Phia sikini nubungeri Yesus mipto yubu nebogha
4
Yesus mag Yordan inaag anekoa laploa palamog abeneko Allah Eldamne Yame Walingeri seneragna Yesusti wanaag to'opto taogti,
Yesus poa lebogti,
pai aldesag poa piog.
2 Poa piogpa,
pai aldesag wamogpa,
anekoa phia sikini nubungeri ik teng nhon epto naualbareap mipna miplamog.
Ik teng nhon epto naulbare miplamog abeneko pere,
Yesus sa'a-sa'a ten koma wamogti,
komoptop sum eneko kwaneng yo uaog.
3 Kwaneng yo uaogpa,
phia sikini nubunge nenekori elag yubu lelamogti,
“Anna sik uro Allah Elme wamlam tanena kirik aneag,
‘Kwaneng roti tae,’
semendi tululam,”
seog.
4 Wene seogpa,
Yesusti samoro ambarelamogti,
“Allahri Yubu mome toro pairop momeag wamlangena,
‘Nimi wamnep nena kwaneng roti tendi mo kamag wamnep kom,’
aro mome toro pibog,”
seog.a
5 Wene aro ambarogpa,
phia sikini nenekori Yesus poa lebogti,
alikinag poa waelbaog.
Poa waelbaogti,
hengom sel agha ulamoghag agha phia anekori mog so'oag nimi ni saelba uhirop nimiap,
sin umag wamek nimi taneko,
“Tiplengkalulam,”
aro lag nembarog.
6-7 Lag nembarogti,
phia sikini nenekori Yesusag yubu lelamogti,
“Nia mangkina tiplengkalamne na saeag taogpa,
saelba ulamsin.
Nari nimi etneag,
‘Tatnun,’
sembane tanena,
hae nari tatnep.
Ane sembe nia andi haingdi tiplengkalamne,
as mog so'o saelba uhiroba tanu ubu paiamlangeap,
mog so'oag tup taneba wamlangeap,
hae an ngai tanep.
Ot andi agha nanag omekto u amupto pulingkina kipnemen tanena,
ni aneko nari an saeag nembanun,”
aro Yesusag ambarog.
8 Wene seogpa,
Yesusti samoro phia anekoag,
“Allahri yubu mome toro pairopne wamlange,
‘A'un Saelba Uhiropne Allah aghabog omekto u amupto kiplapmundi,
eldi awe mo toro omeklamlulom,’
aro mome toro pibog,”
seog.b
9 Wene seogpa,
phia sikini nubunge nenekori Yesus enero poa lebogti,
as soro kalurop as Yerusalem Allahri Mem Ae imag tubag pailingkina lebogti,
Yesusag yubu lelamogti,
“Anna sik uro Allah Elme wamlam tanena,
anea lopna agha yingkilulam.
10 Allahri Yubu mome toro pairop momeag wamlangena,
‘Allahri an wali wapmenne sembe eldi arukna imagnang malaikatag,
“Wali uro yae paiamlulom,”
aro arukahileri pogsilul,’
aro mome tobog.
11 ‘Sindi sae sang yangaro epkeikpa,
kirikti andi yan kuksubaghelul kom,’
aro mome toro pairopne wamla.c
Ane sembe anea lopna agha yingkilulam,”
aro phia sikini nenekori Yesusag ambarog.
12 Wene seogpa,
Yesusti samoro yubu lelamogti,
“Allahri yubu lelamog nena,
‘A'un Saelba Uhiropne Allahag mipna mipseng kom,’
seog,”
aro samoro ambarog.d
13 Wene aro phia sikini nubunge nenekori Yesus mipna pabogti,
“Pa'asea sum agha nen mipnun,”
aro Yesus laploa piog.
Yesus samoro Galilea so'oag yingkina alniro yubu ambarelamsiogha
14 Phia sikini nubunge nenekori Yesus laploa piogpa,
Allah Yame Walingeri mikipne Yesusag wamogpa,
el nen samoro Galilea so'oag yingkina wamog.
Wamogti ulamogpa nimiri el sembe yubu lelameka nubu tangto sabo taog.
15 Yahudi nimiri Allah yubu lero winirop aeag wa'alamogti,
nimi maikno amolamsiogpa,
ka'elamek nimi niri,
“Wali yubu amolamsil,”
aro maiplamek.
Nazaret nimiri, “Yesus sembe nu karong,” aro yag lambaeka
16 Yesus Galilea so'oag wamogha ik nhon sum el nubu taoghag as Nazaret piog.
Piogti wamogpa,
Sabat sum taog.
