Yesus Mangaro Aogha
(Matius 1:18-25)
2
1 Samenag Yohanes maghag pelengehiropne mangaro aog sum enekoag, Roma nimi sembe yubu sia leropne Kaisar si Agustus wamog. As soro kalurop as nubunge Roma agha mog so'o maikno saelbamsiogti, Israel nimi wamek mog so'o babe saelbamsiog. Kaisar Agustus ponekori, “Nu Roma nimiri saelbamsiap nimi ni mog so'oag wamang nimi si mome toro tolongolamsululom,” aro arukahiog. 2 Kaisar Agustus ponekori, “Nimi si toro tolongolamsululom,” seogpa, ik selek sum alniro mome toro tolongolamsiek sumeneko Kaisar yubu eptopne gubernur si Kirenius ponekori Siria mog so'oag nimi saelba ulamsiog. Kirenius ponekori Siria nimi saelba ulamsiogpa, alniro nimi si mome toro tolongolamsiek. 3 “Nimi si topsukang,” aro nimi ni sikinisag yabori asag samoro palamek. 4 Palamekpa, Yusup poneko babe, yubu sia leropne Daud ponekori nimi sisa liktoba wamog. Ane sembe, Yusup eldi as Nasaret, mog so'o Galilea li agha ilisag Daud as Betlehem mangarobag, mog so'o Yudea palamog. 5 Yusup ponekori, “Toptanunam,” aro salag piptangtop kel Mariaap nhon palamdek. Maria me monag wamogti, “Nu babe si mome topsukang,” aro as Betlehem pirek. 6 As Betlehem pirekti wamdekpa, Maria keleneko me mangaro anep peram taog. 7 Me mangaro anep peram wamogpa, me yandonge nengabo me mangaro aog. Sin wamekag aneko, nimi maikno weag agha yingkina as Betlehem teknero wamekpa, ae lomag Yusup elkel Mariaap mamnebag orog. Ae lomag kolo orogti, me mangaro aog me aneko ag kwelderoba ag agha wa'amogto pham domba kwaneng palihirobag me aneko mambirog.Allah arukna malaikat imag agha kuluka pham domba paia uropnang whingag lag taogha
8 Sumeneko ae inipnag as Betlehem peramag pham domba paia uropnang paiag sip wamekti, pham domba ua urobag yae paia ulamsiek. 9 Pham domba paiamsiekti wamekpa, lo'om aro Allah arukna imagne malaikat nhon sin whingag lag taog. Sin whingag lag talamogpa, Allah imang wareropne sinag warekto warelopsiogpa, sin log lelem lo'om seek. 10 Log lelem lo'om seek aghana, Allah arukna imagne malaikat anekori lelamogti, “A'un log sembaheng kom! Nari yubu walinge a'un ambarel ahinne, ‘Nimi ni yeng maikno sembaukang,’ aro yubu walinge payan. 11 Ae sumene Daudti asag agha nengabo me nhon mangap tal. Me enekona mog so'oag nimi taulbahilul. Samenag agha Allahri salag lero palilamogti, ‘Nari weptopne pogneri, “Mog so'oag nimi agha nimi taulbahileri, saelbamsulul,” ’ aro salag lebogti, sunsunum uro Kristus poneko poglaba, me eneko mangap tal. Nimi Taluro Saelba Uhilulne poneko sembe ‘Kristus’ aro engerop. 12 A'un pumundi me nhon ag kwelderoba ag agha wa'amogto pham domba kwaneng palihirobag mambiamika ipmun tanena, kekneba ane agha, ‘Me ane sembe lepla,’ aro a'un el wamsilul,” aro ambatsiog.
13 Wene seog abeneko pere Allah arukna imagnang teng-tenga lo'om aro elap ma'aro lag taekti, Allah omeklamek. Allah omekto yubu lelamekti,
14 “Allah paliag sirik imag wamlange omeklamukap!
Eldi wana waliri mog so'oag nimi agha wepsirop nimi sembe
yo senenne orogti, Elap ma'aptaukang,”
aro Allah omeklamek.
15 Wene aro Allah omekaekti, Allah arukna taneko samoro imag yingkiekpa, pham domba yae paia ua uhirop nang taneko sin mamun ambattaekti, “Nu Betlehem piberi, sumene uro yabilne Nuni Imagne ponekori el arukna imagne malaikat pere agha nu ambatsilne neneko kemel pukap,” seek.
16 Wene seekti, sin elemag piekti, Mariaap Yusupap me mangaro aogneap ipsiek. Me aneko pham domba kwaneng palihirobag mambiamdekpa ibek. 17 Pham domba yae paia uhirop nang tanekori me aneko kembaekti, lambom agha Allah arukna imagne malaikatti yubu me aneko sembe lero ambatsiog yubu tipto nimi ambatsiek.
