eneko wana mauamog kom. 7 Ane sembe eldi awe o'ol lero yae ua uropne ponekoag yubu lelamogti, ‘Na hengkun wilindi, “Kal ara ane wana nhon mauamla to?” aro kemelang pang ulamno aghana, wana nhon maua unne nhon imno kom. Kal ene el pongoro ua ulamlange wana maubanep kombog so'o si mag abeneko telamla. Ane sembe kal ene khaebalulam,’ seog. 8 Aghana awe o'ol lero yae ua urop nimi enekori samoro yubu lelamogti, ‘Nai, kal ane khaebaheng kom. Hengkun ene kal ane so'o ya'aro mo'obanebari, urumna pimneba ualeagha. 9 Hengkun nonoag wana maubanep ulamlea sembe, wana mauban kom pagha tanena, nai andi nimiag, “Khaebalulom,” senep' aro awe o'ol lero yae ua uropne ponekori wene seog,” aro Yesusti nimi wamek nimi tanekoag ambatsiog.
Yahudi nimiri tektek papto Allah Yubu lerop sumeneko Yesusti maghan kiniptop kel wali nembaogha
10 Wamekpa Yahudi nimiri tektek papto Allah yubu lerop sum taogpa, Yesusti Allah yubu lero nimi amohirop ae nhonag yubu ambarelamsiog. 11 Aneko kelabo nhon hengkun sa'o tara bare phia yonge kelenekoag wamogpa, nikto ulamog kel nhon wamog. Keleneko maghan kiniplobogpa, porog uro seknange erarukti maghan kiniptobog ua ualamog. 12 Undo ua ulamogne Yesusti ibogti, kelenekoag “Yae,” aro yoplamogti, “Kaen, anag naikna ulangkelne wene orog tal,” seog.
13 Wene seogti, Yesusti kelenekoag sae pibog abeneko pere maghan kiniptopne neneko orog taogpa, peket sekelabiogti Allah omeklamog. 14 Wali taogha Allah omeklamog aghana, Yesusti keleneko Yahudi nimiri tektek papto Allah yubu lerop sum agha wali nembaogne sembe Allah yubu lerop ae yae ua uropne ponekori karongdi wana yo sembaog. Yo sembaogti, yubu lelamogti, “Ae ik no'op bare sa'a-sa'a awe wero tomnep sum wamlaba, ik nhon sum abene agha yingkina, ‘Wali nembanelul,’ aro yalulom. Ot sumene tektek papto Allah omekto yubu lerop sum wamlaba, nimi wali nembahinep kom,” aro nimi tanekoag ambatsiog.
15 Wene seogne sembe nu Saelbamsilne Yesusti nimi enekoag samoro, “A'un orolena lero haing kunuhirop nimi wamlom! A'un niri Allah omekto tektek paptop sum agha a'undi pham sapiap keledaiap leka lomag agha, ‘Mag tukang,’ aro poa la'anilamsilomba, mag telamang te? 16 Allah omekto tektek paptop sum agha pham mo'olamsilom aghana, wene ane Abraham sisa mangarop kel nhon phia yongeri hengkun sa'o tara bare haing kauploa saog ulamogpa, maghan kinipto ua ulamlo. Ko'o we uro seklelamla aghana, a'undi senenne phiari el haing kauplobogne nene Allah omekto tektek paptop sum agha el wali nembanep kom senelamlom te?” aro wene seog.
17 Yesusti samoro nimi enekoag wene seogne ka'ebom agha nimi tanekori, “Yesusti uaheng komne ual,” senelamek nimi taneko ni ali sembaek. Aghana nimi ni orangeri yaghe senelamekti, “Wana waliri wali-walia maikno ulamla,” aro awi senelamek.
Allahri amik ma'arop nimi maikno saelbamsilulne sembe Yesusti sunumna sunuro ambatsiogha
(Matius 13:31-33; Markus 4:30-32)
18 Yesusti nimi hairo ambarelamsiogti, “Allahri mog so'oag nimi maikno saelbamsilne nubu tangkamlulne nene sembe huropneag agha sunuro ambatsinep? Tam huropneag agha a'unag tibin nenero sumbatsinun? 19 Allahri amik ma'arop nimi maikno saelbahilulne nenekona, kwarang si so'oag togtopne saog uro wamla. Nimiri kwarang si olog sirikne nene toro eldi aweag memna tanena, pongoro waelbandi, sae la'imbanba, winangdi kal sae tanekoag ae solanep,” aro Yesusti sunuro ambatsiog.
20 Nen nhon babe hairo ambarelamsiogti, “Allahri mog so'oag nimi maikno saelbamsilne nubu tangkamlulne nene sembe tam huropneag agha a'unag tibin nenero sumbatsinun? 21 Sunumnana undo. Kelabo nhondi, ‘Kwaneng roti winiro tamneba walero nubu tangkamlul,’ aro yamoro pairoba kwaneng roti anekoag ma'aro pimnep. Ma'aro piple tanena, anam aukag tamna komag kwaneng roti tamneba aneko nubu tangkamlul. Ane saog uro Allahri mog so'oag nimi saelbamsilne mo nubu tangkamleba, nimi maikno saelbamsilul,” aro likiptop yubuag ambatsiog.
