Yohanes 8

Aghana Yesus Zaitun yimag piog. 2 Wamogha lukunap nen Allahri Mem Ae aramag aneko piogpa, nimi maikno elag yalamek. Yesus aneko pukogti, nimi taneko amoro ambarelamsiog. 3 Yubu ambarelamsiogpa, Musari yubu amohirop nangap, Farisi nimiapti kel nhon pabiek. Pabiek kel eneko nengabo nhon ela'ange komneap tekel dalogdekag abeneko nimiri ibek. Haogha torop kel eneko salero payaekti, nimi taneko nusamag sekirek. 4 Sekirekti Yesusag yubu lelamekti, “Nai an nimi amolamsilamne wamlam. Haogha torop kel ene nengabo nhon ela'ange komneap tekel dalogtangne nimiri ibang. Ibang kel ene salero payaap. 5 Musari nunag aruksirop yubuag, ‘Undop kelabo kirikti ya'ag oplulom,’ aro arukahiog. Andi lepmenne ka'ebaukap,” seek. 6 Sindi wene seek nena, “Eldi malinge leplenge sembe elag tam pibukap,” aro mipto lebek.

Wene aro lelamekpa, Yesusna yan yabu aksuro pulingkiogti, eldi sae tomdi so'oag mome tolamog. 7 Yabu aksuro so'oag mome tolamog aghana, sindi elag tipto haim-haim alameka sembe eldi usog ebelingkiog. Ebelingkina sinag yubu lelamogti, “A'un wamlom nimi nhondi, ‘Na malia urop komne,’ seneptale tanena, eldi samenag kirik tobom agha kel ene oplul,” seog. 8 Wene seogti, nen amubom agha so'oag mome tolamog.

9 Yesusti wene seogne ka'ebaekti, yando nimi saog wamek nimi nhon-nhon samenag menangaro la'anil dalamekpa, ni anekoa la'anip taek. La'anil dalamekti ni piekpa, Yesusap nimi nusamag sekirek kel enekoap agha mo wamdek. 10 Wamdekti Yesusti usog ebom agha kel enekoag, “Kain, nimi taneko ni tala piang? Anag tam pimnep nimi nhon wamla to, kom to?” aro haibaog.

11 Wene aro haibaogpa, kel enekori, “Nai, nanag tam pimnep nimina orog,” seog.

Wene seogpa Yesusti, “Nari babe anag tam pimnun kom. Hae pimendi, andi malia ulamomne wene lipmendi, nen malinge uaheng kom,” seog].

Yesusti, “Na mog so'o tibin wareropne wamna,” alamogha

12 Yesusti nimi tanekoag nen yubu lelamogti, “Na mog so'o tibin wareropne wamna. Nimi nanag neleplamneik nimi inibinne toman palamukang kom aghana, sinag tibin wareroba kamag nenehiropne neneko sinag wamlul,” seog.

13 Wene seogpa, Farisi nimi tanekori, “Andi andamne sembe lag nenep tangto ambarelamsilam. Andamne sembe lag nenep tangto leplam tanena, nimiri sik sembanep kom,” seek.

14 Wene seekpa, Yesusti sinag samoro, “Nandamneri nandamne sembe lag nenep tangto lel dalamna yubu eneko, na el wamnange agha lelamna. Na talaba yahiri, tala pinunne anena na mo el wamna ane sembe, nari lag nenep tangto lel dalamna yubu babe sik sembanepne wamla. Aghana na talaba yingkiropneap, tala pinepneap abenekona a'un ekon. 15 A'undi nimiag yubu tam karepto palilamlomne nimi nongag seneragna agha tam kemero kareplamlom. Nari nimiag tam karepto palinne nimi nhonag babe wene orog. 16 Nari nimiag tam karepto palinne babe wamso tanena, sikne agha wamnep. Na mori kom aghana, na pogneogne Nani ponekoap nhon wamnam ane sembe, nari sikne agha tam karepto pimnep. 17 Musari aruksirop yubu a'undi saelbamlom yubu nenekoag, ‘Nimi phenderi, “Undo-undo uro yabioba imnomo,” aro lag nenero ambatsirop tanena, sik sembanep,’ aro mome toro pibog. 18 Nari nandamne sembe lag nenep tangto ambarelamsinba, na Naniri na pogneogne ponekori babe na sembe lag nenero ambarelamsil,” aro ambatsiog.

