Yesusti phia maikno nimi nhon kulomag agha yag lambahiogha
5
Kabongag agha mag alip toman palamekti,
Yesusap elag neleptop nangap mag Galilea longorop mag kauro mog so'o Gerasa piek.
2 Gerasa so'o anekoag kabuni nhon phia yonge el kulomag samenag wa'iogpa,
nimi teptoba kirik hogtobaag pail pirobag ua ulamog nimi nhon wamog.
Wamogpa Yesus kabong lomag agha kuluka yangkalamogpa,
phia yonge kulomag wamogne poneko nimi teptoba kirik hogtobaag pail piroba aneko laplobi agha Yesusag yaog.
3-4 El nimi teptoba kirik hogtobaag pail pirobag ua ulamogne ponekona,
samenag yog nimiri,
“El yae wamukap,”
aro ik sulu salero sae mamunap,
yan mamunap haing kauplamek aghana,
sop-sop pulpulukto eplamsiog.
Yan sae haing kauplamek nena,
nimiri haing pulukanep kom haing besiag agha sunurop haing babe kogto puluklolamsiog.
El kulomag phia yonge ua ulamogneri mikipti,
nimi nhondi babe saelbanep kom ulamog.
5 Inipnag kweleknag nimi teptoba kirik hogtobaag pail pirobag yim anekoag ua ulamogti,
haum aro kirik agha nongag karebel dalamog.
6 Phia yonge kulomag wamog nimi enekori Yesus yalamogha weag agha tiboghaogti,
nimi teptoba kirik hogtobaag pail piroba aneko laplobi agha merero Yesus wamoghag yingkiog.
Yingkiogti Yesus whingag yabu sanukto u amupto pulingkiog.
7-8 Yan sanukto u amupto pulingkiogpa,
Yesusti phia kulomag wamog nimi anekoag lelamogti,
“Phia yonge nimi ane kulomag wamlamne,
lambae!”
seog.
Seogpa phia yonge yubu mikip uro haum alamogti,
“Yesus-o,
Allah Paliag Sirikne Elme wamlamne!
Andi nanag,
‘Huanun,’
aro yalam?
Na,
‘Seklebale,’
aro na omneheng kom.
Allah siag agha,
‘Opkenun kom,’
aro nanag salag lero ambatnohom!”
seog.
9 Seogpa Yesusti phia yonge anekoag hailamogti,
“An si etne?”
seog.
Seogpa samoro lelamogti,
“Nu phia maikno teknero nimi ane kulomag wamap.
Ane sembe,
na si Legion,”
aro ambarog.a
10 Ambarogti Yesusag sarikto mololamogti,
“Andi mog so'o aneag agha nu yag lambahiseng kom,”
aro mololamog.
11 Sin wameka peramag pham maikno main alunag longolaekti,
so'o ero tolamek.
12 Phia yonge tanekori Yesusag mololamekti,
“Nu pham kulomag wa'al phukap.
Andi nunag,
‘Pham taneag wa'isut,’
aro nu arukahilulam te,”
aro molbaek.
13 Wene aro molbaekpa Yesusti,
“Hae,
pululom,”
seog.
Seogpa phia yonge taneko ponekoag agha lambaekti,
pham taneko kulomag wa'iek.
Wa'iekpa pham taneko merelamekti,
kwerenag eba timbom agha mag longorop maghag tag purukom seekti tebaek.
Purukom seek pham taneko teng-tengne (2.000) tag purukom seekti tebaek.
14 Pham ni tebaekpa,
pham yae paia ulamsiek nang taneko logti,
laplobi agha merebaek.
As peramag wamek nimiag merebaekti,
uro yabiogne sembe ambarel pihiek.
Ambarel pihiekpa,
nimi taneko sindi asag lambaekti,
“Sa'a uro yabil,”
aro kemelaek.
15 Yesusag yaekti kemelamekpa,
el samen phia yonge maikno kulomag wamog nimi wali taogne poneko ane pukamog.
Wali taogti,
ag nongag wangkamogti,
wana peket uro pukamog.
Pukamogpa ibekti,
“Welaro uro yabil?”
aro log tahiog.
16 Log tahiogpa,
ni uro yabiogne ibek nimi tanekori sin kemelaek nimiag el nenelamsiek.
