Wana walingeag agha maiknoro tatsinepne sembe ambatsiogha
8
Nangkabo,
sin Kristusag wana paliro Makedonia so'oag winip tangtop nimiag Allahri wana yororo tatsiogne sembe,
“A'un el nembahisebe,”
senelamap.
2 Sin maikno uro seklebanepne mipsiropneag saeagha orogti,
ikin uro wamong.
Ikin uro wamongneap,
sindi wanaag loloro awi ulamsiongeap agha sindi wana walingeag,
“Maikno uro tatsisebe,”
senelamong.
3 Sindi saeag uropne sunsunum uro tatsiongne nari ipsinori,
sik uro yabio aro ambarelamsin.
Apna,
“Sindi undo tatsinep,”
senelamnonge phelekto wanaag agha tatsiong.
4 Nunag sarikto yubu mikip uro mololamsiong nena,
“A'undi wana nunag yorolamsimun tanena,
nu a'unap sae tiptangto Allahri wepsiog kelmabo me yepsukapti,
nuri a'un saeag nembabenge toplulom,”
aro nunag molbahiong.a
5 Nuri sin sembe tiro nang-nangaro senelamobonge,
“Ologha undo tatsiikne sunsunum,”
senelamobo.
Aghana sindi maiknoro tatsiong nena,
Allahri seneropne sunsunum uro sindam nimi sam nu Saelba Uhiropne poneko saeag paip tangkamongdi,
nuri saeag babe nenep taong.
6 Ane sembe samenag Titus ponekori a'unag,
“Allah elmabo yepsineba poloro wimbaukap,”
aro alniro ambatsio.
Ambatsio saog uro,
nuri nen el a'unag poglamap nena,
“Nen tipto komobi ulamlulam,”
aro wenero ambarobo.
7 Wene a'undi nia mangkina ulamlom nena,
paliagne mo ulamlom.
Kristusag wana paliropne babe,
yubu leropne babe,
el tangtopne babe,
“Sol wali uro uahabe,”
seneropne babe,
a'undi nu sembe o'ona senehiropne babe ni aneko mo paliagne ulamlom.
Ane saog uro wene yepsineba tatsiropne babe paliag nenero tatsululom.
8 “Tatsululom,”
alamnangena nari arukto ambarelamsin kom.
Aghana ora nimiri wanaag agha tatsiongne pere a'undi o'ona senehinne nene,
“Sunuro mipsineba,
sikne lag nenep talul,”
aro yubu ambatsin.
9 “Tatsululom,”
sen nena,
nu Saelba Uhiropne Yesus Kristus ponekori nu sembe wana yororo tatsiropne sembe a'un el wamlom.
El tupne wamog aghana,
a'un sembe el saeagha orogne nenep taog andarina,
el saeagha orog wamogne toman agha a'un tup nimi tanep.
10 Tam nene sembe a'un yepsinep yubu olog wenero ambatnuahin.
Hengkun samenagneag a'undi sam,
“Tatsisebe,”
senelamomdi yepsineba alniro tatsiom.b
11 Ot wenena a'undi alniro,
“Tatsisebe,”
aro uaomne komopto tatsululom.
A'undi saeag uropne sunsunum uro komopto tatsimun andarina,
a'undi wana awi uro,
“Tatsisebe,”
senelamlomne neneko sunsunup talul.
12 Nimi nhondi wana awi uro,
“Tatsisene,”
senerop tanena,
el saeag wamna komne agha tatsinep kom aghana,
el saeag uropne sunsunum uro tatsinepne agha wali sunsunum wamla.
13 “Yepsisom,”
alamap nena,
“A'un seklelapmunne toman ora nimi wana keyagman taukang,”
aro ambarelamsiap kom.
Ot a'un ni nika-nika uro wali wamsom senelamap.
14 Wene a'un saeagha phelekto salelamlomne agha sinag teko ulamsilne yepsinep andarina,
sinag phelekto wamlange agha a'unag teko ulamsinepne yepsinep.
Abene agha a'unap sinap nika-nika uro yeptangto wamnep.c
15 Samenag wamek nimi sembe mome toro pibog yubu sunsunum uro yaboho.
“Phelekto tobek nimi sembe babe teko ulamsiogne phelektaog kom.
Apna olog uro tobek nimi babe teko ulamsiog kom,”
aro mome toro pibog.d
Titus elkaboap sembe ambatsiogha
16 Wene nari wanaag agha a'un sembe,
“Sol wali uro yepsisene,”
senelamna saog uro Allahri Titusti wanaag nika uro seneropne pibog.
Ane sembe nari wana Allahag yororo kiplamna.
17 Nuri Titusag,
“Komobol pululam,”
aro wembabo yubu eneko wali ka'ebao.
Mo ka'elobo kom aghana,
ka'ebaori yeng sirik uaoba,
el wanaag agha,
“Yepsisene,”
aro a'unag yalamla.
18 Elap nhon poglamap nimi enena,
Kristusag wana paliro winip tangtop nimi tala-tala wamang nimi niri,
“Yubu walinge sabo nenero tongolamla,”
aro nungkae ane maiplamangba,
Titusap nhon poglamsiap.
19 Yubuag mo maiplamang kom aghana,
Kristusag wana paliro winip tangto ubu paiamang nimi tanekori nimi ene wepto,
“Yepsiroba pabirop nimiap nhon pululom,”
aro poghong.
Nuri yepsiroba winiro pololamap nena,
wanaag agha awi uro,
“Yeplamsiberi nu Saelba Uhiropne ponekori si paliag nembaukap,”
aro poloro tongolamap.
20-21 “Ot walinge agha ulamsebe,”
senelamapti nu Saelba Uhiropne whingag yepsiroba poloro tongolamap.
Aghana el whingag mo ulamap kom.
Yepsiroba aneko nimiri nubu uro tarelamsiang.
Tarelamsiangne ene nuri pabalamapne toman,
“Nimi nhondi nu se'el nembahileag,”
aro ot walinge mo nimi whingag babe lag phoro ul palamap.
22 Sin abenekoap nen nhon poglamap nimina,
nungkae nhondi sop-sop maiknoro sol wali uro tolamoba ililamobori,
el mibobonge wamla.
Wene a'unag wana palilamlari,
el wanaag agha,
“Sol wali uro awe topsene,”
seneropne nen ma'aro nubu talamla.
23 Titus ponekona,
nanap sae tiptangto wamlari,
nanap nhon a'un sembe awe nikne tolamnam.
Nungkabo abenekona,
Kristusag wana paliro winip tangtop nimiri sin wepto pogsiongba,
Kristus kiptop nimi wamdang.
24 Ane sembe nuri wana awiag agha a'un omeklamsibo yubu nene sunsunum uro ul palapmundi,
a'undi sin o'ona senehinne babe Kristusag wana paliro winip tangtop nimi whingag lag nembarelamsululom.