Swara pala guɗi halla dam ɗigliya go
6
1 Dam ɗigliya go, Jeso ka kaleya gaaso wak go, na naa ge ame hateya ma ka hal swara pala, a ka naŋgre na bama tok go sulla. 2 Farisi a̰me ma jan nama go: «Aŋ te ke kaŋ ge ne mbya kerra dam ɗigliya go to kyaɗa ɗaa?» 3 Jeso jan nama go: «Aŋ be isi fare ge Dawda ma ne na naa ma ne ke, swaga ge kyamal ne wa̰ nama to’a? 4 Gyana gyana ge ne wá zok ge Dok ne zi, ne abeya ge ne abe katugum ge mbegeya ma, ne za, ne ho̰ na naa ma, na ge ndu ne mbya zam na to, a naa ge tuwaleya ma zam na ne ɗeŋgo.» 5 Jan nama go: «Vya ge ndu ne ya dam ɗigliya pal.»Zonna ge ndu ge tok looɗeya ne dam ɗigliya go
6 Dam ɗigliya a̰me ge ɗogle go, wat Sinagog zi, ka hateya. Ndu a̰me ge tok matoson looɗol ne swaga mbe zi. 7 Naa ge njaŋgeya ma ne Farisi ma ka ndil na ndwara kwa go na ma̰ zon na dam ɗigliya go de, go no bama ba e fare na pal. 8 Ne jo̰ na sḛ kwa nama dwatɗa ma kwa ɗe, jan ndu ge tok looɗol go: «Ɗage digi mḛya nama buwal zi.» Na sḛ ɗage digi mḛya. 9 Jeso jan nama go: «Mbi ele aŋ gale, a kwaɗa go a ke kaŋ ge kwaɗa, ko ge sone dam ɗigliya go ɗaa? A Má ndu, ko a bá̰ ndu ɗaa?» 10 Kyare na ndwara ndil nama mwaɗak, jan na go: «Mwaɗe mo tok se.» Na sḛ mwaɗe na tok, na tok gwan na byalam go. 11 Amma a ɗage julili pore, a ka jan ta buwal zi go bama ke ne Jeso gyana de.
Talla ge naa ge ame hateya ma ne
12 Dam mbe ma zi, na sḛ ndé njal pala digi ke kaɗeya, ko̰y swaga swaga kaɗe Dok go. 13 Swaga ge swaga ne ko̰y, tol na naa ge ame hateya ma ya, tal naa wol para azi ne nama buwal zi, hon nama dḭl naa ge temeya ma: 14 Siman, syal na dḭl Bitrus, ne na ná vya Andrawus, ne Yakub, ne Yohanna, ne Filibus, ne Bartalamawus, 15 ne Matta, ne Toma, ne Yakub ge Alfa vya, ne Siman na ge a ne tol na Zelot, 16 ne Yuda ge Yakub vya, ne Yuda Iskariyot, na ge ne ɓya̰ Jeso naa tok go.
Jeso ka hate naa, ka zon naa me
17 A ne nama kan bama koo ya se, mbo babur pul ya, na naa ge ame hateya ma ɓase gḛ, ne naa ge ne mbo ne suwal Yuda ya ma, ne naa ge ne mbo ne Ursalima ya ma, ne naa ge ne mbo ne suwal Tyr ma ne Sidon ya ma mwaɗak. 18 A mbo ya za̰ na, ne ɓyare zonna ge bama moy ma ne me. Naa ge o̰yom ge seŋgre ma ne ka iigi nama a ɓol zonna. 19 naa pet a ka ɓyare go bama tat na, ago pool ka ndage ne na zi ya, ka zon nama.
Laar saal ma ne kḭḭmi
20 Saŋge tene na naa ge ame hateya ma ta, jan nama go:
«Naa ge a̰se ma, aŋ da ne laar saal,
ago muluk ge Dok ne da ne aŋ pe.
21 Aŋ ge kyamal ne ke aŋ ne se no ma, aŋ da ne laar saal,
ago aŋ mbo huri.
Aŋ ge ne fyal ne se no ma, aŋ da ne laar saal,
ago aŋ mbo man.
22 Aŋ da ne laar saal kadɗa naa kadɗa ka kwane aŋ, a ka kuri aŋ, a ka sal aŋ ne jan fare ge sone aŋ pal, ne vya ge ndu ne pe.
23 Ke me laar saal dam mbe zi, zo̰ me digi ne tuli, ndi aŋ tok-koyom a ɓaŋlaŋ digi zi ya, ago nama bá ma ke anabi ma go mbe no ca.
24 Woo ge aŋ ne, naa ge gan ma,
ago aŋ ɓol aŋ tuli ndwara go.
25 Woo ge aŋ ne, aŋ ge ne huri ne se no ma,
ago kyamal mbo ke aŋ.
Woo ge aŋ ne, aŋ ge ne man ne se no ma,
ago aŋ mbo kat kḭḭmi ne fyalla zi.
26 Woo ge aŋ ne, kadɗa naa pet a kadɗa ka dore aŋ,
ago nama bá ma ke kaŋ mbe go no ca ne anabi ge hale ma.»