18 Wene aro pham domba yae paia uhirop nangdi ambatsiekpa, nimi taneko ka'ebaek nimi niri, “Yaghe, mane agha uro yabilne sembe ambatsiang!” sembaek. 19 Ambarelamsiekpa, yaghe sembaek aghana, Maria kelenekori ni uro yabiogne taneko wanaag paia haiptangto seneraglamog. 20 Pham domba paia uhirop nang taneko samoro sindi pham domba paia uhirobag sip palamek. Samoro palamekti seneraglamekti, “Ni Allah arukna imagne ponekori ambatsilne sunsunum uro sik uro yabilba, nuri babe ka'ebaapti, haingdi babe ibap,” aro Allah paliag nenero omek-omek palamek.
“Me eneko Allah saeag pailbukap,” aro Allahri Mem Aeag Yesus poa pireka
21 Yesus mangaro aogha ik lin sumeneko me aneko si Yesus engero pibekti, kere kon sirik karepto kontebaek. Yesus si engkaeknena, samen Maria anam me monag tan komag Allah arukna imagne malaikat ponekori ambarogne sunsunum uro me eneko si Yesus engero pibek.
22-24 Me mangkaogti, ik teng nhon epto naualbare Allahri Mem Ae aramag wa'iog kom. Allahri Mem Ae aramag wa'iog komnena, Allahri samenag aruktop yubu sunsunum uro Musa ponekori mome tobogti, “Israel nimi agha kelabo nhondi me mangkale tanena, ik teng nhon epto naualbare memag wa'ilul kom. Wamleba, ik teng nhon epto naualbare komoptaleba kelenekori, ‘Allahri Mem Ae aramag nen wa'inun,’ aro Allah sembe oro pimnepne Allahri Mem Ae ina siramag payalul,” aro Musari mome toro pibog. Nen Allahri ambarogpa, Musari mome toro pibog yubu nhon babe saelba ulameknena, “Me yandonge ni aneko kopto, ‘Nu Imag agha Saelba Uhiropne ponekoringe wamlul,’ aro El saeag nenelamsilulom,” aro mome toro pibog. Ane sembe Musari mome toro pibog yubu sunsunum uro Yusufap elkel Mariaapti, “Me eneko as Yerusalem poa pinemeri, Allah saeag nembanunam,” aro pirek. Sin abenekona, Allahri aruktop yubu sunsunum uro, “Winang yalma phende pail pinemeba, memnangdi Allah sembe oro aukag taro pibukanga,” aro pirek.
25 Yesus mangaro yabiog li enekoag as soro kalurop as Yerusalem tanekoag nimi nhon sina Simeon wamog. Elna nimi sikne, Allah yubu wali uro saelba ulamogne wamog. Simeon ponekori tiro ulamogne, Allahri nimi Israel nimi yepto pipsinepne sembe nang-nangaro wamogpa, Allah Eldamne Yame Walingeri elag wali ulamog. 26 Allah Eldamne Yame Walingeri Simeon poneko wanaag ambare amognena, “Im So'o Saelba Uhiropneri, ‘Nimi Taluro Saelbamsulul' aro wepto pogtopne Kristus poneko anam imna komagna tebalulam kom,” aro ambare amog. 27 Allah Yameri Simeon poneko enero poa Allahri Mem Ae aramag poa wa'iog. Allahri Mem Ae aramag poa wa'ioghag Yusufap Mariapti yalamdekti, “Allahri Musaag yubu ambarelamogpa, mome toro pibogne sunsunum uro uaukap,” aro sikin me eneko Yesus poa wa'irek. 28 Poa wa'irekpa, Simeondi me aneko tobogti, saramag iamogti, Allah omeklamogti,
29 “Nani Allah, Andi salag piplumne neneko sunsunum uro ualam.
Weneogna, na Andi arukna wamnangeag, ‘Wana aingniro koloptahut,’ aro ambatnehom.
30-31 Andi samenag agha, ‘Nari nimi taulbahinun,’ aro welamlumdi, el poglamne aneko nari haingdi iamnaba,
nimi mog so'oag nimi tala-tala urop nimiri babe ibaukang.
32 Eldi tibin warelamloa saogha as tala-tala urop nimi Israel sisa urop kom nimi el nembahilul.
Andi ‘Taulbahinun,’ aro ulamlamne nenekona ibikti, Andi mabo nu Israel nang babe kipsukang,”
aro Simeondi Allah omekaog.
33 Wene aro Simeondi Allah omeklamogha ka'elamdekti, Yesus iliap ilinapti, “Nuri me sembe mane agha lelamla,” aro yaghe sembarek.
