Yesusti eldi yubu ka'ero neleptop nang samenagne yopsiogha
5
Ik nhon sum Yesus mag longorop mag Genesaret abolag sekamogpa,
nimi maikno,
“Allah yubu ka'ebaukap,”
aro kanero sendebel alamek.
2 Sendebel alamekpa,
Yesusti tilamoghag agha kabong mag alip toman piroba phende mag abolag aneko paiamek.
Kabong ngai nimi ikan orop nimi tanekona,
sindi ikan lip tangtop ag taneko mag a'elelamek.
3 A'elelamekpa elna kabong nhon nenekoag waelba pulingkiog.
Waelba pulingkiog kabong anekona,
Simondi kabongag pulingkiogti,
“Olog ko'oro mag sinag sip tao nembalulam,”
seogpa ko'oro mag sinag sip nembaog.
Mag sinag sip nembaogpa,
kabongag aneko Yesus pukamogti,
nimi maikno mag abolag wamek nimi ambatsiog.
4 Nimi taneko yubu komopto ambatsiogti,
Simonag yubu lelamogti,
“Kabong ane ko'oro mag sin nusamag tao nembamendi,
ikan lip tangtop ag sangaro toboghalulom,”
aro wene seog.
5 Wene seogpa Simondi,
“Nai,
inipnag saelbaboa pelengelamapba,
ot nhon babe liptang kom aghana,
andi yubu leplamne sembe sangaro toboghol pinun,”
seog.
6 Wene seogti maghag sangaro toboghaekpa,
ikan maikno aghag lip taekpa,
tiltilipto yabiog.
7 Tiltilipto yabiogpa,
sikinkabo kabong nhon nenekoag wamek nang,
“Yebel ahilulom,”
aro sae kwa'aro yopsiek.
Sikinkabo yaekpa,
sindi ikan taneko kabong phende abenekoag lilamekpa,
ikan taneko ikinapti kabong abeneko maghag werel wa'inep saog wamog.
8-10 Ikan maikno lip taogne neneko Simon Petrusti kembaogti,
Simonap elkabo ni yebel aek nimiapti ikan maikno aghag lip taogha sembe yaghe sembaek.
Simon elkaboap awe nikne tolamek nang Zebedeus elmabo Yakobusap Yohanesapti babe yaghe sembarek.
Simon ponekona Yesus yanag yabu sanukto pulingkina,
“Nu Saelba Ulamsilamne!
Na malia uropne wamna ane sembe,
anap nanap nhon wamnep kom saogtina,
laploa pinululam,”
seog.
Wene seogpa,
Yesusti Simonag yubu lelamogti,
“Log sembaheng kom.
Wene anea yepkeneba,
andi nimi ero nanag payahilulam,”
aro ambarog.
11 Wene aro ambarogpa,
kabong taneko kiliro mag abolag pail piekti,
sindi nia taneko laplobi agha Yesusag neleplamek.
Yesusti nimi kon tena pololamogne wali nembaogha
12 Yesus ik nhon sum as anekoag agha as nhonag piogti wamog.
Wamogpa nimi kabuni nhon eldi konag naikna poloro telamogpa,
eldi kon niag pololamogti,
elel sirik wamogne nhon wamog.
Kon poloro telamog nimi enekori Yesus ibogti,
Yesus whingag yabu sanukto u amupto malingkina,
“Nai,
andi na,
‘Wali nembanun,’
sembamen tanena,
an mikipneri na wali nembanululam,”
aro molbaog.
13 Wene aro molbaogpa,
Yesusti sae nginikto nimi enekoag palilamogti,
“Wali semban.
An wali nembaghenun.
Kut taghele!”
seog.
Wene seog abeneko pere nimi enekori kon naikna pololamogne neneko kom taog.
14 Kom taogpa,
Yesusti nimi enekoag iriklamogti,
“Nari an wali nembaghenne sembe ora nimiag ambatsiseng kom!
Aghana memne Allah sembe paliropne ponekoag peket pimendi,
waliaba Allah sembe pimnepne elag pabululam.
Waliaba pabululam nena,
Musari samenag,
‘Kon naikna urop nimi wali tale tanena,
Allah sembe pimnepne payalul,’
aro mome toro pibog yubu sunsunum uro pabululam.
Pabimendi andamne elag lag nenep talulam.
Eldi an kembaghelenge pere agha,
‘Sik uro yabil,’
senenne kekneba nenekori sin nimi taneko el nembahilul,”
seog.
15 Wene seog aghana,
Yesus sembe yubu eneko sabo tangto nubu taog.
Nubu taogpa,
nimi maikno yalamekti,
“Eldi yubu ka'elamebeba,
naikna naiklamapne nu wali nembahilul,”
aro Yesus yaghag yalamek.