Aŋ laar wa̰ aŋ naa ge ho̰l ma
(Mat 5:39-47, 7:12)
27 Amma mbi jan aŋ ge ne za̰ mbi ma go: aŋ laar wa̰ aŋ naa ge ho̰l ma, ke me naa ge ne kwane aŋ ma kwaɗa, 28 e me wak busu nama ge a ne vḛne bama wak aŋ pal ma pal, kaɗe me ne nama ge a ne ke aŋ yál ma pe. 29 Kadɗa ndu yar mo ya mo gasa go, saŋge na mo gasa le ge may me. Kadɗa ndu ame mo ba̰r ga̰l ya, ya̰ na ame mo ba̰r ge pul zi ge me. 30 Ho̰ ndu ge ne kaɗe mo. Kadɗa ndu a̰me ame mo kaŋ ya, kaage mo gwan ele na pe to. 31 Kaŋ ge aŋ ne ɓyare go naa nama ke aŋ na, ke me ne nama go no me. 32 Kadɗa aŋ laar wan nama ge nama laar ne wa̰ aŋ ma ɗeŋgo, aŋ ɓol ma doreya pe ɗaa? Ago naa ge sone ma puy, nama laar wan naa ge nama laar ne wan bama. 33 Kadɗa aŋ ke kwaɗa naa ge ne ke aŋ kwaɗa ma, aŋ ɓol ma doreya pe ɗaa? Naa ge sone ma ke go mbe no ca me. 34 Kadɗa aŋ hon kaŋ gobeya nama ge aŋ ne dwat ɓol kaŋ ne nama ta ma ɗeŋgo, aŋ ɓol ma doreya pe ɗaa? Ago, naa ge sone ma puy, a hon kaŋ gobeya naa ge a ne dwat ɓol kaŋ ne nama ta ma. 35 Aŋ laar wa̰ aŋ naa ge ho̰l ma, ke me naa kwaɗa, ho̰ me kaŋ gobeya be ge dwat ɓol a̰me to. Go no, aŋ tok-koyom mbo kat ɓaŋlaŋ, aŋ mbo kat Bage ne digi zi ya vya ma, ago na sḛ kwaɗa naa ge sḭ́ḭ́l ma ne naa ge sone ma ta. 36 Kwa me naa a̰se dimma ne aŋ Bá ne kwa naa a̰se go.
Kṵ me sarya naa pal to
37 Kṵ me sarya naa pal to, go no a mbo kun sarya aŋ pal to me, e me fare naa pal to, go no a mbo e fare aŋ pal to me. Pore me naa, go no a mbo pore aŋ me. 38 Ho̰ me, a mbo hon aŋ, ne kaŋ ŋgayya ge kwaɗa, ibiya, ne gasageya, ne sululiya, a mbo kanna aŋ ko̰o̰l zi. A mbo ŋgay hon aŋ ne kaŋ ge aŋ ne ŋgay hon naa.
39 Gwan ke nama fare sḭ go: «Ɓaal da ne pool wan na kon ɓaal uwara ɗaa? Ago nama sḛ ma jwak a ma̰ det tuul se. 40 Bage ame hateya waɗe na bage ne hate na to. Amma kadɗa bage ne ame hateya ŋgaraŋ, da ne pool saŋge ne na bage hateya go. 41 Mo te kwa sugur ne mo ná vya ndwara fa̰ zi gyana ɗo, mo ba kwa uwara murguli ge ne mo ndwara fa̰ zi to ɗaa? 42 Mo te jan mo ná vya gyana go: ná vya, ya̰ mbi hé sugur ge ne mo ndwara fa̰ zi uzi ɗo, mo ba kat ne uwara murguli mo ndwara fa̰ zi me ɗaa? Naa ge mbuɗi naa ndwara ma, ndage uwara murguli ge ne mo ndwara fa̰ zi uzi gale ɓya, go no mo ba kwa swaga kwaɗa, mo ba gá hé sugur ge ne mo ná vya ndwara fa̰ zi uzi.»
Uwara ge kwaɗa tol kwaɗa
43 Uwara ge kwaɗa ge tol sone to, uwara ge sone ge tol kwaɗa to me. 44 A kwa uwara ge daage da ne na tolla ta, a yel fere ne baŋre ta to, ko a yel oyo̰r ne kore ta to me. 45 Ndu ge kwaɗa ndage kaŋ ge kwaɗa ma ne na dulwak ge kwaɗa zi ya. Ndu ge sone ndage kaŋ ge sone ma ne na dulwak ge sone zi ya. Ago wak jan fare ge ne sululi ne dulwak zi ya.
Fare sḭ ge zok pe dolla ne
46 Aŋ te tol mbi Bageyal Bageyal gyana ɗo, aŋ ba ka ke mborra mbi fare ma pal to ɗaa? 47 Ndu ge ne mbo ya mbi ta, ka za̰ mbi fare ma, ka ke temel nama pal, mbi ŋgay aŋ na dimma da ne da go ɗaa? 48 Na sḛ a dimma ne ndu ge ne ɗage sin na zok: al na pe se ya ɗugul, dol na pe ne go̰y pala se ya. Swaga ge mam ne há, so̰o̰l ne ka̰ ya zok mbe pal, be day ge gul zok mbe to, ne da pe sḭ kwaɗa. 49 Amma ndu ge ne za̰ fare, ke temel na pal to, a dimma ne ndu ge ne sḭ na zok suwar pal baŋ be ge al na pe to go. Swaga ge so̰o̰l ne ka̰ ya na pal, zok mbe gul se, na ba̰leya mbe kat gḛ ge be to.