Jeso zon ndu ge looɗeya ge suwal Kafarnahum go
2
1 Dam ma kwaɗa lwak go̰r go, Jeso gwan’a Kafarnahum go, naa za̰ go na ya yadiŋ. 2 Naa kote ya gḛ ge be ge ndu gwan ɓol swaga to, ko zok wak pala zum. Ka jan nama fare ge Dok. 3 A gene na ndu ge looɗeya ya, a naa anda ka in na ne. 4 Ne jo̰ a be ɓol viya̰ ge gene na ya na ta zi to ne naa ɓase pe ɗe, a kwa zok pala swaga ge na sḛ ne ka go, a zut na, a surbi saŋgal ge ndu ge looɗeya ne fí ne na go mbe ya se. 5 Swaga ge Jeso ne kwa hon fareba ge nama ne, jan ndu ge looɗeya go: «Mbi vya, a pore mo sone ma ya go.» 6 Naa ge njaŋgeya a̰me ma ka swaga mbe go, a ka jan bama dulwak zi go: 7 «Ndu mbe te kare ma fare go ɗaa? Sal Dok! A wuɗi mbya pore sone ne ɗaa? A Dok ɗu kikit to’a!» 8 Swaga ge Jeso ne kwa go nama dwat ne nama dulwak zi go ɗe, jan nama go: «Aŋ te dwat ma fare ne aŋ dulwak zi go ɗaa?» 9 A ma kaŋ waɗe ne fogor ne ɗaa? A ge mo jan ndu ge looɗol go: «A pore mo sone ma ya go», ko ge mo jan go: «Ɗage digi, hé mo saŋgal, mbo mo mborra» ne ɗaa? 10 Ge aŋ kwa go Vya ge ndu ne da ne pool ne suwar pal ge pore sone ma ɗe, jan ndu ge looɗeya go: 11 «Mbi jan mo go, ɗage digi, hé mo saŋgal mbo mo yadiŋ!» 12 Swaga mbe go juju, ɗage digi, hé na saŋgal, wat zum naa ndwara go pet, fare mbe ke naa ajab, nama sḛ ma pet a ka uware Dok janna go: «I be kwa kaŋ hir ge go mbe no pe dam ɗu to!»Tolla ge Levi ne
13 Jeso gwan mbo mam wak se ya, ɓase ma pet a kare na pe ya, na sḛ ka hate nama. 14 Swaga mborra go, kwa Levi ge Alfa vya ne katɗa naa ge tyare kaŋ ma swaga temel zi. Jan na go: «Kare mbi pe ya.» Na sḛ ɗage digi, mbo na pe ya. 15 Ge Levi yadiŋ, Jeso kat swaga zam kaŋzam go ne naa ge tyare kaŋ ma gḛ, ne naa ge ke sone ma, poseya ne na naa ge ame hateya ma me. Ago, naa ge go mbe ma ka kare na pe gḛ ge be to. 16 Swaga ge naa ge njaŋgeya ge ne Farisi ma buwal zi ma ne kwa na zam kaŋzam dagre ne naa ge ke sone ma ne naa ge tyare kaŋ ma ɗe, a jan na naa ge ame hateya ma go: «Yi, aŋ ndu mbe zam kaŋ da ne naa ge tyare kaŋ ma, ne naa ge ke sone ma ba!» 17 Swaga ge Jeso ne za̰, jan nama go: «A be naa ge be moy to ma ɓyare naa ge zon naa ma pe ne to, amma a naa ge moy ma. Mbi be mbo ya tol naa ge dosol ma to, amma naa ge ke sone ma.»
Hateya ge Jeso ne asiyam wanna pal
18 Naa ge ame hateya ge Yohanna ne ma poseya ne Farisi ma ka ke asiyam. A mbo ya jan Jeso go: «Naa ge ame hateya ge Yohanna ne ma ne naa ge ame hateya ge Farisi ma ne ma ke asiyam, mo naa ge ame hateya ma te ke asiyam to kyaɗa ɗaa?» 19 Jeso jan nama go: «Swaga ge naa ge a ne tol nama ya vḛso sanna go ma ne kat dagre ne gwale giya̰l obe ɗe, a ke asiyam ke ɗaa? Swaga ge gwale giya̰l obe ne kat gale ne nama, a ne pool ke asiyam to. 20 Dam ma mbo ya go ge a mbo hé gwale giya̰l obe uzi, go no dam mbe go, a mbo gá ke asiyam.
21 Naa dyan ba̰r ge kamal ne ba̰r ge giya̰l to, ago ba̰r wak ge giya̰l taabe ba̰r ge kamal ya na pe go, na taabeya mbe gwan hat ga̰l waɗeya. 22 Uwale, naa kan oyo̰r jiya̰l ge giya̰l ge ɗutulua ge kamal zi to. Ago oyo̰r jiya̰l fol ɗutulu ma fol, oyo̰r jiya̰l kan uzi, ɗutulu ma vḛne me. Amma naa kan oyo̰r jiya̰l ge giya̰l ge ɗutulu ge giya̰l ma zi.»
Swara pala halla, ne dam ɗigliya
23 Dam ɗigliya go, Jeso ka kaleya gaaso ge gḛme ne wak go. Swaga mborra go, na naa ge ame hateya ma ɗage hal swara pala guɗi. 24 Farisi ma jan na go: «A te ke kaŋ ge ne mbya kerra dam ɗigliya go to gyana ɗaa?» 25 Jan nama go: «Aŋ be isi fare ge Dawda ma ne na naa ma ne ke swaga ge a ne ka woɗegeya ma ne kyamal zi to’a? 26 Gyana gyana ge ne wá zok ge Dok ne zi dam ma ge Abiyatar ne ka kep tuwaleya go, ne zamma ge ne zá katugum ge mbegeya ma ge ndu ne mbya zam nama to, a naa ge ke tuwaleya ma zam nama ne ɗeŋgo, ne honna ge ne ho̰ naa ge ne ka na pe go ma me.» 27 Jeso Jan nama go: «A ke dam ɗigliya da ne ndu dasana pe, a be ke ndu dasana da ne dam ɗigliya pe to, 28 ne pe no, Vya ge ndu ne ya dam ɗigliya pal.»