Allahri salag pibog yubu wendogne ambatsirop nimi sembe ambatsiogha
3
Wene aro lemna tanena,
nundam nimi nen alniro maiptangto sekelil dalamap sembanep te?
Ora nimi a'unag yanba,
a'undi sinag lemnep nena,
“Nimi etneap ma'ap tangto wamlomdi,
yubu poa yalom?”
senep.
Wene senepti sinag,
“Mome toroba lag nembatsululom,”
aro sinag molbahinep.
Undo sinag molbahinep aghana,
a'undi nu sembe babe ekon te?
A'un nimi nhondi to,
ora nimiri to nunag mome toroba tatsisengba,
a'unag lag nembatsisebe taneogna,
sik sembanep senelamlom te?
2-3 Nunap ma'ap tangto sekitsinep mome toro pairop nena,
Kristus eldamneri nu sembe mome toroba tatsiloa saog uro nimi ni whingag a'undam nimi wamlomne pere agha kekneba lag nembarelamsil.
Nu sembe Kristus ponekori mome toroba lag nembarelamsilne enena,
mog so'oag nimiri bolpen saelba mome tolamang saog uro kom.
Mog so'oag nimiri sabo kirik alibag mome toroba saog uropne kom aghana,
nu sekitsinep momena,
nimiri wanaag mome tolamloa saog uro lag nembarelamsil.
Kristus ponekori nu sembe mome toroba lag nembarelamsil nena,
nuri a'unag Kristus yubu ambatto yeplamsibo.
Nuri ambatto yeplamsibonge toman agha Allah kamag uropne poneko el Yameri a'undi wanaag tolamoba,
a'undi sik senelamlom.
A'undi sik senelamlom nena,
Kristusti nu sekitsiog mome toro pairoba saog uropne nuri wanaag top taog.
Nimi niri a'undi sik senelamlomne kembi agha nu ambatsirop nimi sembe el tanep nena,
nu sik tapto Kristusap ma'ap tangtopneag agha yubu ambarelamsiap.
4 Nuri Kristus pere agha undo Allahag wana paliro sik senelamap.
5 Nundam nimi mikipneag,
“Sunsunum wamap,”
aro seneraglamap kom aghana,
Allahri nu mikip nenelamsilne agha sunsunum uro wamap.
6 Eldi yubu nikne wendogne amoro ambatsiropne sembe nu mikip nenero sunsunum nenelamsil.
Allahri yubu nikne wendogne momeag mo toro pibog kom.
Aruksirop yubu momeag mo wamlangeri nimi teplopsinep.
Aghana yubu nikne wendog yubuag agha El Yameri nimi kamag nenelamsil.
7 Allahri samenag salag pibog yubu aneko sabo kirik alibag,
“Yepsinun,”
aro mome toro pibog aghana,
nimiri sunsunum uro uanep komdi nimi teptopne mo lag nembanep.
Samen salag pibogne ene imang wareroba toman lag taog aghana,
nimi teptopne mo lag nembanep.
Musa ponekori yubu eneko payaog sum eneko el whingag imang warelamogpa,
Israel ponekori likto pirop nimi tanekori Musari whing kemelamekpa,
omomdi kembanep kom wamog.a
Musa whingag imang warelamogne omomdi kembanep kom aghana,
olog amikag a'uplamog.
8-9 “Nimi yepsinun,”
aro arukahiogpa,
yubu eneko sunsunum uro urop kom nimiag tam pelengero teplopsinep aghana,
yubu ambatsiropne pere agha imang wareropne lag taog.
Undop pagha tanena,
Allah Yameri,
“Nimi yepsinun,”
aro nimi wana porog nembahinep yubu ambatsiropne eneko imang phelekto warehinneog wamla.
10-11 Nari yubu lemnange enena,
samen imang wareroba wamogne eneko ot pogtopne agha wamogpa,
imang wareropne neneko olog uro wareamog.
Kom tanepne neneko imang wareropne pere agha paliag nenero lag nembaog tanena,
ya'ag uro wamlulne neneko ot nubu uro phelekanepneog wamla.
Ane sembe wene ya'ag uro imang warelamlange neneko samen a'uplamogne aneko phelekto paliag uropne wamla.
12 Wene Allahri salag pibog yubu wendogne ambarelamsiap yubu eneko,
“Ya'ag uro nubu phelektopne wamlul,”
aro wana palilamap.
Ane sembe nu wana khaptop sirik wamapti,
yubu lag phoro ambarelamsiap.
13 Musa samenag el whingag imang warelamogpa,
Allah yubu Israel nimiag sop-sop ambarelamsiogti,
komopto lelamoghag abeneko el whing marukul dalamog.
Marukul dalamog andarina,
el whingag imang wareropne a'uplamogha aneko Israel nimiri imnep kom.b
Aghana nuri yubu ambarelamsiapne undo unulamap kom.
14-15 Musari yubu ambarelamsiogti,
eldi whing marukul dalamog aghana,
sin Israel nimi taneko usog mikip tangom agha wene wamap li babe sindi nimi yina liksiek nimi usog mikip wamang.
Allahri samenag Israel nimiap yubu nikne salag pibog yubu ene wene babe mome kemelamangdi,
yubu lelamang aghana,
Musari eldamne whing marukul dalamog saog uro sindi wanaag maruktangtoba nhondi sindi wanaag seneragnange wana sao kauplamsil.
Ot Kristusap ma'ap tangtopne pere agha sindi wanaag maruktangtopne neneko kom tanep ane sembe,
wene babe sin usog mikipti seneraglamang kom.
16 Aghana nimi nhon nu Saelba Uhiropneag samoro yaleba,
maruktangtopne neneko toro kolbalul.
17 Nu Saelba Uhiropne ponekona,
kamag nenehirop Yame wamla.
Nu Saelba Uhiropneri Yame ua urobag nimi kaupsiroba loptangka urop.
18 Nu whing tognoro maruktangtop kom nimi ni wamapne nu Saelba Uhiropne imang wareroba nunag lag tangto yabalamla.
Nu Saelba Uhiropneri Yame imang warelamla saog uropne nunag lag tangto yabalamlaba,
el yame sunumna wamlange saog talamapne pere imang wareroba aneko nunag nubu tangto yabalamlul.