Kolos Ma 3

1 Ne jo̰ aŋ ta̰ tan poseya ne Kris ɗe, ɓyare me kaŋ ge ne digi zi ya ma pe, swaga ge Kris ne ya, katɗa tok matoson ge Dok ne pal. 2 Dwa me kaŋ ge ne digi zi ya ma pal, be kaŋ ge ne suwar se ma pal to. 3 Ago aŋ su su, kat ne ndwara ge aŋ ne woy ya Kris zi, ge Dok zi. 4 Swaga ge Kris, na ge ndwara ge aŋ ne ne mbo dyan ja, go no aŋ sḛ ma me aŋ mbo dyan ya poseya ne na ge hormo ge na ne zi.

Hal ge sabar ma ne hal ge giya̰l

5 Ne da pe no ɗe, hṵ me kaŋ ge suwar ne ma uzi: Fi ne ta ma, seŋgre kerra ma, ene egleya ma, ne ene ge sone ma, ne aham, na ge a sḭḭm kerra ne. 6 No a kaŋ ge ne zwal pore ge Dok ne ya naa ge be za̰ wak to ma pal ne. 7 Zaŋgal aŋ ka hon ta ker kaŋ mbe ma no, swaga ge aŋ ne ka ke mborra nama zi go. 8 Amma ne se no ɗe, fage me kaŋ mbe ma no uzi pet: juliliya, ne pore kerra, ne kaŋ kerra ge sone, ne sáso salla, ne fare asar janna. 9 Kṵ me ta hale to bat, ne jo̰ aŋ fage duur ge sabar ne na kaŋ kerra ma ya uzi ne aŋ ta, 10 aŋ ka̰ duur ge giya̰l ge ne gwan giya̰l ɗogle ndwara det ya kwarra zi, ge kḭḭm ge Bage ne dó na go. 11 Ne no pe, Grek ko Yuda be gwan gá to, ba̰y vyanna ko ba̰y vyanna to, naa ge pe yak ma, ko naa ge baŋ yak ma, mo̰r ma ko vya twala ma be gwan gá to. Amma a Kris ne kaŋ ma zi pet ne kaŋ ma go pet.

12 Ne jo̰ aŋ naa ge talla ge Dok ne ma ne, naa ge mbegeya ma ne naa ge laar wanna ma ne ɗe, ka̰ me dulwak ge kwa a̰se, ne ge wí, ne ge suul, ne pala gwanna se lwalwagat, ne wan ta aŋ ta. 13 Ḭ me ta dṵṵl ma, kadɗa gaage a̰me ya aŋ buwal zi, pore me ta dimma ne Bageyal ne pore aŋ go. Ke me go no me aŋ buwal zi. 14 Kaŋ ma ndwara zḛ pet, ka me ne laar wanna, na ge ne san naa digi sanna ge fareba. 15 Halas ge Kris ne, na ge ne na ta, a ne tó aŋ ya ndwara go aŋ ka duur ge ɗu, na ka dulwak ge aŋ ne ma zi. Aŋ ka naa ge gwan ne gugu ma. 16 Fare ge Kris ne na ka aŋ zi mbyatɗa tap. Hate me ta, ne yuwale ta ge zwama ge daage zi pet. Ne dulwak ɗu, siya̰le me Dok ne laar saal ne Kaŋ mballa ma, ne logom ma, ne kaŋ mballa O̰yom zi ma. 17 Fare ge daage pet ge aŋ ne jan, ko kaŋ ge daage pet ge aŋ ne ke, ke me nama dḭl ge Bageyal Jeso ne zi, ne gwan ne gugu hon Báá Dok.

Katɗa Kris zi

18 Naa zaab ma, gwa̰ me aŋ pala aŋ obe ma pe se, dimma ne mbya kerra Bageyal zi go.

19 Naa sonmo ma, aŋ laar wa̰ aŋ gwale ma, mḛ me ndaar raraŋ ne nama to.

20 Naa jabso, gwa̰ me ne aŋ pala aŋ bá ma pe se kaŋ ma zi pet, no a kaŋ ge Bageyal laar ne ɓyare ne.

21 Bá ma, twa̰se me aŋ vya ma ɗiŋ aŋ e nama laar vḛneya to.

22 Mo̰r ma, gwa̰ me ne aŋ pala aŋ bageyal ge le duur go ma pe se kaŋ ma zi pet. Ke me nama temel nama ndwara go dimma ne aŋ ne ɓyare ke naa dasana ma sḛ tuli go ɗeŋgo to, amma ne dulwak ɗu vo ge Bageyal ne zi. 23 Kaŋ ge daage pet ge aŋ ne ke na, ke me na ne dulwak ɗu, dimma ne aŋ ne ke temel hon Bageyal go, a be hon ndu dasana to. 24 Kwa me go aŋ mbo ame joo ne Bageyal ta. Aŋ ke temel mo̰r ne go hon Bageyal Kris. 25 Ago bage ne ke temel dosol pal to mbo ɓol potɗa dosol to ge na ne, vareya mbo kat to bat.