19 Wene aro ambatsiogpa, sindi yubu lelamekti, “Ani ponekona andala?” aro haibaekpa Yesusti, “A'undi nanap Naniap sembe a'un ekon wamlom. A'undi na sembe el wamsom tanena, Nani babe a'undi el wamnep,” aro ambatsiog. 20 Yesusti ni ambatsiog yubu anekona, Allahri Mem Ae aramag agha Allah sembe kamna kaptoba poloro pimnebag sekamogti, nimi ambatsiog. Nimi whingag ambarelamsiog aghana, el saelbanep ko'o anam kwelekto paiamog kom ane sembe, nimi nhondi babe el saelbaek kom.

Yesusti, “Na mog so'oag siba yahi kom,” aro ambatsiogha

21 Yesusti nen sinag yubu lelamogti, “Na pineba, a'undi na ebanululom. Ot a'undam nimiri malia uropneag agha tebalulom. Na pineri wamneag aneko a'un yanep kom,” aro ambatsiog.

22 Wene seogpa, Yahudi nimi nubunang tanekori yubu lelamekti, “Eldi lelamlari, ‘Na pineag a'un yanep kom,’ alamlangena, eldamne optangka tebanepne sembe lelamla te?” alamek.

23 Wene alamekpa, Yesusti yubu lelamogti, “A'un wamlom nena, tau siba lag tangtop nimi wamlom. Na wamnangena, tai siba lag tahinge wamna. A'unna mog so'oag nimiri seneragto ul piropne sunsunum uro ulamlom aghana, nana mog so'o eneag nimiringe wamna kom. 24 Ane sembe nari a'unag yubu ambatsin nena, a'undam nimiri malia ulamlomneag agha tebalulom. Lemnange nenena, ‘Na wamna,’ aro lelamnange sembe a'undi sikne aro wana paiamnep kom tanena, a'undam nimiri malia ulamlomneag agha tebalulom,” seog.

25 Wene aro ambatsiogpa sindina, “Anna etneri lelamlam?” aro haibaek.

Wene aro haibaekpa, Yesusti samoro, “Samenag agha lelamnonge a'unag sap sarikto ambatsinun te? 26 Nari a'un sembe tam karepto pelengkimnepne nari yubu maiknoro lemnep. Aghana na pogneogne ponekori yubu ambareamneogpa, ka'eamsinge neneko mog so'oag wamang nimiag ambarelamsin. Na pogneogne poneko sikne wamla,” seog.

27 Eldi, “Na pogneogne poneko,” seogne Ili Imagne sembe lebog aghana, sindi seneraghek kom. 28 Ane sembe Yesusti sinag yubu lelamogti, “A'undi na mog so'oag nimi tangtopne paliag nembanumun tanena, na wamnange el talulom. Anena nari ulamnange na mori kom aghana, na Naniri ambareamneogne sunsunum uro tipto ambatto ulamnange el talulom. 29 El na pogneogne poneko nanap nhon ua ulamnam. Nari sop-sop eldi wana awi senenne ulamna ane sembe, eldi na lia ulamnel kom,” aro ambatsiog. 30 Yesusti wene aro ambarelamsiog abeneko pere nimi maiknori Yesusag sikne aro seneraglamek.

“Sikne neneri nimi kaupsiroba lopsilul,” aro ambatsiogha

31 Yahudi nimiri Yesusag sikne aro seneraglamek nimiag Yesusti yubu ambarelamsiogti, “A'undam nimi nari ambarelamsin yubuag meptangto wapmun tanena, a'unna nari yubu ka'ero neleptop nimi taptopne wamlulom. 32 Undo unulapmun tanena, a'undi sikne el uro wapmunba, sikne eneri a'un kaupto urobag agha a'un lopsilul,” aro ambatsiog.

