Swara pala halla
12
1 Dam mbe ma pul zi, Jeso ka kaleya gaaso ge gḛme ne zi dam ɗigliya go. Na naa ge ame hateya ma ka kyamal, a ɗage hal swara pala guɗi, a ka sulla. 2 Swaga ge Farisi ma ne kwa no, a jan na go: «Ndi, mo naa ge ame hateya ma ke kaŋ ge ne mbya kerra dam ɗigliya go to.» 3 Amma Jeso jan nama go: «Aŋ be isi fare ge Dawda ne ke, swaga ge a ne na naa ma ne ka kyamal to’a? 4 Gyana gyana ge a ne wá zok ge Dok ne zi, ge a ne zá katugum ge mbegeya ma, na ge na sḛ, ko na naa ma ne mbya zam nama to, ɗeŋgo a naa ge ke tuwaleya ma zam nama ne. 5 Ko aŋ be isi ne maktub eya zi go, dam ɗigliya go, naa ge ke tuwaleya ma, ge zok ge mbegeya zi a koy dam ɗigliya to, amma a isi na nama pal go na ya̰l ne to to’a? 6 Amma mbi jan aŋ go, kaŋ ge waɗe zok ge mbegeya ne ga̰l ya go go. 7 Aŋ te wá̰ fare ge ne jan go: ‹Mbi laar wa̰ kwa a̰se, a be tuwaleya to› pe wan ɗe, aŋ te ya kun fare naa ge be fare to mbe ma no pal to. 8 Ago Vya ge ndu ne ya dam ɗigliya pal.»Jeso zon ndu ge tok looɗol
9 Jeso ɗage ne swaga mbe go, mbo nama Sinagog zi ya. 10 Ndi, ndu a̰me ge tok looɗol ne swaga mbe zi, a ele Jeso go: «Da ne na viya̰ go ge a zon ndu dam ɗigliya go ɗaa?» A ele na fare mbe no ndwara her na pe. 11 Jan nama go: «A wuɗi ne aŋ buwal zi, kadɗa na tame ɗu kikit, na tame mbe detɗa tuul se dam ɗigliya go, wan na ma̰ ya digi to ɗaa? 12 Ndu dasana waɗe tame gyana ga! Ne da pe no ɗe, da ne na viya̰ go ge a ke kaŋ ge kwaɗa ne ndu dam ɗigliya go.» 13 Swaga mbe go, Jeso jan ndu mbe go: «Mwaɗe mo tok se!» Mwaɗe na tok se, na tok mbe zon kwaɗa dimma ne ge may go. 14 Swaga ge Farisi ma ne wá ya zum, a ke koteya na pal, ne da pe bama ɓó viya̰ ge ban na uzi. 15 Amma swaga ge Jeso ne kwa no, ŋgwate uzi ya ne swaga mbe go, naa gḛ a kare na pe ya, zon nama pet. 16 Wan nama togor na kaage nama dya̰ na pe zum naa ta to. 17 Ke go no, ne da pe fare ge anabi Isaya ne jya̰ wak wi, jya̰ go:
18 «Ndi, mbi dore ge mbi ne tá na,
na ge mbi laar ne wa̰ na,
ge mbi sḛ ne ke tuli ne na.
Mbi mbo kan mbi O̰yom na pal,
mbo waage pehir ge ɗogle ma fare ge dosol.
19 Mbo ke gool to bat,
mbo oy digi ne ka̰l ndaar to bat,
Ndu a̰me mbo za̰ na ka̰l viya̰ ma go to bat.
20 mbo hál teer ge lwarra se to bat,
mbo piri ol wak ge gale ne ɗusi uzi to bat,
ɗiŋ e dosol halla.
21 Pehir ge ɗogle ma pet
a mbo kan bama saareya na pal.»
Jeso zon ɓaal ma ne gisil
22 A gene na ndu a̰me ge ne o̰yom ge seŋgre ya, ndu mbe ka ɓaal ne gisil me. Na sḛ zon na, gá far wak ne kwa swaga me. 23 Ɓase ma pet a ke ajab, a ka janna go: «Te be Dawda vya mbe ne to’a?» 24 Swaga ge Farisi ma ne za̰ fare mbe, a ka janna go: «Ndu mbe yan o̰yom ge seŋgre ma da ne pool ge Beelzebul ne, ndwara go ga̰l ge o̰yom ge seŋgre ma ne.» 25 Swaga ge ne kwa nama dwatɗa ma, jan nama go: «Muluk ge daage pet ge ne kat varseya, ge a ne ke ho̰l ta buwal zi burmi uzi, suwal ge daage, ko yàl ge daage ge ne kat varseya, ge a ne kat ke ta ho̰l mḛ́ to. 26 Kadɗa Saytan yan Saytan ne ɗe, varse varse ho̰l tene pal. Go mbe no ɗe, na muluk mḛ́ ma gyana ɗaa? 27 Kadɗa mbi yan o̰yom ge seŋgre ma da ne pool ge Beelzebul ne ɗe, aŋ vya ma sḛ a yan nama da ne ma pool ɗaa? Ne no pe ɗe, a mbo gá aŋ naa ge kun sarya ma. 28 Amma kadɗa mbi yan o̰yom ge seŋgre ma da ne O̰yom ge Dok ne ɗe, ago muluk ge Dok ne det ja aŋ ta. 29 Ko ndu a̰me da ne pool wat ndu ge pool diŋ, goole na kaŋ ma, be ge vwal na vwal ɓya to ɗaa? Vwal na vwal ɓya, ba ɗage abe na kaŋ ma ne na diŋ. 30 Ndu ge dagre ne mbi to, a ho̰l ne mbi, ndu ge ne kote poseya ne mbi to, a bage kar uzi ne. 31 Ne pe no, mbi jan aŋ go: Sone ge daage, ko salla ge ndu ne sal Dok, a mbo pore na, amma ndu ge ne sal O̰yom ge Dok ne, a mbo pore na to bat. 32 Ndu ge daage pet ge ne jan fare ho̰l ne Vya ge ndu ne ya, a mbo pore na, amma ndu ge daage pet ge ne jan fare ho̰l ne O̰yom ge mbegeya, a mbo pore na to bat, ko zaman mbe no zi, ko zaman ge ne mbo ya zi.
