MAKTUB GE
ANABI HABAKUK
NE
1
1 Fare ge Dok ne dya̰ na anabi Habakuk ta daalam zi.Sun tene ge anabi ne Dok ta
2 Ɗiŋ ma swaga go, o Bage ɗiŋnedin,
mbi ba tol mo go mo sya mbi ko̰r,
mo ba za̰ mbi to bat ɗaa?
Mbi te fyal mo ta ne yál pe gyana ɗo,
mo ba zur i to ɗaa?
3 Mo te ya̰ mbi ndwara kwa kaŋ ge sone ma go kyaɗa ɗaa?
Mo te vin gyana go, naa ka njot yál go ɗaa?
Mbi ndwara gá kwa ne go kaŋ vḛneya ma ne fare kerra ge pool ma,
a gaage ma ne gool ma ɗage digi ne.
4 Ne no pe, ndu ge gwan ke mborra eya ma pal to,
sarya kunna ge jwap be gwan gá to.
A ndu ge sone gá hal ndu ge dosol ne,
sarya kunna ge dosol be gwan ga to.
Ka̰l ge Dok ne: Kaldeya ma mbo mbo ya ame suwal
5 Dó me aŋ ndwara ndil kaŋ ge ne ke ne pehir ge ɗogle ma buwal zi,
ke me ajab.
Dam ma ge aŋ ne na zi no, kaŋ ajab a̰me mbo ke,
swaga ge a ne mbo wan aŋ na pe ya,
aŋ mbo hon fareba na pal to.
6 Ndi, mbi mbo é kaldeya ma mbo ya,
a naa ge laar sone ma, ne naa ge holeya ma ne.
A mbo swaga ma go pet,
ndwara ame naa suwal ma.
7 A naa ge ndaar ma ne, a hon naa vo,
a nama sḛ hon bama eya ma, ne hon ta ga̰l ne.
8 Nama tisi ma sya so avun waɗe ra̰y ma,
a waɗe bagomso ge kyamal ne wan na gasamal da ne juliliya,
ne zum ya kaal, nama naa ge njaŋge tisi ma gane ya gane baba,
dimma ne gwala ne sugi ya mbal kaŋ go.
9 Pet a mbo ya da ne maŋge kaŋ pe.
a mbo bama ndwara zḛ sat,
a abe mo̰r ma tabeya gḛ dimma ne kafeɗem go.
10 A cot gan ma cot,
a ndil ga̰l ma kaŋ senna,
a sya suwal ge ne ve ne gulum ga̰l digi ma vo to.
Swaga ge a ne ɗage ame suwal mbe ma,
a tor suwar digi.
11 A er bama dwatɗa, a kale zḛ,
a ka gwan hat ta ya̰l waɗeya,
pool ge nama ne, a nama dok ne.
Sun tene ge anabi ne ge ndwara azi Dok ta
12 Ne zaŋgal ya day, mo te be Bage ɗiŋnedin,
Dok ge mbi ne, ne Bage mbegeya ne to’a?
Mo su to.
O Bage ɗiŋnedin, a mo é Kaldeya ma ya ne go, nama mḛre i.
njal ge mbi ne, a mo é nama ya ne go nama ke i yál.
13 Mo ndwara fa̰ ma harcal ge be ge mo ndil sone to,
mo ne pool vin go naa ka njot yál go to.
Mo te ndil naa ge boge naa ma solom go gyana ɗaa?
Mo te kat wak ɗamal gyana,
swaga ge naa ge sone ma ne ke naa ge dosol ma yál ɗaa?
14 Mo te ke naa dasana ma gyana
dimma ne sii ma ne kavaar ma
ge a ne bage ne nama pal to ma go ɗaa?
15 Kaldeya ma wan naa dimma ne kuwa ne wan sii go,
a goole nama bama kool ma zi,
a ka abe nama dugli ma zi.
Go no, a ke laar saal, ne tuli.
16 Go no a ke tuwaleya hon bama kool ma,
a til dukan hon bama dugli ma,
ne nama ne hon bama kaŋzam pe,
ne nama ne hon bama kaŋzam ge tuli baŋneya bindik pe.
17 Go no ɗe, a mbo ya̰ be ge hul bama kool mbe ma
ne á naa hunna be ge kwa a̰se to ɗaa?