El nenero ambarelamsiekti,
“El phia yonge kulomag wamo nimi agha Yesusti phia yag lambahilba,
phia phamag wa'iangpa,
mag sinag tag purukom seangdi tebang,”
aro el nenero ambatsiek.
17 Wene aro ambatsiekpa,
ka'ebaekti mog so'o aneko wamek nimiri Yesusag,
“Nuri mog so'o eneag an wamnep kom.
Pululam te?”
aro molbaek.
18 Wene aro molbaekpa Yesus,
“Mag alip toman pinun,”
aro kabong lomag wa'alamog abeneko pere,
phia yonge kulomag wa'iogha wali taogne ponekori Yesusag mololamogti,
“Nari anag nelepto wali nhon pukap te?”
seog.
19 Wene seog aghana Yesusti,
“Nanap nhon pukap kom aghana,
andi aeag pululam.
Imap so'oap Saelba Uhiropne ponekori anag yareag sembangkeldi,
maiknoro yepkelne sembe angkaboag ambarel phululam,”
seog.
20 Seogpa piogti,
nimi ponekori,
“Yesusti na maiknoro yepneori,
wali nembaneo,”
aro ambarel pihiog.
Eldinge as aghabog ambarel pihiog kom aghana,
mog so'o si As Sa'obare nimiag babe ambarel pihiog.
Ambarelamsiogha ka'ebaekti,
As Sa'obare mog so'o taneko nimi niri,
“Yaghe,”
aro lo'om seek.
Eneng palamog kelap Yairus elmangkel teptopneap Yesusti wali nembahiogha
21 Yesus mog so'o Gerasa wamogha,
nen kabong lomag wa'iogti,
mag Galilea longorop mag kauro tara sip piog.
Piogti kabong lomag agha kuluka yangkaogpa,
nimi maikno mag longorop mag abolag wamek nimi Yesus peramag warekto longolamek.
22 Yesus mag abolag wamogpa,
nengabo nhon si Yairus yaog.
Yaogne poneko elna,
nimi taneko sembe Allah yubu lero winirop ae saleropne poneko Yesus wamoghag yaog.
Yesus ibogti,
Yesus yan tamag yabu sanukto u amupto malingkina kibog.
23 Malingkina kibogti,
Yesusag wanaag agha mololamogti,
“Na namangkel tebanep saog wamla.
El tebaleagti,
an yamendi,
‘Nanenge kelme kamag wamlul,’
aro sae pipmenba,
wali talul,”
aro molbaog.
24 Wene aro molbaogpa,
Yesus babe kelme ili ponekoap nhon pirek.
Palamdekpa nimi maikno neleplamekti,
nimi lingnip tangto palamek.
25 Sin Yesus nelepto lingnip tangto palamek nimi anabiag agha,
kelabo nhon eneng palamogha hengkun aobare seklero wamog kel nhon sin nusamag wamog.
26 Eneng palamog kel enekona,
samenag agha whesirop nang maiknori,
“Yebukap,”
aro ulamekpa,
kamna kaptoba tarelamsiog.
Ni eldi saeagha tarelamsiogpa,
whesirop nangdi ulamekne pere agha maiknoro seklelamog aghana,
naikna aneko orog taog kom.
Wenena ot el saeagha orog taog aghana,
naikna luluro nubu taogpa wamog.
27-28 Seklero naiklamog aghana,
Yesusti nimi maikno wali nenelamsiogne sembe kel enekori ka'ebaogti senelamogti,
“Ot eldi ag wangaro siliplengkamla ag olog po'obahaneri,
wali tahane,”
sembaog.
Ane sembe,
Yesus nelepto palamek nimi anabiag agha kel eneko Yesus amik peram tang-tang yalamogti,
eldi wangaro siliplengkamog ag kel enekori po'obaog.
29 Aghag po'olamog abeneko pere eneng palamogne aneko pabog.
Kel enekori,
“Wene na nongag seklenne orog talba,
sik uro wali tan,”
sembaogti el taog.
30 Kel eneko wali taog abeneko pere,
Yesus el taogti,
“Mikipne nanag wamlange agha nimi nhon weneog wali tal,”
sembaog.
