MAKTUB GE BULUS NE NJAŊGE HON
FILIBUS MA
Fare pala hageya
Bulus waage fare ge Dok ne ge suwal Filibus go swaga mborra ge na ne ge ndwara azi mbo waage fare go (Tkm 16:12-40). A go no, dó ɓase ge Dok ne ma pe ge suwal Filibus go no. Del ma kwaɗa lwak go̰r go, swaga ge ne ka daŋgay zi (1:7) tamekyala ge suwal Sezare go, ko Roma go (ndi fare pala hageya ge Efesus ne), njaŋge nama maktub mbe no ndwara sirsi nama hon fareba zi, moɗege nama nama ka ɗeŋger Kris zi ne naa ge ne mbo ya ya̰me nama ne fare ge hale ma pe, gwan ne gugu hon nama ne nama ne teme na mbarra ya Epafrodit tok go pe no me.
Maktub ge Bulus ne njaŋge hon Filibus ma ŋgay nee go Bulus ma ne Filibus ma ka da ne tuli ta buwal zi, da ne pe no, Bulus njaŋge nama maktub no ndwara jan nama go nama ka ne laar saal waɗeya.
Ne 1:1-11, Bulus ŋgay nama laar saal ge na ne swaga ge na ne dwat ne nama go, waage nama katɗa ge na ne no me, ne ba̰a̰n ge na ne dagre ne Jeso Kris (1:12-26). Uwale moɗege nama go nama sirsi hon fareba ge nama ne zi, nama ka dagre ɗu ne pala gwanna ta pe se (1:27—2:18). Bulus da ne dwatɗa go ne teme nama na kaam ge temel ma nama ndwara zi ya ndwara mbo sirsi nama O̰yom zi, ne za̰ nama fare ma me (2:19-30).
Ne jo̰ za̰ go naa a̰me ma ya̰me nama ya go ne hateya ge sone ma ɗe, mḛre naa ge ne hon hateya ge sone mbe ma no, moɗege Filibus ma no nama bole na, nama ɗḭ nama ndwara Jeso pe go (3:1-21). Á na maktub da ne moɗegeya ma pe hini hini ne katɗa Dok zi pe, ne wak sanna ma me (4:1-23).
Naa a̰me ma tó maktub mbe go na «Maktub ge laar saal» ne, ne da pe, ne pe eya go ɗiŋ mbo aya, Bulus jan fare ge laar saal ne. A Laar saal ge katɗa Dok zi, ne jo̰ Jeso ya̰ kaŋ ma pet, ne hormo ge na ne mbo ya her duur ge naa dasana ma ne no, ɗiŋ mbo siya zi, siya ge seŋgre ge uwara kaŋgre pala digi no ne nee ge sone mbe ma no pe. A kaŋ laar saal ne ge nee kwa go Dok ho̰ na vya da ne nee pe.