33 Kadɗa uwara kwaɗa, tol kwaɗa, kadɗa uwara sone, tol sone. Ago naa kwa uwara kwaɗa da ne na tolla ta. 34 Gole vya ma, aŋ ge sone ma, aŋ ke ma̰ gyana ɗo aŋ ba jan fare ge kwaɗa ɗaa? Ago wak jan fare ge dulwak ne ŋgursi na. 35 Ndu ge kwaɗa ndage kaŋ ge kwaɗa ma ne na swaga koy kaŋ ge kwaɗa zi ya. Ndu ge sone ndage kaŋ ge sone ma ne na swaga koy kaŋ ge sone zi ya. 36 Amma mbi jan aŋ: dam sarya go, ndu ge daage mbo gene na fare janna ge baŋ yak ma ya Dok ndwara se. 37 Ago fare janna ge mo ne pal a mbo ben mo, fare janna ge mo ne pal me a mbo wan mo ne fare.»
Farisi ma ɓyare kaŋ ŋgayya
38 Naa ge njaŋgeya a̰me ma ne Farisi a̰me ma jan na go: «Bage hateya, i ɓyare go mo ke i kaŋ ŋgayya a̰me i ba kwa.» 39 Jeso jan nama go: «Doŋ pe ge sone ge a ne saŋge Dok bama go̰r ma ɓyare kaŋ ŋgayya a̰me, amma a mbo ke nama kaŋ ŋgayya a̰me to, mbo kat kaŋ ŋgayya ge anabi Jonas ne ɗeŋgo. 40 Dimma ne Jonas ne ke dam ataa sii ga̰l laar zi go, Vya ge ndu ne mbo ke dam ataa suwar zi me. 41 Dam sarya go, naa ge suwal Ninive ma mbo ɗage mḛya poseya ne doŋ pe mbe no, a mbo kun fare na pal, ne da pe, a gwa̰ ya Dok ta swaga ge Jonas ne ka waage nama fare go. Ndi, ndu ge waɗe Jonas ya go go. 42 Dam sarya go, gan gwale ge mbii ge mbo ɗage mḛya poseya ne doŋ pe mbe no me, mbo kun fare na pal, ne da pe, na sḛ ɗage ne suwar pe ndegɗe ya mbo ya za̰ zwama ge Salomon ne. Ndi, ndu ge waɗe Salomon ya go go uwale.
43 Swaga ge o̰yom ge seŋgre ne ndage ne ndu zi, mbo ɓyare swaga ɗigli tene ge babur pul ge be mam go, amma ɓol to. 44 Jan tene go: ‹Mbi gwan mbo mbi zok ge mbi ne ndage ne na zi ya zum ya.› Swaga ge ne gwan’a, set na pul baŋ, gisiya ɗaŋɗaŋ, nṵsiya ndanda. 45 Go no, gwan mbo abe o̰yom ge sone gḛ ma ya na pe go ɓyalar, a gwan’a na zi, a gá kat na zi. Ndu mbe katɗa ge hṵsi no mbo gwan saŋge sone gḛ waɗe ge dḛ zaŋgal. Mbo kat go no me ne doŋ pe ge sone mbe no.»
Jeso ná ma ne na ná vya ma
46 Jeso ne swaga wan naa fare pe go gale, na ná ma ne na ná vya ma mbo ya mḛya zum, a ka ɓyare jan na fare. 47 [Ndu a̰me jan na go: «Mo ná ma ne mo ná vya ma mḛ ya zum, a ɓyare jan mo fare.»]a 48 Jeso gwan ne ndu ge ne jya̰ na fare janna go: «Mbi ná wuɗi ne, mbi ná vya ma wuɗi ma ne ɗaa?» 49 Tyare na tok na naa ge ame hateya ma ta, jan go: «Mbi ná ma ne mbi ná vya ma no! 50 Ndu ge daage pet ge ne ke laar ɓyareya ge mbi Bá ge ne digi zi ne, a mbi ná vya ge son ne, a mbi ná vya ge gwale ne, a mbi ná ne me.»