Ka me ɗu Kris zi
4
1 Mbi, ndu ge daŋgay Bageyal zi, mbi kaɗe aŋ, ke me mborra, mborra ge jwap ne tolla ge a ne tó aŋ ya go. 2 Ka me lwalwagat, suul, ne wan ta me. Ḭ me ta dṵṵl ma laar wanna zi. 3 Á me ta koy kat dagre ɗu ge O̰yom ne, a na e aŋ ɓan digi halas zi ne. 4 Sḛ duur ɗu, O̰yom ɗu me, go no me jobreya ɗu, na ge Dok ne tó aŋ ya ne na pe. 5 Bageyal ɗu, hon fareba ɗu, baptisma ɗu me, 6 Dok ɗu, na ge a kaŋ ma pet Bá ne, ya kaŋ ma pala digi pet, swaga ma go pet, kaŋ ma zi pet me. 7 Amma a ho̰ ndu ge daage ne nee buwal zi bobo mbyatɗa ge Kris ne mbya hon na. 8 Da ne pe no, a jya̰ no go:«Ndé digi zi ya,
pá naa ya no,
ho̰ naa bobo ma no.»
9 «Ndé digi zi ya.» Na pe gyana ɗaa? Te go ka̰ na koo ya se, ɗiŋ mbo suwar pe seɗe ya to’a? 10 Na ge ne ka̰ na koo ya se, a na ndé digi digi ma zi ya ne ndwara wi kaŋ ma pet. 11 A na ho̰ naa a̰me ma dimma ne naa ge temeya ma go ne, naa a̰me ma anabi ma, a̰me ma naa ge oy fare ge kwaɗa ma, a̰me ma naa ge koyya ma ne naa ge hate naa ma, 12 ne sin naa ge mbegeya ma pe, ndwara hon nama viya̰ ge ke temel ne don sḛ duur ge Kris ne digi pe, 13 ɗiŋ nee pet nee det ya kat dagre ɗu hon fareba zi, ne Dok Vya kwarra zi, nee há naa pool ma, doŋ ge Kris ne go mbyatɗa tap. 14 Go no, nee mbo gwan gá dimma ne naa jabso go to, nama ge sḭḭl ne pot nama le may me le may me, ge saam hateya ge sone ma ne in nama son ge naa dasana ma ne pal, bogeya ge nama ne zi, a lase naa mbo ya̰meya zi. 15 Swaga jan fare ge fareba laar wanna zi go, nee mbo don kaŋ ma zi pet detɗa ya na ge pala ta, ndwara go Kris. 16 Da ne na ta sḛ duur mwaɗak ɓa̰ digi pool no, ɓageya ta wak go ne kal wak ma go. Ago katɗa duur swaga ge daage ker temel da ne na viya̰ go, duur mwaɗak don digi, kat biriya laar wanna zi.
Dir ge zaŋgal ne dir ge giya̰l Kris zi
17 Fare ge mbi ne jan, ge mbi ne mḛ mbi koo na pal Bageyal zi no: ne ga ne zḛ no, na kaage aŋ gwan ke mborra ne pehir ge ɗogle ma go to bat, dwatɗa ge nama ne mbar a̰me to. 18 Nama pala ma tṵ, ndwara ge giya̰l ge Dok ne hon a gwasal nama ta, ne kwarra to ge nama ne pe, ne dulwak togreya ge nama ne pe me. 19 Dwatɗa ge saaso be gwan ga ne nama ta to, a hon ta ya ene ge sḛ duur ne zi, a ga ker kaŋ ge seŋgre ge daage pet be da̰a̰meya.
20 Amma aŋ ɗe, aŋ be ame hateya ge Kris ne go to. 21 Kadɗa aŋ za̰ na fare, a hate aŋ na zi me, dimma ne fare ge fareba ge Jeso zi go ɗe, 22 fage me kaŋ kerra ge aŋ ne ge zaŋgal ma uzi, fage me duur ge sabar na ge na ene ne lase naa mbo hubiya zi uzi, 23 é me aŋ dwatɗa ma giya̰l ne O̰yom ta. 24 ka̰ me duur ge giya̰l aŋ ta, na ge Dok ne dó dosol ma ne mbegeya ge fareba zi.
25 Ne jo̰ aŋ ya̰ hale ya uzi, ndu ge daage na jya̰ na kon fare ge fareba. Ago nee sḛ duur ge ɗu ne. 26 Ke me pore, amma ke me sone to, na kaage gyala na di aŋ ne pore juliliya zi to. 27 Ho̰ me Saytan viya̰ to bat. 28 Bage ne ka sel kaŋ, na gwan sel kaŋ to bat, amma na ke temel ne na tok zi kwaɗa, go no na ba ɓol kaŋ ge mbar naa ge woɗegeya ma. 29 Na kaage fare ge njonjorop ma nama ndage ne aŋ wak ma zi to bat, amma na ka fare ge kwaɗa, ge ne sinna pe, ge ne mbya hon naa ge ne za̰ na ma mbarra. 30 Ho̰ me O̰yom ge mbegeya ge Dok ne laar pisil to, na ge Dok ne é na nee ta ne logom go, ne dam zurra ge nee ne pe. 31 Na kaage wan ta laar zi ma, ne juliliya ma, ne pore ma, ne gool ma, ne fare asar jan ta ma, ne kaŋ kerra ge sone ge daage nama ka aŋ buwal zi to bat. 32 Ke me ta pe, kwa me ta a̰se, pore me ta dimma ne Dok ne pore aŋ Kris zi go me.