16 Aneko yubu ambatto wali nenelamsiogha lamba nimi oroghag piogti,
sop-sop Allah omekto molona mololamog.
Yesusti lebe arop kom nimi wali nembaogha
17 Ik nhon sum Yesusti yubu ambarelamsiogpa,
Yahudi nimi agha Farisi nimi etpareap,
Allahri Musaag aruksirop yubu amohirop nangap babe wamek.
Sin taneko mog so'o Yudea agha,
Galilea so'oag agha as tala-tala ni kanero wamekne agha,
as soro kalurop as Yerusalem agha babe yaekti,
“Ka'ebaukap,”
aro pukamek.
Pukamekpa imap so'oap Saelba Uhiropne ponekori mikipne Yesusag pibog andarina,
eldi nimi naiktopne wali nenelamsiog.
18 Sum eneko sum nimi etpareri lebe arop kom nimi nhon morea kalag maamogpa,
elag keyapto payaek.
Payalamekti,
“Ae lomag poa wa'iberi,
Yesus whingag pail pukap,”
aro ulamek.
19 “Pail pukap,”
aro ulamek aghana,
nimi maiknori sendebel alamekpa,
poa wa'inep kom.
Poa wa'ana eraruk uaogpa,
imag alibag waelbaek.
Imag soroba aneko kwerekaekti,
imag phoro morea kal anekoap nimi maikno nusamag agha Yesus whingag lebe arop kom nimi eneko pelengkibek.
20 Pelengkaekpa Yesusti kemelamsiogpa,
sin payaek nimi tanekori Yesusag sikne aro wana palilameka ipsiog.
Kembahiogti Yesusti elag yubu lelamogti,
“Nangkae,
andi mali-malia ulamomne tam wailag tal,”
seog.
Nimi tombare tanekori ae imaghag waelbaekti, “Yesus whingag pelengkabeba, wali nembalul,” senenneag agha ae imag kwerekaek. (Lukas 5:19)
21 Wene seog aghana,
sin Musari yubu amohirop nangap,
Farisi nimi tanekoapti sin wanaag hairo seneraglamek nena,
“Nimi eneko,
‘Etne wamna,’
senelamlari,
‘Mali-malia uropne tam wailag tal,’
aro yubu leplange toman agha Allah san tiliplamla.
Ot Allah Eldamneri nimiri mali-malia uropne tam wailag nembanep,”
aro wanaag seneraglamek.
22 Wene aro seneragto wanaag hail dalamekne Yesus el taogti,
“A'undi wanaag na sembe,
‘Eldi undo lemnep kom,’
senelamlomne nene sa'a sembe seneraglamlom?
23 Mog so'oag nimiri nimiag,
‘Andi malia ulamomne tam wailag tal,’
seheng tanena,
malia uropne neneko sik uro wailag tanep te?
Mog so'oag nimiri nimi enekoag,
‘Sekmendi,
yan ingiro pululam,’
aro yubu ambatseng tanena,
sik uro yabinep te?
Ni yubu phende abeneko mog so'oag nimiri mo yubu lemnep tanena,
nhon babe uro yabinep te?
24 Aghana a'undi na sembe el tahom senelamnari,
lag nembatsinun.
Na mog so'oag nimi tahinge saeag Allahri mikipne pibog andarina,
nimiri malia uropne sembe nari tam wailag nembanep.
Kembamundi el talulom,”
seogti lebe arop kom nimi enekoag yubu lelamogti,
“Anag lemnuan.
Sekmendi andi morea kal saelbamendi,
andi aeag pululam,”
seog.
25 Wene seog abeneko pere nimi ni tanekori kemelamekpa,
lebe arop kom nimi eneko pukom agha sekogti,
elenge morea kal aneko,
“Pabinun,”
aro tobogpa kemelamek.
Wali taog nimi enekori Allah omek-omek palamogti,
morea kal aneko eldi aeag pabiog.
26 Wali nembaogpa,
Allah omek-omek palamogpa,
nimi ni taneko log maikno uahiog.
Sin nimi tanekori yubu lelamekti,
“Yaghe,
mane agha ualne sumene mo ibap,”
aro lo'om seekti,
Allah omeklamek.
Yesusti Lewi yobogha
27 Neneko uro yabiogpa,
Yesus anekoa lambaogti tilamogpa,
nimi nhon sina Lewi tiboghaog.
Lewi poneko Roma nimi sembe kamna poloro toropne wamogti,
eldi kamna poloro tolamog aeag pukamog.
Pukamogpa tiboghaogti Yesusti,
“Nanag neleplamnululam,”
seogpa,
28 Lewi poneko sekom agha ni taneko liloa lebogti,
Yesusag neleplamog.
29 Lewi ponekori,
“Yesusap kwaneng nhon tukap,”
aro eldi aeag sani yobaog.
