MAKTUB GE
ZḚ GE
GE BULUS NE NJAŊGE HON
TESALONIKA MA
Fare pala hageya
Bulus ma ne Silas ɓanna ne Timotawus a dé ya suwal Tesalonika go swaga ge a ne ɗage ne suwal Filibus ya go (Tkm 16:40, 17:1-10) ge mborra ge na ne ge ndwara azi mbo waage fare go. Suwal Tesalonika ya suwal Grek le kuu, ge Makedoniya ma suwal go. A suwal ge naa ge ke tujar ma ne go gḛ ne, pehir ma hini hini a ka suwal mbe go.
Swaga ge Bulus ma ne dé ya Tesalonika go, Bulus waage fare ge kwaɗa ge Kris ne ge Sinagog ge suwal mbe ne zi dumas ataa, Yahud ma ne pehir ge ɗogle ma gḛ a ho̰ fareba no. Amma naa a̰me ma ne Yahud ma buwal zi a ɗage ne yil digi no, a go no, a yá̰ nama ne suwal mbe go no (Tkm 17:5-7, 1Tes 1:6, 2:2,14), a ɗage mbo suwal Bere no. Da ne pe no, Bulus dwat ne naa ge ne tó giya̰l Kris zi mbe ma no. Swaga ge Bulus ne dé ya suwal Korinte go, Timotawus, na ge Bulus ne teme na gwan nama ta ya ne dé ya na ta suwal Korinte go, ne wa̰ na katɗa Dok zi ge Tesalonika ma ne pe, Bulus njaŋge nama maktub mbe no. Ago njaŋge nama maktub mbe ge suwal Korinte go, del 50 go. No a maktub ge Bulus ne ge zḛ ge ne, uwale, ne wak tuli ge giya̰l zi, a maktub ge zḛ ge ne.
Bulus da ne laar saal swaga ge ne za̰ fare ge Tesalonika ma ne. Da ne pe, gwan ne gugu hon Dok ne mborra ge nama ge kwaɗa Dok zi pe no, dwat nama pala ne temel ge na ne ke nama buwal zi no me. Ago Bulus da ne ene ge kwa nama ndwara (1:1—3:13). Uwale, moɗege nama no go, nama wa̰ ta wan Kris zi ɗeŋgo to, amma nama ka zam zḛ (4:1-12). Ne go̰r go, gwan ne nama fare janna nama fare ele ge tanna ge siya ma ne, ne gwanna ge Kris ne ya pal no (4:13—5:11). Á na fare janna da ne moɗegeya ma, ne wak sanna ma me (5:12-28).
Maktub ge Bulus ne njaŋge hon Tesalonika ma hage nee pala go nee iigi me ta ne gwanna ge Kris ne ya pe to, amma nee ke mborra jwap Dok zi swaga da̰re dam gwanna ge Kris ne ya go, nee ka oy fare ge kwaɗa ge Kris ne naa ta, ne kwarra go nee ge na ne ma ne, ko nee ka ne ndwara ko nee su, nee mbo kat dagre ne na muluk ge na ne zi ya (4:17).