“Ina ologne toman wa'alulom,” aro Yesusti likiptop yubuag agha ambatsiogha
(Matius 7:13-14,21-23)
22 “As soro kalurop as Yerusalem punun,” aro Yesus palamogti, as nhonag pang, nhonag pang nimi yubu ambare-ambare palamsiog. 23 Eldi yubu ambare-ambare palamsiogpa, nimi nhondi hailamogti, “Nai, nu saelbamsilamne. Anag haibaghenun. Allahri nimi taulbahileba, El ua urobag wa'inepne, nimi ologha taulbahileba wa'aukang te?” aro haibaog.
24-25 Wene aro haibaogpa, Yesusti samoro nimi enekoag, “Amik sum nimi maiknori, ‘Allah ua urobag wa'inun,’ aro ulamukang aghana, nari a'un ambarelamsinne, amik sumeneko ae ngainge poneko sekelingkileri, ina serekale tanena wa'inep koma wamukang. Ane sembe, wene anamag a'un nong ningkiri, ‘Ina to'op ina ane toman wa'inun,’ aro sumene ulamlulom. Sumene uamun kompagha amik ae ngainge ponekori ina serekale sumeneko a'undi paiag sip sekapmundi, ‘Nai, nu ina kupsumenba wa'aukap,’ aro ina kaungulamlulom. Ina kaungulamlulom aghana, ae ngainge ponekori, ‘A'unna na ekonne wamlom. A'un talaba yalomne babe na ekon,’ selul.
26 Wene seleba, a'undi lelapmundi, ‘Nu anap kwaneng mag nhon telamobori, nuri as wamobongeag andi nuri ina toman yubu nu ambatsiom,’ sululom.
27 Wene sululom aghana, ae ngainge ponekori nen lelamleri, ‘A'unna na ekonne wamlom. A'un talaba yalomne babe na ekon. A'un yoaba ulamlom nimi wene na wamnange anea pululom,’ sulul.
28 Wene seleba, a'undi kemelamsumunba, nunisagyabo Abrahamap, Ishakap, Yakubap, Allah silimu yubu tiplamek nangap ni Allahri nimi salero ua urobag wamika a'undi ipsululom. Kemelamsimundi a'unna, ‘Nu babe Allahri nimi salero ua urobag wamsebe aghana, nu yag lambahil,’ aro si kelengtereba yo lelem engero wapmundi, seklero wamlulom. 29 Nimi heng walelingkirobag siba, heng purukul pirobag siba, mag luag siba, mag kwasag siba yalamikti, Allahri nimi salero ua urobag wa'alalamukang. Yalamikpa Allahri sin salero paiamsileri, sani yobatsiro kwaneng tatsirobag aneko pulaikti, kwaneng tukang. 30 A'un el uro wamlulom! Amik uro yabile sumeneko nimi ologne wene wamang nimi agha, nimi maikno amik nubunge taukang. Nimi nubunge wene wamang nimi agha, nimi maikno ologne taukang,” aro Yesusti ambatsiog.
Yesusti as Yerusalem nimi sembe wana ikin uro lelamogha
(Matius 23:37-39)
31 Abeneko ko'o enekoag agha babe Farisi nimi etbare Yesusag yaekti ambarelamekti, “Herodes yubu sia leropneri an karongdi, ‘Opsene,’ senelamlaba, aneag agha lambamendi, yogneag pululam,” aro ambarek.
32 Wene aro ambarekpa, Yesusti samoro sinag, “Wene a'un samoro pimundi, pai kam anekoag ambarel pululom. Ambarel palapmunnena, ‘Yesusna yubu lelamori, “Sumeneap ambuhumap Nari awe tolamneri, nimi phia kulomag ua ulamsilne yag lanalamsineri, nimi niktopne wali nenelamsinun. Wilindiba aneko Nari awe aneag komopto tomnun,” sel,’ aro ambarel pululom. 33 Wene ‘Opkelul,’ selom aghana, Nari awe sumeneap ambhumap amniap wero pabalamnea as Yerusalem punun. Nimi Allah silimu yubu tiptopne as Yerusalem wamna komag tebanep kom saog ane sembe, Na babe as Yerusalem pineba omnukang.
34 Yerusalem, Yerusalem! A'un Yerusalem nimiri Allah silimu yubu tiplamek nimi olamsilumdi, Allahri wepto poglamsiog nimi babe kirikti olamsilum! Ik sulu nari ‘A'un paiamsisene,’ senelamsiri winang ayamdi eldi mabo winiro olniknia urop saog uro, ‘As ene nimiri mabo ni paiamsisene,’ aro yoplamsisi aghana, a'undi karong aro wail ibareamnelum. 35 Ane sembe Allah a'unap nhon wamlul kom. Wene lelamnange, a'un Yerusalem nimiri Na wene anea nen imnululom kom. Ot Na nen amik yane sum agha a'undi lelapmundi, ‘Nuni Allahri poglaba, yalamlange poneko paliag nenelamsut!’ aro lelapmun sumeneko agha imnululom,” aro lebog.