Yobaogpa kwaneng tel alamek nimina,
Lewi elkabo Roma nimi sembe kamna poloro torop nang maikno babe wamek.
Yog nimi babe Lewiri aeag yaekti,
Yesus yubu ka'ero neleptop nangap kwaneng nhon telamek.
30 Kwaneng nhon nikag telamekpa,
Farisi nimi etpareap,
sindi seneragna nhon seneraglamek nimi Musari yubu amohirop nimi wamek nangapti kembahiekti,
mali sembaek.
Mali senelamekti,
Yesus yubu ka'ero neleptop nangag yaekti,
yubu lelamekti,
“Sa'a sembe a'un nhin Roma nimi sembe kamna poloro torop nimiap,
nimi malia urop nimi taneap kwaneng nikag telamlom?”
aro haibahiek.
31 Wene aro haibahiekpa,
Yesusti samoro ambarelamsiogti,
“Nong wali nimiri whesirop nimi sembe,
‘Teko,’
senelamang kom.
Ot naiktop nimiri aghabog whesirop nimi sembe,
‘Teko,’
senelamang.
32 Ane saog uro na so'oag,
‘Yepsinun,’
aro yahingena,
nimi nhon eldamne sembe,
‘Na malia urop nimi,’
aro el tanep nimi eneko,
‘Yopto yepsinun,’
aro yahi.
Nana sin undop nimi sembe,
‘Yopto yepsine andarina,
sindi malia seneragto uropne lilobi agha Allahri senenne sunsunum uro seneraglamukang,’
aro yahi.
Ora nimiri eldamne sembe,
‘Na malia uan koma ulamna,’
seneptaho tanena,
nimi eneko yopto yepsinun kom,”
seog.
Nimiri kwaneng ten koma, “Allahag moloro omeklamnun,” aro uropne sembe Yesusti tibin nembaogha
33 Farisi nimi tanekori Yesusag lelamekti,
“Yohanesti yubu ka'ero neleptop nimiap,
Farisi nimiap tanekori,
‘Allahag molona mololamukap,’
aro kwaneng ten koma omekto ulamang aghana,
andi yubu ka'ero neleptop nimi tanekori kwaneng mag telamang,”
aro hairo ambarek.
34 Wene seekpa,
Yesusti samoro ambarelamsiogti,
“Na so'oag wamnaag abenena,
nanag neleptop nang kwaneng tero kom-kom wamseng kom.
Sunumna ambatsinun.
Nimi nhondi kel torop tanena,
elkaboap ma'ap tahengdi,
sin kwaneng tero koma wamnep te?
Ane saog uro nanap,
na neleptop nangap nimi pali wamapti,
nu nikag wamap abene kwaneng ten koma wamnep kom.
35 Aghana ik nhon sum kel toropne poneko yog nimiri salero pabaik taneogna,
elkabo kwaneng ten koma wamukang.
Ane saog uro na amik sum wamne kom taneogna,
nanag neleptop nang kwaneng ten koma wamukang,”
seog.
36 Wene aro ambatsiogti,
sunumna nhon nen yubu likipto ambarelamsiogti,
“Ag samenag wirop ag wamsoba,
ag eneko tilipto yabin tanena,
ag wiroba wendogne taebom agha nimiri ag samenneag wetnebanep kom.
Ag wendogne taebom agha optenapto wetneban tanena,
wendog ag aneko babe taepto loba wamlul.
Abeneko apna,
ag wendogne taebom agha samenneag optenapto wetneban tanena,
ni phende abeneko nikag sunsunum tanep kom.
37 Nen sunumna nhon ambatsinun.
Nimi nhondi anggur wana lolterop mag tomnari,
mag tero lina pham kambing kon agha wetnerop aghag tero lirop.
Anggur wana lolterop mag wendog nena,
pham kambing kon agha wetnerop ag samenneag tero libanep kom.
Ag samenneag tero libanep kom nena,
anggur mag neneag agha iba lanalamnari,
kon agha wetnerop ag eneko pikto nubu tanep.
Nubu talamnari,
kon agha wetnerop ag samenne pikto punguro phobanep.
Phobaho tanena,
kon agha wetnerop ag babe,
anggur lolterop mag babe loba tanep.
38 Undo unuanep kom aghana,
nimiri anggur wana lolterop mag wendogne kon wendog kon agha wetnerop aghag tero libanepneog wamla.
39 Ane saog uro nimiri babe mag anggur samenag mag aneko telamleri,
‘Samenag anggur lolterop mag agha sao wali.
Wendog lolterop mag neneko karong,’
selul.
Samenag lolterop mag terop nimiri wendog lolterop mag telul kom,”
aro Yesusti Farisi nimiag ambatsiog.a