Yohanesti nimi maghag pelengehiropne ponekori nu Saelba Uhiropne ina yanepne yarelamogha
(Matius 3:1-12; Markus 1:1-8; Yohanes 1:19-28)
3
1 Roma nimi sembe yubu sia lenne Kaisar si Tiberius ponekori saelba ulamsiog. Hengkun naual tarabare saelbamsiogpa, el umag yubu eptopne gubernur nimi nubunge Yudea so'o saelbamogne Pontius Pilatus poneko wamog. Wamogpa Kaisar Tiberius umagnang Herodesti Galilea so'oag nimi sembe yubu sia lero saelbamsiogpa, Herodes elkae Filipusna Iturea so'oag nimiap Trakhonitis so'oag nimiap sembe yubu sia lero saelbamsiog. Kaisar umagne Lisaniasna Abilene so'oag nimi sembe yubu sia lero saelbamsiog. 2 Memnang Allah sembe pairopnang sikini yabo nubunang Hanasap, elyamal Kayafasap wamdek ko'o hengkun enekoag agha, Yohanes Zakharia elme pai aldesag wamogpa, Allahri yubu lero Yohanesag ambarog. 3 Ane sembe Yohanes mag Yordan sip nimi ni wamekne Allahri yubu eneko ambatto tongolamsiog. Yohanes ponekori yubu ambarelamsiogti, “A'undi mali-malia wanaag seneragto ulamlomne lipsumunba, maghag pelengkipsinun. Pelengkipsineba, a'undi mali-malia ulamlomne Allahri wailag nembaleri, kom nembalul,” aro ambarelamsiogti, maghag pelengelamsiog.4 Samenag Allah silimu yubu tiptopne Yesaya ponekori mome toro pibogpa, nimiri wa'amogto pibek. Allahri samenag Yohanes sembe lebogne Yesaya poneko el taogti, nen tipto mome tobogne ane:
“Pognenge poneko pai aldesag urobag pileri,
yubu haum aro nimi yoplamsileri,
‘Ina nu saelbamsilulne yanepne sembe yarelamlulom.
El yanep ina porog nenelamsut.
5 Ina kurugtobag nikniro sameplapmundi,
yim walenge kongten wamlenge sopto sameplamlulom.
Ina ingkis webel pirobag porog nenelapmundi
so'o nengesag ko'opto sameplamlulom.
6 Nimi mog so'oag nimi niri Allahri nimi wali talulamsilne ibukang,”
aro Yesaya ponekori Allah yubu mome toro pibog.
7 Nimi maikno, “Nu maghag pelengkipsilul,” aro Yohanes yaghag yalamek. Yohanesti sinag yubu ambarelamsiogti, “A'un yo urop nimi wamlomne nimi ohirop paghe mangaroba saog wamlom! Nimi etneri a'unag wenehiro, ‘Allahri a'un opsileagti, elemag pululom,’ aro wembahioba yalom? 8 A'un el uro wamsut! Wene kirik tane wamlange ane babe Allahri Abrahamdi mangaro likto piroba nembahinep! Ane sembe a'undi wanaag alniro, ‘Nunisang Abrahamdi mangaroba mangkahiekne, hae wali wamap,’ aro seneraglamseng kom. A'undi wanaag malinge seneragto ulamlomne liapmundi, Allahri senenne saelba ulamlulom. 9 Wana walinge maurop kom kal saog wapmunagti, yae kal khaepto yarengap telbaneba weroba wamla. Kal ni wamlange wana walinge maurop kom tanena, kal eneko khaepto aukag tobogto tamnepneog wamla,” aro Yohanesti ambarelamsiog.
10 Wene aro ambatsiogpa nimi tanekori, “Undop agha nuri huroba hulamukap?” aro haibaek.
11 Wene aro haibaekpa Yohanestina, “Nimi nhondinge nimi nongag enektop ag phende wamsile tanena, nhon nenekona nimi orogne neneko tarelamlulom. Nimi etneringe tenaba wamla tanena, nimi orogne neneko pogarelamlulom,” aro ambatsiog.
12 Yohanes yaghag yingkiamek nimi agha, mog so'o saelba uhiropnang yubu eptopnang sindi, “Roma nimi sembe kal ma'al pogto nanag palilamlulom,” aro aruklamsiek nang babe Yohanes yaghag yalamek. Sin nimi taneko babe, “Yohanesti maghag pelengkipsilul,” aro yalamekti hailamekti, “Nai, yubu amohiropne, nuri sa'a agha hulamukap?” aro Yohanes hailamek.
13 Wene aro haibaekpa, Yohanesti sinag samoro, “Ot a'uniyabori a'unag aruklamsiikti, ‘Kal ma'al nun umag nimiri saeag agha toro tongolamsululom,’ alamikne sunsunum uro nimiag tipto ‘Tatne,’ aro aruklamsululom. Nen phiro paliag nembi agha ‘Tatne,’ aro nimiag aruklamsiseng kom,” aro Yohanesti ambarelamsiog.
14 Yin saleropnang tanekori babe Yohanesag yingkina hailamekti, “Nuna welaro? Nurina sa'a hulamukap?” aro haibaek.
Wene aro haibaekpa Yohanesti yin saleropnang tanekoag, “A'un yinap karogap saelbom agha nimiringe taluro topsiseng kom. A'unba a'undi awe welamlomba, kamna tarelamsiangne tobi agha mampul uro wamlulom. Undop agha, ‘Nimiringe nanag taho,’ aro minirop yubu loloro nonoghaheng kom,” aro ambarog.
