Viya̰ ge ɗeŋger ge ne mbya ndu kat dosol Dok ndwara se
3
1 Fare ge ne ga, ná vya ma, ké me laar saal Bageyal zi. Ke mbi yál ge mbi gwan dwage aŋ kaŋ ge ɗu mbe ma njaŋgeya to, ne aŋ pe, a kwaɗa baŋ. 2 Ke me haŋgal ne gú ma, ke me haŋgal ne naa ge ne ke temel ge sone ma, ke me haŋgal ne naa ge vyan ba̰y ma. 3 Ago nee sḛ ma, nee naa ge vyan ba̰y ma ne, nee ge nee ne ke temel ne O̰yom ge Dok ne ma, nee uware ta Kris Jeso zi, amma nee kan saareya ge nee ne ma duur pal to. 4 Amma kadɗa ne mbi ɗe, mbi da ne pool kan saareya ge mbi ne duur pal, kadɗa naa a̰me ma dwat go bama da ne pool ge kan saareya ge bama ne duur pal ɗe, mbi ne kat ma waɗeya. 5 A vya̰ mbi ba̰y dam ge tiimal go, mbi da ne ne pehir ge Israyela ne zi, ne vuwal pe ge Bayami ne zi, mbi Ibriniya ne, mbi tó da ne Ibriniya ma zi, hateya ge Eya ne pal, mbi Farisi ne, 6 ne yil pe, mbi ke ɓase ge Dok ne ma yál, ge kerra dosol zi ge Eya ne pal, ndu ge wan mbi ne fare to. 7 Amma kaŋ ge ne ka kwaɗa ne mbi pe ma, ne Kris pe, mbi ndi nama dimma ne kaŋ ge be hamba to ma go. 8 No uwale, mbi ndil kaŋ ma pet nama hamba to ne mbi ne ɓo kwarra ge kwaɗa waɗeya ge mbi Bageyal Kris Jeso ne pe. Ne na pe, mbi vḭ tene go mbi ba̰ kaŋ ma pet, mbi ndil kaŋ ma pet dimma ne baal pe go, ne mbi ne ɓo Kris pe, 9 ne a ne ɓo mbi na zi pe me. Mbi ne dwatɗa ge ndil tene go mbi dosol ne mborra ge mbi ne eya pal pe to, amma ne hon fareba ge Kris zi ta. A dosol ge ne mbo ne Dok ta ya ne, ge hon fareba zi. 10 Ɓyareya ge mbi ne, a kwa Kris ne pool ge na tanna ne, mbi ɓa̰ dagre njot yál poseya ne na, mbi saŋge dimma ne na go siya ge na ne zi, 11 ne da pe, kadɗa na day day, mbi ta̰ ne naa ge siya ma buwal zi digi me.So syaya ge det ya uniya go
12 A be go mbi det ja wak zi to, mbi gale be detɗa kat mbyatɗa tap to. Amma mbi á tene so go mbi dé ya ame na, ne jo̰ Jeso Kris wa̰ mbi da ne no pe. 13 Ná vya ma, mbi dwat go mbi gale be ame na to gale. Kaŋ ge mbi ne ke, mbi vyale kaŋ ge ne kale mbi go̰r ya, mbi gane mbo ndwara zḛ, 14 mbi sya so det ya uniya go, ne da pe mbi ame balme ge Dok ne tó nee ya ne na pe ameya digi zi ya, Kris Jeso zi.
15 Nee ge mbyatɗa tap ma pet, ka me nee ne dwatɗa mbe no. Kadɗa aŋ da ne dwatɗa a̰me ge hini, no uwale Dok mbo dyan aŋ na pe zum. 16 Ɗeŋgo, ge swaga ge nee ne det ja go no ɗe, mbo me nee koo pe dagre ɗu.
17 Ná vya ma, bole me mbi, ndi me nama ge aŋ ne kwa go nama ke mborra da ne i go ma, bole me nama kaŋ kerra ma. 18 Mbi jan aŋ na ɗaɗak, mbi gwan jan aŋ na ma̰ no ne mḭḭm ma mbi ndwara go, ago naa gḛ a ke mborra ho̰l ne kaŋgre ge Kris ne. 19 Nama pe aya a ban uzi, nama dok a nama laar, a uware ta da ne kaŋ ge ne ke bama saaso, a dwat da ne kaŋ ge ne suwar se ma pe ɗeŋgo. 20 Ago nee ɗe, nee suwal ya digi zi ya, na ge nee ne da̰re Bage máya, Bageyal Jeso Kris, 21 na ge mbo er nee duur ge taŋgay mbe no saŋge dimma ne na duur ge hormo go, ne pool ge na ne ge ne mbya gwan ne kaŋ ma pala pet na pe se.