33 Wene aro ambatsiogpa, sindi elag samoro yubu lelamekti, “Nunna Abrahamdi nimi sisa yina mangaroba wamap. Nunna, ik nhon babe nimiri umag arukna nenep tangtop nimi wamap kom. Andi nu sembe, ‘A'un kaupto urobag agha lopsilul,’ selamne neneko welaro lemnep?” aro haibaek.

34 Wene seekpa, Yesusti sinag yubu lelamogti, “Nari yubu sikne agha ambatnuahin. Nimi etneri mali-malia urop tanena, nimi eneko, ‘Malia uahane,’ senenneri arukna nenep tangtopne wamla. 35 Nimiri ae lom nhonagna, ae ngaingeri awe toropne arukna nhon wamnep aghana, arukna neneko ae lomag ya'ag urop komdina, ae ngainge elme saog urop kom. Ot ili elme taptopne agha ya'ag uro ae lomag nimi wamnep. 36 Ane sembe Elmeri a'un kaupsirobag agha lopsile tanena, a'un tapto kaupsirop kom nimi wamlulom. 37 Na a'un sembe el wamnangena, a'un Abrahamdi nimi sisa yina mangaroba wamlomne el uro wamna. Aghana nari ambarelamsin yubu a'undi wanaag meptanepne sembe kolo nenelamlom kom. Ane sembe na, ‘Obukap,’ aro ulamnelom. 38 Na Nani ua urobag ililamsinge agha nari a'un ambarelamsin. A'unna, a'uniri ambatsiroba agha a'undi ulamlom,” aro ambatsiog.

39 Wene aro ambatsiogpa sindina, “Nuni ponekona Abraham wamla,” seek.

Wene seekpa Yesusti, “A'un sik uro Abraham elmabo wamsom tanena, Abrahamdi ulamogne a'undi sik uro ulamnep. 40 Ot wene Allahri nanag sik yubu ambatneoba, ka'elamnange sunsunum uro nari a'unag tipto ambarelamsinne sembe a'undi na, ‘Obukap,’ aro ulamnelom. Abrahamdi undo unulamog kom. 41 A'undi ulamlomne enena, a'uni eldamneri ulamlange sunsunum uro ulamlom,” aro ambatsiog.

Wene aro ambatsiogpa sindina, “Nuna nimi salik-malik teklop tangtopneag agha nu mangkahiek kom. Nuni ot nhonog nena, Allah wamla,” seek.

Phia sikini nubunge elmabori uropne sembe Yesusti ambatsiogha

42 Wene seekpa, Yesusti sinag yubu lelamogti, “A'undina, ‘Nuni nhonogne Allah wamla,’ selom aghana, Allahri na pogneogpa, elag agha yahiri, ane wamna. Na mori wanaag agha yahi kom aghana, eldi na pogneogpa yahi. Ane sembe a'uni Allah wamso tanena, na o'ona sembanohom. 43 Nari a'unag lelamnange a'undi sa'a sembe olog seneragto el talamlom kom? El talamlom kom nena, nari ambarelamsin yubu eneko a'undi ka'ero saelbanep kom yubu wamlaba, el talamlom kom. 44 A'undi a'uni nenekona, phia sikini nubunge elmabo wamlom. Eldi, ‘Malinge uahane,’ senenneag a'undi nelepto, ‘Ulamsebe,’ senelamlom. El neneko samenag agha nimi ya'ag ohiropne wamog. Eldamne wanaag sikne orog ane sembe, sikne anekoag sekil pinep kom. Eldamne orolena leropne agha wamla ane sembe, el nenekori orolena lerop tanena, eldamneri yubu agha lelamla. Orolena lenne neneko elag agha lag tangtop. 45 Aghana narina sikne agha ambarelamsin. Ane sembe a'undi nari ambarelamsinne sembe sik senelamlom kom. 46 A'un nimi nhondi na sembe, ‘Malia uao,’ sembahom tanena, malia uroba nene lag nembanep te? Nari yubu sikne ambarelamsin aghana, a'undi sa'a sembe nanag sikne aro seneraglamnelom kom? 47 Allah elmabo urop nimina, Allahri yubu leropne ka'ebanep. Aghana a'unna Allah elmabo wamlom kom ane sembe, a'undi nari yubu lelamnange ka'ebanep kom,” aro ambatsiog.

