2 Korintus 11

Paulus eldamneap eldi yubu toraplamek nimiap sembe ambatsiogha

Wene na olog yubu ambatnuahinne, seneragna koma yubu ambatsiloa saogne yubu lemnuan. Yubu lemnuanne a'undi wana mamsoba, ka'ebahom senelamna. Aghana a'undi wana mamleba, nari yubu ka'ebalulom. 2 Nari yubu lepsene senelamnangena, Allahri a'un sembe, “Naringe taheng,” senenneag agha nari mon sek uro a'un sembe, “Yae wamsisene,” senelamsin. Undo senelamnangena, saren kelabo nhon ela'ange tanepne ponekoag iliri, “Tatnun,” aro salag piploa saog uro, nari a'un sembe, “Kristustinge mo malia orogha wamikpa, elag poa tarel pihinun,” aro salag pimno. 3 Salag pimnoba, a'undam nimi wanaag agha, “Kristustinge mo wamap,” seneptanep. Aghana samenag paghae wana hektopneri yubu neptopne ina agha Hawa kel eneko ina selepne toman pabiog saog uro, “Ora nimiri a'undi wanaag seneraglamlomne loba nembahiikag,” aro log senelamna. 4 Log senelamna sen nena, nuri samenag a'unag Yesus yubu walinge ambatsiboba, toro saelbaomne toman agha Allahri El Yame a'unag pipsiog. Aghana wenena, ora nimi a'unag yanep nimiri, “Yesusap, yubu walingeap, yame tatsinepneap sembe yog yubu ambatsukap,” aro lemnep aghana, a'undi wanaag, “Tam talul,” semban koma ka'elamlom.

5 Sin nimi tanekona, sindam nimi sembe, “Wepto pogsiog nang nubu phelektop nang wamap,” senel dalamang aghana sin, “Na phelekto nubunang taong,” senelamsin kom. 6 Nari yubu lilim emem arop yubu lenne sembe elne wamna kom aghana, Kristus yubu walinge sembe elne wamna. Na el wamnange neneko nia mangkina lero ulamobonge toman nimi ni whingag a'un sembe tibin uro lag nembarelamsibo.

7 Samenag, “A'un paliag urop nimi talulom,” aro a'unag kamna molbahin koma nadamne mombolag nenep tangto Allah yubu walinge a'unag ambarelamsisi. Undo unulamsinge nenekona, a'unag malia uahisi te? 8 Undop pagha tanena, Kristusag wana paliro ora so'oag winil dalamek nimi tanekori na yepto tarelamneekpa, a'unag ambarel ahisinge nenekona, sindi yeplamneeka haogha saog uro topsiri, a'unag yebel ahisi te? 9 Apna na a'unap nhon wamubuag, na teko ulamneogpa, a'unag ikinne pipsisi kom. Nanag teko ulamneogpa, nungkabo Makedonia so'oag agha yalamekti, na teko aba ni tarelamneek. Nia mangkina uro yabalamogpa, “A'unag ikinne pipsineag,” aro nadamne yae uptangto wamsiri, amik babe yae up tangkamnun. 10 Nari a'unag ikinne neneptan koma ulamsiri ulamnange nenekori wana yeng ulamnelba, a'un Akhaya so'oag wamlom nimi nhondi babe wana yeng ulamnelne neneko kom nembanep kom. Kristus yubu sikne nanag wamnelba, wene aro lemnange babe sikne agha lemna. 11 Nari a'unag ikinne neneptan koma ulamsinge sembe a'undi senelamlomne, “Nu o'ona sembahiog kom ane sembe, nunag molbahin koma wamog,” senelamlom te? Allahri el wamlangena, nari a'un o'ona senelamsin.

12 Nimi nhon-nhon a'un wamlomag tanekoa, “Paulus elkaboap nika-nika saog wamap,” aro maibil dalamnepne sembe, sindam nimi nunap nika-nika saog nenep tanepne ero kemelamang. Aghana, “Sindam nimi nunap nika-nika saog nenep tanepne ibukang kom,” aro nari wene a'unag kamna molbahin koma yubu ambarelamsinne tipto ambarelamsinun. 13 Sin nimi taneko haing kunuhirop yubu ambatsirop nimi wamang. “Kristusti wepto pogsiog nang wamap,” aro lag nenel dalamang aghana, sik uro Kristusti wepto pogsiog nang wamang kom. 14 Tam nene sembe lo'om seheng kom. Phia sikini nubunge Satanas nenekori eldamne lag nenel dalamlangena, Allah arukna imagne malaikat warelamlange saog uro keknep tanep. 15 Ane sembe Satanas nenekori arukna babe sindam nimi lag nenel dalamang nena, wana porog nembahinep yubu ambatsirop nimi saog uro keknel dalamang. Tam nene sembe lo'om seheng kom. Sindi malia ulamangne sunsunum uro amik sin kom taukang.

