Habakuk i

MAKTUB GE

ANABI HABAKUK

NE

Fare pala hageya

Anabi Habakuk ma ne anabi Irmiya ke temel zaman ge ɗu go, ge del kikis myanaŋgal para wara azi para ɓyalar (627) mbo kikis anuwa̰y para wara tiimal para myanaŋgal (586) J.K ndwara zḛ go. Na sḛ ka swaga ge Babilon ma ne ɗage ame suwal ma go, ago Babilon ma há suwal Yuda, a burmi Ursalima no me ge del kikis anuwa̰y para wara tiimal para ɓyalar (587) J.K ndwara zḛ go.

Ne jo̰ sone waɗe ya gḛ suwal diŋ, naa ge gwan ke fare ge Dok ne ma be gwan gá to ɗe, Habakuk ele Dok no go, na mbo ya̰ sone ke muluk naa pal go go no ɗiŋ ma swaga go ga de (1:2)? Fare kerra tele mbo á ma swaga go de (2:6)? Kaŋ mbe ma te ke go da ne ma fare pe de (1:3, 13, 14)? Dok gwan ne na fare janna to da ne ma fare pe de?

A go no, Dok gwan ne na janna no go, Babilon ma mbo ya go ne yál ge waɗe ge no mbe ma no (1:6-11). Vo ge na ne zi, anabi Habakuk sun tene Dok ta no go, na ya̰ naa ge sone mbe ma no burmi na naa ma pe kyaɗa de (1:12-17)? Dok gwan ne na janna no uwale go, naa ge dosol ma mbo kat ne ndwara, amma nama ka̰ nama saareya na ge Dok pal, nama ka da̰reya wak ɗamal (Hab 2:4, 2:20, 3:1-19). Ago naa ge sone ma mbo ban uzi ne bama sone kerra pe (Hab 2:7, 10-11, 16-17, 19).

Naa isi Maktub ge anabi Habakuk ne ge swaga yál ma zi ndwara ɓol dulwak iyalla ne haŋle ge dunya ne ma go. Ago fare eleya ge Habakuk ne a fare ma ge naa ne ele ta nama ɗaɗak swaga ge yál ne ɓol naa go. Amma da ne hon fare ta ndu ge Dok ne ba ɓol máya (Rom 1:17, Gal 3:11, Ibr 10:38).