Yesusti sop-sop ulamog saog uro,
as Nazaret wamog sumene babe Sabat sum taogpa,
Allah yubu lero winirop aeag aneko wa'iog.
Wa'iogti,
“Allah Yubu nhon mome kemero lemnun,”
aro nimi whingag sekel ingkiog.
17 Sekogpa mome yae ua urop nimi tanekori Allah yubu silimu tiptopne Yesayari mome toro pairop mome wa'amogtoba aneko Yesus saeag nembaog.
Yesus saeag nembaogpa,
mome wa'amogtoba sangkaogti ero ibog nena,
Yesayari mome toro pibogne kembi agha lelamogti,
18 “Imap so'oap Saelba Uhiropne ponekori Yame Walinge nanag mikipne paiamnel.
Eldi na wepneori,
‘Sin olog nimi saeagha orog nimiag yubu walinge ambarelamsululam,’
aro toro sekitneori,
Eldi Yame Walinge mikipne nanag paiamnel.
Eldi na poglamneori,
‘Nimi sae kaupto keleng teptobag tobongohirop nimi sembe,
“Sae lopto lambalulom,”
aro ambarelamsimendi,
nimi haing uropne sembe babe,
“Haing kwelekae,”
aro ambarelamsululam.
Nimi seklem tarapsirop nimi haing sae lopto,
“Lambahut,”
sululam.
19 Nimi ambarelamsimendi,
“Hengkun neneag imap so'oap Saelba Uhiropne ponekori wana waliri nimiag walia uahilul,”
sululam,’
aro na pogneo,”
aro mome toro pairopne lebog.e
20 Mome toro pairopne neneko lebogti,
nen wa'amogto yae ua urop nimi tanekoag tatsiogti pukog.
Tare agha pukogpa,
Allah yubu lero winirop aeag wamek nimi tanekori elag aghabog tilamlobek.
21 Tilamlobekpa nimi taneko ambarelamsiogti,
“Sumene mome toro pairop yubu lilim ka'ebalomne neneag agha toro sunup tal,”
seog.
22 “Sunup tal,”
seogpa nimiri ka'ebaek nimi niri,
“Yubu kiki lelamlange wana wali sirik uro ambarelamsil,”
aro lo'om seekti,
wali aro lelamekti,
“Elna Yusup elme kom te?”
aro wene alamek.
23 Wene alamekpa,
eldi sinag yubu lelamogti,
“A'undi nanag sunumna sunurop yubu ene nanag leplulom.
‘An nimi whesinne wamlam tanena,
andamne wali nenep talulam.
Andi as Kapernaum wamoma,
“Mane agha ual,”
senenne ulamomne nuri ka'elamap.
As Kapernaum ulamoma saog uro anenge asag anea babe ualulam,’
aro leplulom,”
seog.
24 Nen tipto lelamogti,
“Nari a'unag yubu sikne agha ambarelamsin nena,
Allah yubu silimu tiptopne elenge asag nimiri el toro kiplamang kom.
25 Nari a'unag lemnuanne nene sikne agha lemnuan.
Samen Allah yubu silimu tiptopne Elia poneko mog so'o Israel wamoghag kelabo kaldam kelabo maikno wamek.
Wamekpa mag imag agha kulukul ananne im lebogpa,
hengkun wilindiap wal no'opbareap mag kulukulan koma wamog.
Israel mog so'o niag kwaneng yo waelbaog.
26 Israel kaldam kelabo maikno wamek aghana,
Allahri Elia poghogne kaldam kel nhon,
as Sarfat Sidon so'oag wamog kel enekoag poghog.
Allahri Elia poneko Israel kaldam kelaboag poghog kom.f
27 Amik sum babe,
Elisa Allah yubu silimu tiptopne wamog ko'o enekoag Israel nimi agha kon tena polorop nimi maikno wamek aghana,
Elisa ponekori ot Yahudi nimi sisa komne Naaman Siriange poneko agha kut nembaog.
Israel nimi nhon babe wali nembahiog kom,”
aro Yesusti ambatsiog.g
28 Wene seogpa,
Yahudi nimiri Allah yubu lero winirop aeag wamek nimi tanekori ka'ebaek abeneko pere,
sin ni yo sembaek.
29 Yo sembaekti,
sekom agha lebekti,
Yesus as Nazaret anekoa wa'epto poa lambaek.
As Nazaret aneko as kongtenag sorop as wamogpa,
as Nazaret nimi tanekori,
“El yimag anekoa kwerenag wa'epto pelengkaukap,”
aro sindi kweren alibag aneko payingkiek.