34 Simeon ponekori Yesus ili ilinag, “Allahri a'unag walia ulamsilul,” aro ambatsiogti, Maria kelenekoag yubu lelamogti, “Kembamen! Me enena Allahri samenag webongena, Israel nimi agha nimi maikno umag nembahileri, nenne maikno towalengero sekitsilul. El Allahri senenne sunsunum urop kekneba wamleba, nimi maiknori toro kokto waeplamukang. 35 Allahri senenne sunsunum urop kekneba wamleri ulamleba, nimiri Elag taongoro ulamikne agha nimi a'ero-a'ero wanaag seneraglamikne lag nembahilul. Andamne wana babe karogti alugloa saog wana sapkelul,” aro Simeondi Yesus Ilin Mariaag ambarog.
36-37 Sin Allahri Mem Ae aramag wameka anekoag kel nhon Allah silimu yubu tiplamog kel sabal taog kel nhon wamog. Keleneko Israel elme Aser sisa nimiri mangaroba agha mangkaekne, Fanuel elmangkel sina Hana wamog. Keleneko saren taogpa, eldi nengabo tobogha hengkun saekbare piogpog, ela'ange mali taogpa, Hana keleneko kaldam kel taog. Keleneko mangkaeka, hengkun taibuka taubuka teng wilindi nen eptopne wilindi uro yabiogpa, sabal kel wamog. Hana keleneko Allahri Mem Ae aramag aneko olog lamba palamog kom saog wamogpa, sinag kweleknag, “Allahag molbanun,” aro kwaneng ten koma Allahag moloro omeklamog.
38 Yesus ili ilinap Allahri Mem Ae aramag wamek abeneko pere keleneko babe aneko wa'alaogti, sin peramag sekelaog. Sekelaogti me aneko sembe Allahag “Naniong, wali ualam,” aro omeklamog. Allah omeklamogpa, sin Israel nimi agha, “Allahri as Yerusalem nimi sae lopsilul,” aro nang-nangalamek nimi wamekpa, kelenekori sin nimi niag ambarelamsiogti, “Me aneko yal,” aro nimi taneko ambarelamsiog.
Nasaret samoro yaeka
39 Yusufap Mariap as soro kalurop as Yerusalem wamdekti, Allahri aruktop yubu Musari mome toro pibogne sunsunum uro ni uarekti, me aneko poa samoro Galilea so'oag wamog as sikindinge Nasaret yaek. 40 Me eneko nolamogti, nong mikip talamog. Wana heklamogpa, Eldinge seneragna ot sepsebek aro seneraglamogpa, Allahri el o'ona senero wana waliri yeplamog.
Yesus me wamog liag Allahri Mem Ae aramag wa'iogha
41 Hengkun taibuka taubuka sop-sop yalamogha Yahudi nimiri ik wali sum Paskahb aro engerop sum nenelamek. Hengkun sop-sop yalamogha Paskah sumeneko Yesus Ili Ilinap babe “Nuni Allah kipto sani yoro tukap,” aro as soro kalurop as Yerusalem palamdek. 42 Yesus mangkaogha hengkun aonge wamogne nenekoag sin Yahudi nimiri, “Nuni Allah kipto sani yoro tukap,” aro sumene babe Yesus ili ilinap as Yerusalem piek. 43-44 Piekti Yahudi nimiri Allah kipto sani yoro tero urop sum eneko uro libekti, samoro palamek. Samoro palamekti Yesus Ili Ilindi sembamdeknena, “Nuri me nimi palamang nimiag nelebahil,” sembamdek. Samoro palamek aghana, Yesus Ili Ilin ekon pog, me eneko Yesus as Yerusalem ta'ap seogti wamog. Sumeneko ae siro ningki aneko piekti, “A'unap nhon yalamlom te?” aro sindi ae lom nimiap sinap ma'arop nimiabag ebarek. 45 Ebarek aghana iptek komdi, nen samoro, “Yerusalem ebanunam,” aro pirek. 46 Ik wilindi sum ebarektiogna, el Allahri Mem Ae aramag wamogha iptek. El Allahri yubu mome ambatsirop nang anabiag pukamogti, sindi lelamekne ka'ebiagha Eldi babe tangoro-tangoro hailamsiog. 47 Nimi ni wamekneri ka'elamekpa, Elag hailamekne ogna koma kangom agha sikneog sap tangaro ambarelamsiogpa, nimi wamek nimi tanekori yaghe senelamek. 48 Ili Ilindi babe Eldi lelamogne iptekti yaghe sembarek. Ilindi Elmeag yubu lelamogti, “Name sa'a sembe nunagna undo unualam? Aniap na aninapti, ‘Hual to?’ agha wana ophag agha elangkenam,” seog.
49 Ilindi wene seogpa Elmerina, “Sa'a sembe naiap kaenapti elamnerom? A'undi na sembe el wamsomne, ‘Yesus me enekori, “Ot Na Naniri ae lomag agha wamnundi orangeag wamnep kom,” sembamlariog wamla,’ aro a'un elwamlom semban,” seog.
50 Wene seogne nene sembe sin abenekori, “Nameri huro lepla?” aro wana olog seneragtek kom.