15 Wene aro sop-sop ambarelamsiog abeneko pere, nimi tanekori hairo leldalamekti, “Nuni Allahri samenag Kristus poneko yanepne sembe salag pibogne, ‘Nimi nhon wepneri, “Nari nimi taluro saelbamsululam,” aro pognun,’ seogne nenena, Yohanes poneko yalne sembe nangnangkamap to?” aro wanaag hairo leldalamek.
16 Wene alamekne sembe Yohanesti nimi niag samoro ambarelamsiogti, “Nari mag aneag agha a'un maghag pelengelamsin aghana, amik nimi nubunge nhon, nanap sunum komne yalul. Na nimi ologne wamna ane sembe, el mikip sirikne yaleba, nari eldi arukna taneri, eldi yan wangana haing lopnenge babe nanap sunurop kom. El nubunge yalulne ponekori Allah Eldamne Yame Walingeap auk pogap a'unag tarel pelengkatsilul. 17 Eldi saeag wamlangena, ‘Roti wana nong wepto tomneba, phoanari leng-lengange phoro pabileba, wana walinge aghabog poloptaleba tomnun,’ aro kelopto weptop kal salelamlari, werobag aneko awe tolamlul. Wana walinge gandum kwaneng roti wana Eldi palirop aeag tobongkiplul aghana, kwaneng roti a'esekange ni auk tebanep kom auk enekoag taplul,” aro ambatsiog. 18 Yohanesti Allah yubu walinge ambarelamsiogti, yubu nhon saog, nhon saog yubuag agha Allah Yubu walingeag agha yubu yangaro olnoro ambarelamsiog.
19 Wene aro ambarelamsiog aghana, Yohanes ponekori Herodes yubu sia lenne Galilea mog so'o saelbamogne ponekoag babe, “Mali uaom,” aro wembaog. “Mali uaom,” seognena Herodes ponekori eldori toamog kel Herodias keleneko, Herodesti tobog. Herodias keleneko tobogneap yonge yogne maikno ulamogneap, ni aneko sembe Yohanesti Herodesag, “Malia ulamlam,” aro wembaog. 20 Wembaog aghana, Herodesti yonge nen nhon ulamogti, Yohanes salero sae kaupto kop aeag tobongkibog.
Yohanesti Yesus maghag pelengkaogha
(Matius 3:13-17; Markus 1:9-11; Yohanes 1:32-34)
21 Herodesti Yohanes anam sae kaupto saelban komag, Yohanes ponekori nimi ni maikno taneko maghag pelengelamsiogti, Yesus babe maghag pelengkaog. Pelengkaogpa Yesusti Allahag molona molbaoghag agha im phoro, 22 Allah Eldamne Yame Walinge winang yalma nong saog taogti, Yesus nong alibag kulukulaog. El alibag kulukulamog abeneko imag agha Allahri yubu lelamognena, “Na Name An sembe o'ona sembangken. Andi Nari wana awi nenelamnelam,” seog.
Yesus ilisagyabori mangarobari likto piogha
(Matius 1:1-17)
23 Yesus nimi whingag alnibaognena, El mangkaogha hengkun taibuka taubuka teng nhon epto wilindi saog uro yabiogpa, alniro nimi whingag Allah yubu ambarelamsiog. Yesus mangaro yabiogne sembe nimiri seneraglameknena, Yesus Ili Yusuf aro seneraglamek.
Matat ili Lewi, Lewi ili Malkhi,
Malkhi ili Yanai, Yanai ili Yusuf,
25 Yusuf ili Matica, Matica ili Amos,
Amos ili Nahum, Nahum ili Hesli,
Maat ili Matica, Matica ili Simei,
Simei ili Yosekh, Yosekh ili Yoda,
27 Yoda ili Yohanan, Yohanan ili Resa,
Resa ili Zerubabel, Zerubabel ili Sealtiel,
Malkhi ili Adi, Adi ili Kosam,
Kosam ili Elmadam, Elmadam ili Er,
29 Er ili Yesua, Yesua ili Elieser,
Elieser ili Yorim, Yorim ili Matat,
Simeon ili Yehuda, Yehuda ili Yusuf,
Yusuf ili Yonam, Yonam ili Elyakim,
31 Elyakim ili Melea, Melea ili Mina,
Mina ili Matata, Matata ili Natan,
Isai ili Obed, Obed ili Boas,
Boas ili Salmon, Salmon ili Nahason,
33 Nahason ili Aminadab, Aminadab ili Admin,
Admin ili Arni, Arni ili Hezron,
Hezron ili Peres, Peres ili Yehuda,
34 Yehuda ili Yakub, Yakub ili Isak,
Isak Ili Abraham, Abraham ili Terah,
Serug ili Rehu, Rehu ili Peleg,
Peleg ili Eber, Eber ili Salmon,
36 Salmon ili Kenan, Kenan ili Arpakhsad,
Arpakhsad ili Sem, Sem ili Nuh,
Metusalah ili Henokh, Henokh ili Yared,
Yared ili Mahalaleel, Mahalaleel ili Kenan.
38 Kenan ili Enos, Enos ili Set,
Set ili Adam,
Adam ili Allah.