30 Sin as Nazaret nimiri Yesus wa'epto kweren abolag payingkiek aghana,
el sin nusam toman la'imbom agha piog.
Yesusti phia yonge nimi kulomag agha yag lambaogha
31 As Nazaret anekoa lambom agha Yesus Galilea so'oag wamog as nhon Kapernaum piog.
Piogti sin Yahudi nimiri Allah yubu lerop sum Sabat sum taogpa,
sum eneko Yesusti nimi amoro ambarelamsiog.
32 Ambarelamsiogpa ka'elamekti,
“Yaghe!
Eldamne el uropti,
mikipneag agha amoro ambarelamsil,”
aro lo'om seek.
33 Allah yubu lero winirop aeag aneko nimi nhon phia yonge el kulomag wamogne nhondi yubu mikip uro haum alamogti,
34 “Yesus Nazaretne-o!
An nunag huahilulam?
Nu sembe,
‘Kom nembahinun,’
aro yalam te?
Anna etne na el wamna.
Anna Allah Eldamneri wepto pogkeogne wamlam!”
seog.
35 Wene seogpa,
Yesusti phia yonge anekoag,
“Yubu kom tae!
Nimi eneag agha lambae!”
aro arukaog.
“Lambae!”
aro arukaogpa,
phia yonge nenekori nimi eneko toro sin nimi taneko whingag so'oag pololobogti lambaog.
So'oag pololobogti,
lambaog aghana,
nimi eneko meneng omna koma ot wali wamog.
36 Wali wamogpa,
nimi taneko lo'om seekti,
sin mamun yubu lelamekti,
“Nimi poneri welaro saog yubu agha ambarelamsil?
Eldamne imangapti mikipneag agha phia yonge nimi kulomag wamlange,
‘Lambae,’
aro aruklamsilba,
eldi yubu ka'ero lanalamang,”
alamek.
37 Yesus sembe lelamek yubu eneko sabo tangto yabiogpa,
Kapernaum mog so'o kanero tala-tala wamek nimiri ka'ebaek.
Yesusti nimi maikno wali nembahiogha
38 Yesus Allah yubu lero winirop aeag aneko laplobi agha,
Simondi aeag piog.
Piogpa Simon elyamalkel bobo nubu sirik uro naikna naiklamog.
Ane sembe Yesusag,
“Yeplulam,”
aro molbaek.
39 Wene seekpa,
Yesus kel eneko peramag sekel piogti,
“Bobona kom tae,”
seogpa bobo naikna aneko orog taog.
Orog taogpa,
Simon elyamalkel eneko wali taogti,
puka yingkina kel enekori sin tena yepto yobarelamsiog.
40 Heng puruklamogpa,
nimi naikna nhon saog,
nhon saogne naiklamek nimi ni elag poa yalamsiek.
Poa yalamsiekpa,
Yesusti naiktop nimi payalamsiek nimi niag a'ero-a'ero sae palilamsiogti,
wali nenelamsiog.
41 Nimi maikno wali nenelamsiog nimi agha,
phia yonge nimi kulomag agha haum aro lanalamekti,
“Anna Allah Elme,”
aro Yesusag haum alamek.
Phia yonge nimi kulomag wamekne tanekori,
“Yesus Allahri wepto poghogne Kristus wamla,”
aro el wamekti,
yubu lelamek.
Phia yonge tanekori lag phoro lelamekne sembe Yesusti karong ane sembe,
yubu mikip uro phia tanekoag,
“A'un yubu leplulom kom,”
aro iriklamsiog.
Yesusti Allah yubu lerop ae ubu paiamog aeag agha ambatto poa tongolamsiogha
42 Kwelekaogpa heng tingi-tingi yabiogpa,
Yesus as anekoag agha nimi oroghag piog.
Nimi oroghag piog aghana,
nimi maiknori elamekti,
ibekti elag yalamek.
Elag yaekti,
“Nu laploa pihiseng kom,”
aro ulamek.
43 “Nu laploa pihiseng kom,”
aro ulamek aghana,
eldi sinag yubu ambarelamsiogti,
“Na pogneonge ponekori,
‘Nimi niag na Allahri yubu walinge ambatsululam,’
aro pogneo.
Ane sembe,
nari yubu walinge Allahri nimi mog so'oag nimi saelba uhiropne sembe ora asag wamang nimiag babe ambarel pihinepneog wamla,”
aro ambatsiog.
44 Ane sembe nimiri Allah yubu lero winirop ae Yudea so'oag ubu paiamog ae tanekoag yubu walinge ambatto poa tongolamsiog.