1tesalonika Ma 4

Moɗegeya ne katɗa mbegeya ne Dok pe

(1Bit 1:14-16, 4:1-5, Efe 5:3-8, 1Kor 6:13-20)

1 Fare ge ne ga, ná vya ma, i kaɗe aŋ, i moɗege aŋ Bageyal Jeso zi, dimma ne aŋ ne ame ne i ta go, aŋ ke gyana ge aŋ ba mbo mborra ge ke Dok sḛ tuli. A na ge aŋ ne ke mborra na pal ne, aŋ gwan ke waɗeya. 2 Ago aŋ kwa wak honna ma ge i ne ho̰ aŋ na ne Bageyal Jeso ta kwa. 3 Laar ɓyareya ge Dok ne a go, aŋ ka mbegeya, aŋ abe ta uzi ne o̰y kerra go. 4 Ndu ge daage ne aŋ buwal zi na kwa san gwale ne na viya̰ go, hormo zi, 5 be ge ya̰ ta ene ge sḛ duur ne pe go dimma ne pehir ge ɗogle, ge a ne kwa Dok to ma go to. 6 Na kaage ndu a̰me ke na ná vya ya̰l, ko na mbuɗi na fare mbe no zi to bat. I jan aŋ na dḛ ya zum waŋ, Bageyal mbo mḛre naa ge ne ke kaŋ ge go mbe ma no. 7 Ago Dok be tol nee ya go nee ka seŋgre kerra zi to, amma nee ka mbegeya. 8 Ne no pe ɗe, ndu ge ne kuri wak honna mbe ma no, kuri be ndu dasana to, amma kuri Dok, na ge ne ho̰ aŋ na O̰yom ge mbegeya.

9 Ne laar wanna ge ná vya ma ta buwal zi pe ɗe, aŋ gwan ɓyare go i njaŋge fare na pal njaŋge to, ago aŋ ɓo hateya ne Dok ta go, aŋ ka ne laar wanna ta buwal zi. 10 Aŋ ke na ya go ná vya ma ta pet, ge suwal Makedoniya go mwaɗak. Ná vya ma, i gwan moɗege aŋ go, aŋ gwan ke na waɗeya. 11 Á me ta kat swaga halas, ke me aŋ temel ma, ke me aŋ temel ma ne aŋ tok ma dimma ne i ne ho̰ aŋ wak go. 12 Go no, aŋ ba kat ne hormo ge naa ge ne zum ma ta, aŋ ba kat ne ndu a̰me pe to me.

Dam gwanna ge Kris ne ya

(1Kor 15:19-58)

13 Ná vya ma, i ɓyare go aŋ ka dale ge fare ge naa ge ne su ma pal to, ne da pe, na kaage aŋ ke kḭḭmi dimma ne naa may ma, ge a ne jobreya to ma go to. 14 Kadɗa nee da ne hon fareba go Jeso su, na tá̰ uwale, go no me, ho̰ me nee fareba go, nama ge ne fi dam ne Jeso zi ma, Dok mbo tan nama poseya ne Na. 15 No fare ge i ne jan aŋ ne, fare janna ge Bageyal ne pal. Nee ge ne mbo gá ya ne ndwara ɗiŋ dam gwanna ge Bageyal ne ya go ma, nee mbo mbo ge nama ge ne fi dam ma ndwara zḛ to bat. 16 Ago Bageyal sḛ ne na pala, ne ka̰l ge maleka ma ga̰l ne, ne tṵ sunna ge Dok ne, mbo kan na koo ne digi zi ya, naa ge ne su Kris zi ma mbo tan digi gale ne ɓya, 17 swaga mbe go no, nee ge ne gá ne ndwara ma, a mbo pál nee dagre ne nama pḭr zi ya, nee mbo ɓan dagre ne Bageyal digi zi ya, go no me, nee mbo kat poseya ne Bageyal ɗaɗak. 18 Ne da pe no ɗe, iya me ta laar ne fare mbe ma no.