Yesusti eldamneap Abrahamap sembe ambatsiogha

48 Wene aro ambatsiogpa, Yahudi nimi tanekori Yesusag samoro yubu lelamekti, “Anna, ‘Samariange wamlamne phia andi kulomag wa'ikeoba, yubu lelamlam,’ alamap. Sikne agha lelamap te?” seek.

49 Wene seekpa, Yesusti samoro, “Na phia kulomag wa'iamnelba lelamna kom aghana, na Nani kiplamnaba, a'undi na san tiliplamnelom. 50 Nadamne sembe, ‘Paliag nembaneheng,’ aro kiptoba elamnari, ulamna kom. Na paliag tanepne ero ulamlange nhon wamlari, tam karebalul. 51 Nari yubu sikne agha ambatnuahin. Nimi etneri nari yubu ambarelamsinne saelba ulamle tanena, nimi eneko ya'ag uro wamleri, tepnange iplul kom,” aro ambatsiog.

52 Wene aro ambatsiogpa, Yahudi nimi tanekori elag yubu lelamekti, “Wene selamba, nuri an sembe, ‘Phia anag wa'iangkelba lelamlam,’ senelamobonge nene sik uro el taap. Abraham el mo tebaogpa, Allahri yubu silimu tiptop nang babe tebaek. Aghana andi lelamlamdi, ‘Nimi etneri nari yubu ambarelamsinne saelba ulamle tanena, nimi eneko ya'ag uro wamleba, tepna elag lag talul kom,’ selam. 53 Nunisag Abraham poneko tebaogpa, Allahri yubu silimu tiptop nang babe tebaek aghana, andamne sembe, ‘Nanagha sin phelekahindi, nubunge agha wamna,’ senelamlamdi, leplam te? Andamne, ‘Etneri lelamna,’ aro leplam?” seek.

54 Wene seekpa, Yesusti samoro, “Nadamneri paliag nenep tangto kibil dalamsene tanena, kiptangtopne nenekori na sik uro paliag nembanoho kom. Aghana na Naniri kipto paliag nenelamnelne ponekona, a'undam nimiri, ‘Allah omeklamap,’ alamlomne ponekori na kipto paliag nenelamnel. 55 A'undi, ‘El omeklamap,’ alamlomne ponekoap pali wamlom kom, aghana na elne agha elap pali wamnam. A'un orolenange lerop saog uro wamsene tanena, nari lelamneptina, ‘Na elap pali uropne ekon,’ aro lemnep. Aghana nari orolenange lemnep komdina, ‘Na elne agha elap pali wamnamdi, nari eldi yubu salero ul palamna,’ alamna. 56 Na lag tanep sum eneko sembe a'unisag Abraham ponekori seneraglamogti, lolo'opto ulamog. Na lag tanepne tiboghaogti, awi sembaog,” aro ambatsiog.

57 Wene aro ambatsiogpa, Yahudi nimi tanekori Yesusag yubu lelamekti, “An mangkagheek sum agha hengkun teng phende anam uro yabirop kom aghana, andi Abraham iplumne sembe leplam te?” aro haibaek.

58 Wene seekpa, Yesusti nen samoro ambarelamsiogti, “Nari yubu sikne agha a'unag ambatnuahin. Abraham anam mangaro yabin komag, na samenag ya'ag wamnange,” aro ambatsiog.

59 Wene seogpa, ka'ebaekti Yahudi nimi tanekori kirik tobekti, “Obukap,” aro ulamek. Aghana Yesus tognop tangka lebogti, Allahri Mem Ae aramag aneko la'imbom agha piog.