Paulus seklelamogne sembe ambatsiogha

16 Nen sap sarikto yubu lelamnange, nimi nhondi na sembe, “Limitukne,” sembaneheng kom. Aghana limitukne yog nimiri ambarelamsiong yubu a'undi wanaag, “Tam talul,” semban koma ka'elamom saog uro, nadamne paliag nenep tangtop yubu olog ka'eamlulom. 17 Wene a'unag yubu yangaro nadamne paliag nenep tanuanne, nu Saelba Uhiropne ponekori yubu lemnep saog uro lemnuan kom aghana, limituk yubu saog uro lemnuan. 18-19 A'undam nimi sembe, “Wana hektop nimi agha wamap,” senel dalamlom. “Wana hektop nimi wamap,” seneptangtopneag agha sin limituk nimi maiknori mog so'oag uropne sunsunum uro maiptangto ambarelamsiang yubu a'undi wana mambi agha awi uro ka'elamlom. Ane sembe, nari babe olog maiptangtop yubu ambatnuahin. 20 A'undi wana mamnaba, mo ka'elamlom nena, nimi nhondi a'un arukna nenelamsil to, a'undinge aboapti telamla to, a'undinge haoghaba tolamla to, paliag nenel dalamla to, a'undi abomag taeplamsil to, a'undi wali ka'elamsilom. 21 Yaghe nari a'unag undo ulamsisi kom agha, a'undi na kipnep komdi, “Pesange,” senelamnelom te?

Undop pagha tanena, nadamne limituk nimi saog nenep taneri, ora nimiri log kom uro maibil dalamang saog uro nari babe log kom uro maiptanun. 22 Sin nimi taneko Ibrani nimi wamang te? Na babe Ibraninge wamna. Israel ponekori mangaroba mangarobari sin mangkahiek te? Na babe Israelne wamna. Abraham ponekori nimi yina likto piogne agha mangap taek te? Na babe Abrahamdi mangaroba wamna. 23 Sin nimi taneko Kristus arukna wamang te? Yubu sikne lag phoro samoro lemne tanena, nenek salehirop nimiri yubu saog wamnep aghana, lag phoro lemnun. Nari sin phelekamsin. Sin phelekamsinba, nanap sunsunum kom nena undo. Sop-sop whin seklero tolamsi. Ik etpare nimiri na haing sae kaupto kop aeag tobongkimneek. Nimiri maiknoro taeplam-taeplam lopneek. Ik sulu tebanep saog ulamsi. 24 Yahudi nimiri na taeplam-taeplam lopneek nena, selek phende wilindi a'iliro ik teng nhon epto aobare taeplam-taeplam lopneek. Ik teng nhon epto aobare taeplam-taeplam lolamneek nena, ik lambare saelbamneekti taeplam-taeplam lolamneek. 25 Nimiri na kameag agha olamneek nena, ik wilindi uro yabiog. Ik nhon kirikti omneek. Mag alip toman na palamsi kabong ik wilindi kolapto yabiog. Ik nhon sum kabong kolabaogpa, na mag laut longoropne nusamag inipna nhon, yo'obi nhon maghag pol keyaglamsi. 26 Sop-sop as nhonag pang, nhonag pang ulamsi. Palamsi abeneko na ya'ag omnep nena, mag kaunaghap, haoghaba torop nimiap, Yahudi nimiap, Yahudi kom nimiap ni tanekori na ya'ag omnebag yabalamsi. As soro kalurop asag babe, pai aldesag babe, mag laut longorop maghag babe na ya'ag tebanebag ulamsi. Apna nimi nhon-nhonna, sin Kristusag wana palirop nimi senelamsisi aghana, nungkabo taptopne komdina, “Na omneikag,” senelamsi. 27 Na kilim weanga whin seklero awe tolamsiri, ik sulu kwahing mana babe malamsi kom. Kwaneng yo babe, mag yo babe seklelamsiri, kwaneng ten koma ulamsi. Ag wangaroba babe orogti son seklelamsi. 28 Na sop-sop ikin seklelamsi agha wene nen nhonneri wanaag ikin nenelamnel nena, Kristusag wana palirop nimi tala-tala winil dalamang nimi ni sembe, “Yae paiamsisene,” senelamnangeri nen ma'aro wana ikin nenelamnel. 29 A'un nimi nhon haing pesa urop tanena, na babe pesa uaneloa saog nimi nenel dalamna. Nimi nhondi a'un perarekto phukul pinep ina malinge toman pabahinep tanena, na wana yo senelamna.

30 “Nadamne maiptangto lemnepneog lepsene,” senelamna tanena, ot nadamne pesa wamnange lag nenep tanepne sembe maiptangto lemnun. 31 Na ot sikne agha lemnange nene, nu Saelba Uhiropne Yesus Ili Allah ponekori el wamla. El poneko ya'ag uro omeklamukap. 32 Na samenag as Damsyik so'oag wamsiba, yubu sia leropne Aretas poneko umag saelba uhiropne nhondi na sarekereplamneogti, “Saelbaukap,” aro as soro kalurop as Damsyik aneko yae welamneek. 33 Sindi na, “Oro saelbaukap,” aro welamneek aghana, prii kau saog uro wiroba lomag wa'isi. Kau lomag wa'isiri tognop tahiba, yog nimiri, “Tognoro la'imbalul,” aro yepneek. Kau lomag wamsiba, yeplamneek nimi tanekori as kanero leka solingkiropne nenekoag ka'en lom toman paiag sip haing kerekto pelengkaneekpa, na saelbaneog kom.