6
Wene nu Allahap sae tiptangto awe tolamap.
Ane sembe a'unag wenelamsiap nena,
Allahri a'unag wana yororo senelamsilne a'undi wanaag tobongkiamlomne a'unag pongoro yabile komag aro yae up tangkamlulom.
2 Tam nene sembe Allahri yubu lelamog nena,
“Nari sumene sembahi sum eneko andi leplum yubu ka'ebahi.
Nari an talulangkehi sum eneko yepkehi,”
seog.a
A'undi kemelamsut.
Wene wamapne Allahri wali sembaog sum.
Wene wamap sum enena,
Allahri nimi taulba uhirop sum.
3 Nuri yubu ambatto yeplamsiapne abeneko,
“Nimiri nunag tam pipsiikag,”
aro puri tikto phukul ingkineba saogne nhon babe nimi wali pinep ina toman palilamap kom.
4 Aghana nia mangkina uro yabinep ina agha,
“Allahri arukna wamap,”
aro lag nenel dalamap.
Nimiri nu luknuro uhinneag babe,
seklenneag babe,
eka'uk uropneag babe wana khapto ulamap.
5 Nimiri nu opsionga babe,
haing sae kaupto kop aeag tobongkipsionga babe,
nimiri yanghang alamsionga babe awe toro ulamobo.
Ae inipna mamna koma,
kwaneng ten koma,
kilim weanga awe tolamobo.b
6 Allah sembe awe tolamobori,
tolamap nena,
wanaag malinge wa'eptopneag agha,
el tangtoba seneragnangeag agha,
wana pailingkina uropneag agha,
wana walinge uropneag agha lag nenep tangto el sembe awe tolamap.
Eldamne Yame Walingeag agha,
wanaag o'ona senehiropneag agha,
7 sik yubu leropneag agha,
Allahri mikipneag agha el sembe awe tolamap.
Ora nimiri,
“Aisa nenep tangtop nimi mal tabaukap,”
aro saeri yin salelamlonga saog uro nu sae sirik sibap,
sae waneng sibap ni sae phende abenekori ot wana porogne saelba nu aisa nenelamsiang nimi toraplamsiap.
8 Nu si paliag nembahinepne toman,
mombolag nembahinepne toman babe,
nu san tilibahinepne toman,
nu omekahinepne toman babe awe tolamap.
Nuri sikne lelamap aghana nimiri,
“Haing kunuhirop nimi,”
senelamsiang.
9 Nu sembe tapto el wamang aghana,
ekon nimi saog uro ulamsiang.
Nu sop-sop tebanebag ua ulamap aghana,
nu kamag uro wamapne kembahisut.
Nu taeplam-taeplam lopsiong aghana,
nu ya'ag opsiong kom.
10 Nu wamapne kembi agha nimiri,
“Wana ikin uro wamang,”
sembahinep aghana,
nu sop-sop wana awi uro wamap.
Nu sembe,
“Saeagha orog nimi,”
sembahinep aghana,
ora nimi maikno tup nenelamsiap.
“Saeagha orog nimi,”
sembahinep aghana,
nia mangkina nunag wamla.
11 A'un Korintus nimi sembe wana maiknoro seneraglamsiapti,
a'unag lag phoro yubu ambarelamsiap.
12 Nuri wana serektop komdi,
a'un nuri wanaag nimi wamlom aghana,
a'undi wana nu sembe serekaombana,
nu a'undi wanaag wamnep kom.
13 Wene nari maboag yubu lelamna saog uro mololamsin nena,
nuri a'un sembe wana ina kubatsibo saog uro a'undi babe wana ina nu sembe kubatsululom.
Kristusag wana palirop kom nimiap sae tiptangto wamnep komne sembe ambatsiogha
14 Kristusag wana palirop kom nimiap sae tiptangto ina nhonag nelepto tol tongolamseng kom.
Wene aro lemnangena,
Allahri irikna ingisaploropneap,
wana porog senenneap nikag wamnep kom.
Apna tibin wareropneap inibinneap nikag ma'ap tanep kom.c
15 Kristusap el aisa neneropneapd yubu nikne lero wamnep kom.
Apna Kristusag wana palirop nimiap elag wana palirop kom nimiap seneragna nikne wamnep kom.
16 Mem ae Allah omektop aeap,
mem ae phia pharop aeap ma'aro nikag nembanep kom.
Wene aro lemnange nenena,
nuna Allah kamag uropne ponekori mem ae wamap.
Tam nene sembe Allahri yubu lelamogti,
“Na sinap nhon ua ulamneri,
sin anabiag wa'ina yabalamnun.
Na Sikini Allah wamneba,
sinna nari paia uhirop nimi wamukang,”
seog.e
17 Ane sembe nu Saelba Uhiropneri yubu lelamogti,
“Sin anabiag agha lambamundi,
a'eptangto ul palamlulom.
Sembenga kalup tangtopne Allah sembe pimnep komne nhon babe po'oban koma wapmunba,
nari a'un wali toro kipsinun,”
seog.f
18 Nia mangkina mikip uro Saelba Uhiropne ponekori,
“Na a'un sembe A'uni taneba,
a'un na sembe nari mabo kelmabo wamlulom,”
seog.g