Sembaogti wailag sip taongkom agha hailamsiogti,
“Etneri nari aghag po'obal?”
aro haibahiog.
31 Yesusti haibahiogpa,
eldi yubu ka'ero neleptop nang nhondi samoro ambarelamogti,
“Nimi maikno lingnil talamanga iamsilam aghana andi,
‘Etneri nari aghag po'obal?’
aro haibahilam te,”
seog.
32 Wene seog aghana,
Yesusti nen,
“Nari aghag po'obal nimi eneko imnun,”
aro keme warekahiog.
33 Keme wareklamsiogpa,
kel enekori senelamogti,
“Yesusti mikipneag agha wali tan,”
aro el uro wamog.
El wamogti,
kel eneko logti pet-pet aro Yesus whingag yingkina u amupto malingkiogti,
ni elag sik uro yabiogne sembe lag phoro Yesusag ambarog.
34 Lag phoro ambarogpa Yesusti,
“Namangkel,
nanag wana palilamlamne neneri an wali nembaghel.
Anag naikna seklelamomne kom talba,
ya'ag wali talam.
Wana aingniro wapmendi pululam,”
seog.
35 Yesusti kel enekoag yubu lelamog abeneko,
Allah yubu lero winirop ae saelbamogne poneko Yairusti ae lom nimi etpare yaek.
Yaekti ambarelamekti,
“Nai,
anmangkel loba tal.
Ya'ag loba talbana,
yubu amohiropne poneri hualul kombana,
el ina karepto enero poa peheng kom,”
seek.
36 Seek aghana,
sindi yubu lebekne sembe Yesusti ka'eban koma saog uaog.
Ka'eban koma saog uaogti,
Yesusti Allah yubu lero winirop ae saelbamogne poneko Yairusag yubu lelamogti,
“An log sembaheng kom.
Ot nanag sikne aro wana palilamlulam,”
seog.
37 Wene seogti,
Yesus nen tipto palamog aghana,
elag nelepto palamek nimi ni tanekoag,
“Ane wamlulom,”
aro irikahiog.
Ot Petrusap,
Yakobusap,
Yakobus ilipsae Yohanesap,
sin nimi wilindi tanekoag,
“Nhon pukap,”
seogti Yesusap nhon Yairusti aeag piek.
38 Allah yubu lero winirop ae saelbamogne Yairusti aeag peram palamekpa,
Yesusti kemelamsiogpa,
nimi engenari pinim kolomna alamekpa,
yubu maiknoro lelamek.
39 Engenari pinim kolomna alamekpa,
Yairusti aeag aneko Yesus wa'iogti,
“Sa'a sembe engelamlomdi,
yubu maikno lelamlom?
Kelme anena ya'ag tebal kom.
Elna mana agha malamla,”
seog.
40 Yesusti wene seogne sembe nimi tanekori Yesusag og solamek.
Og solamekpa nimi tanekoag,
“A'un asag lambahut,”
aro asag yag lambahiog.
Yag lambahiogti,
ot kelme eneko iliap ilinap,
elag neleptop nang wilindi yaekne tanekoap aghabog,
kelme mali tangtobag aneko wa'iek.
41 Wa'iekti Yesusti kelme aneko sae saelbamogti,
Yahudi nimiri samenag yubu lerop yubuag lelamogti,
“Talita kum,”
seog.
Nun yubuag,
“Namangkel,
anag yubu lelamna.
Puke!”
seog.
42 “Puke!”
seog abeneko pere,
kelme eneko puka sekel ingkiogti yabalamog.
Kelme eneko mangkaekag agha hengkun aobare wamog aghana tebaogpa,
Yesusti kamag nembaog.
Sindi kelme eneko kamag uro wamogha haingdi ibekti,
“Yaghe mane agha ual,”
aro lo'om paibom alamek.
43 Lo'om paibom alamekpa,
Yesusti iriktop yubu mikip uro ambarelamsiogti,
“Yog nimi nhonag babe,
‘Nen kamag nembal,’
aro ambatsiseng kom,”
aro ambatsiog.
Wene aro ambatsiogti,
nen tipto yubu lelamogti,
“Kelme ane kwaneng tatmunba telul,”
seog.